vertaold deur W.O.I.
Dit is veur elke iene die geboren is vèur 1980.
Bin ij nao 1980 geboren dan hef ’t niks met je te maken en huuj dit verhaal niet
persé wieder te lezen.
De kinder van vandaag de dag bint slim verwend.
Bin ij as kind opgruid in de 50er, 60er of 70er jaoren, dan is het,
weerumkiekend, onveurstelbaar daj zo lang hebt kunnen overleven!
As kind zaten wij (veur zo wied oeze pap en mam zu’n ding hadden) zunder gordel
en zunder airbags in de auto.
Oeze ledikanties waren schilderd in gloepens mooie kleuren vol met lood en
cadmium.
De medicienenflessies oet de apotheek kunden wij gewoon lös kriegen.
Net trouwens as de fles chloor die gewoon in ‘t aanrechtkastie stund.
Deuren en ramen bedreigden continue oeze vingerties.
Op de fiets hadden wij gien helm op, dat was veur motorrieders.
Wij drunken water met de mond an de kraan in plaots van oet de fles.
Wij bouwden ziepkisten en kwamen der pas op de eerste rit, van de bult of,
achter daw gien rem hadden.
Nao een stuk of wat ongelukken kunden wij daor best met umgaon.
Wij bleven de hiele dag vort en mussen pas in hoes wezen as de straotlanteerns
an gungen. Gieniene wus waor as wij zaten en wij hadden gien mobiele tillefoon
bij oes.
Wij sneden oes, braken de botten en tanden en der wuur gieniene anklaogd.
Het waren ongelukken en de ienige die schuld had dat waren wij zölf.
Kun ij je die zgn. 'ongelukken' ok nog herinneren?
Wij hadden vechtpartijen en slugen mekaar een blauw oog.
Daor mussen wij met leren leven.
Grote mèensen hadden daor gien belangstelling veur en bemuiden zuk der niet met.
Wij aten koekies, stoet met ’n dikke laog botter, drunken limonade en wuurden
toch niet te dik.
Wij drunken met kameraoden of vriendinnegies oet dezölfde fles en gieniene gung
daor dood an.
Wij hadden gien: Playstation, Nintendo, X-Box, 64 Tillevisiezenders, Video,
DVD, MP3, Surround sound, een eigen tillevisie, Computer en internet.
Wat wij hadden hadden vrienden.
Wij gungen gewoon hen boeten en daor kwamen wij mekaar wal tegen.
Wij gungen ok wal hen heur hoes en belden daor an, of gungen gewoon naor binnen
want zie hadden gien deurbel.
En dat zunder het van te veuren of te spreken en zunder dat oeze olde lu der van
wussen.
Gieniene bracht oes en gieniene haalde oes weer op…
Hoe was dat in hemelsnaam meugelijk?
Wij bedachten zölf spellegies met stokken en tennisballen.
Wij aten wörms en die leefden niet veur altied wieder in oeze maag.
Met de stokken steuken wij mekaar haost nooit in de ogen.
Met voetballen op straot muchten ij allèn metdoen aj goed genog waren.
Aj niet goed genog waren, mussen ij leren um met teleurstellings um te gaon.
Paartie kinder kunden op de schoel niet zo best leren as aandern.
Zie haalden onvoldoendes en bleven zitten.
Dat leidde niet tot emotionele olderaovends of veraandernde prestatienorms.
Mangs hadden oeze daoden gevolgen,
Dat was logisch, en gieniene kun zuk der achter vortstoppen.
As ien van oes ondeugde oethaald har, dan was ’t normaal dat je pap en mam je
niet oet de preblemen haalden.In tegendiel, zie waren het met de plietsie iens!!
Stel je veur!
Oeze generaotsie hef prebleemoplössers en oetvinders die niet te beroerd bint um
risico’s te nimmen, veurtbracht.
Wij hadden vrijheid, hadden succes, ok wal ies tegenslagen, en namen
verantwoording.
Met al die dingen kunden en kun wij gloepens best umgaon!!!
Bij die generaotsie heur ij ok...
Wees bliede daj der toen ok bij waren!
◄ weerum naor het thoesblad