deur G. Assen
Aj bij oes in het darp een eernsachtige scharrelderij kregen, kun ’t gebeuren dat der op een aovend een stel kameraoden, naobers of femilie an de deur kwam met veul kabaol en knallen van een jachtgeweer. Dan wuur het wicht schat. De weerde van het wicht wuur oetdrukt in starke draank en naorgelang zie van betere komaf was, steeg de hoeveulheid draank. Een wicht van een grote boer of van ien met veul geld was meer weerd as een arbeiderswicht.
De schatters namen ok wal draank met, mar de vrijer mus de draank die de weerde van het wicht bepaolde, betalen. De vrijer kreeg een glasie zunder voet, zodat hie het niet wegzetten kun en de schatters zörgden derveur dat het glassie niet leeg raakte.
Bij het binnenkommen wuur der een jachtakte veurlezen.
Jachtakte
Hedenaovend wordt under getuge van undertiekenden een jacht-akte opmaakt veur de heer b.v. Jans Druppie.
Het giet um een akte veur de jacht op langhaorig, tweibienig wild. De akte wordt verliend under volgende veurwaorden.
a. Het is verbeuden zuch boeten het jachtveld te
begeven.
b. Der mag allent op ien prooi toegliek jaagd worden.
c. Het jachtveld möt in ordentelijke staot holden worden.
d. Der möt zo min meuglijk met losse flodders scheuten worden.
e. As der wat verknooid wordt, bint de kosten veur bovengenuumde.
f. De kosten van dizze akte moet kontant voldaon worden, in natura te
weten, twei kisten bier en drie liter jenever.
g. Het jachtveld lig in Nei Schonbek, kadastraol bekend under
sectienommer G9605.
h. De vergunning kan ten allen tiede intrökken worden.
i . De vergunning is strikt persoonlijk en kan niet an aandern
overdraogen worden.
Handtiekens van de getugen bij het opmaken van dizze akte.
……………………. …………………….
Waor gebeurd.
◄ weerum naor het thoesblad