Kört verhaol deur G. Assen
Arger ij je ok zo an de rommel die mar zo an de straot of fietspad gooid wördt. Nou ja…zo arg is het non ok weer niet, de blikkies en kartonnegies kuj zo even oppakken en in de container gooien. Mar toch elke keer a’k weer wat oppak, zeg ik wal een lillijk woord. Het wördt wat aans aj ziet wat der mangs in het veld lig. Mien vrouw en ikke fietsten lest in het Bargerveen. Mieters mooi is het daor. Bij de bankies kuj even van het zadel af um even wat te drinken en te snoepen en jao ik mus ok even pissen achter de bossies. Nou wat daor allemaol lig wi’j niet geleuven, nee dat pak ij niet zo even op. Non is dat niet iens zo arg, het mieste is ja natuur en is bemesting veur de planten mar de papieren buusdoekies en het w.c.-papier heurt daor toch echt niet. En dat is ok gels niet neudig. Wij mussen ok wal es oet de bokse aw op het laand an het wark waren. Dan gungen wij ok even achter de bossies mar wij gebruukten gien papier. Nee wij deden het gewoon met een vossie grös. Nou en dan is het toch een hiel natuurlijk gebeuren. Zo gung het ok met die smokkelaor an het Schoonebekerdiep, die gehurkt betrapt wuur deur een Duutse kommies.
De kommies vreug: “Haben sie Papieren?” De smokkelaor zee: “Nee…ik doe het wal met een vossie grös!” Het kan trouwens wal gevolgen hebben, zoas bij Berend oet Klazienaveen. Die mus hen keuren veur de dienst in Hengelo. Sportief as e was gung hie op de fietse naor Hengelo. In Twente, gelukkig veul bos, mus hie ok oet de bokse. Naotied ok een vossie grös. Bij de keuring gaf hie zuch op veur de geneeskundige troepen want hie speulde vrogger met zien zussies ok aid doktertien. Nao de keuring bleek dat hie was indeeld bij het peerdevolk. Berend wat ontdaon naor de dokter en vreug um opheldering. De dokter zee: “Man, do bis bizunder geschikt veur het peerdevolk, do hes het peerdevoer al an de kont hangen!”
◄ weerum naor het thoesblad