Kört verhaol deur G. Assen oet Schoonebeek
Het gung niet good met Jans, Jans de Knieperd. Hie was al laang zeek en het gung
de leste tied hard achteroet. Jans zien vrouw Lies was al laang leden störven.
Zie hadden drei kinder kregen, alle drei jongs. Dizze jongs hadden allent hard
warken leerd en oetgaon was der niet bij, dat kostte allent mar geld niewaor en
zodeunig hadden zie ok nooit umgang kregen met vrouwlu. Je begriept het al…
Harm, Berend en (jonge) Jans waren altied vrijgezel bleven.
Met z'n dreien zatten zie te wachten op het ende van Jans, heur vao. Jans lag in
de bedstee waoras ammet wat gerochel oet klunk en dan was het weer een hiele
tied stille. Um de beurt keken de jongs achter het deurtien. Het was niet best,
zee de oetdrukking op het gezicht. Der wuur niet veul praot, allent wat zucht.
Opiens een luud gerochel achter het deurtien en daornao een diepe stilte.
Harm keek in de bedstee en zee: "Ik geleuf jongs, dat het gebeurd is." Zie
gungen alle drei op de knienen en baden zes Onze Vaders en Wees Gegroeten en
sleuten of met: "Geef hem de rust, geef hem de rust, geef hem de eeuwige rust."
Zo heurde dat in een goed Rooms gezin.
Nao een toertien stilte vun Harm dat vao toch aid good veur heur west was en hie
har ja aid hard warkt. Hie har toch wal twei peerden veur de liekwaogen
verdiend. Dat vun Berend ok. “Hie möt een eikenholten kiste hebben en vanzölf
een mooi zwart fluwelen klied der op,“ vund jonge Jans. Mar doe zie naor een
toertien an het reken kwammen, schrökken zie toch aordig.
"Nou", zee Harm, "Het is winterweer, de grond is hardvreuren, ien peerd kan
oes vao ok wal trekken." "Dat is ok zo," vun Berend, "En laow ok mar een gewone
vurenholten kiste doen. Laoter wet toch gien mèens meer wat veur kiste oes vao
had hef." "Ik geleuf," zee jonge Jans, "Dat oes vao zo'n duur klied geld
verspillen zul vinden en........" Opiens een muie stem oet de bedstee: "Hol der
mar aover op jongs, ik loop der zölf wal hen!"
Waor gebeurd...
◄ weerum naor het thoesblad