NB - Op dit verhaal is gien spellingcorrectie toepast!
deur Hennie Stokker-Stadman
Hé, Henk ben ‘j thoes? ‘k Verveel me, kom deur de regen. Zul we saomen gaon
donderjaogen? Jao, maor hoe? Mien hersencellen ligt even stil. Kom deur dat ‘k
op school zoveul moet leren. Veul te veul, ‘k snap niet woar dit allemaol goed
veur is. ‘k Gao laoter toch warken ‘k wil geen meester worden! wat moet ‘k dan
met aal die onzinnige leerdingen. He, wat gao jij laoter doen Geert? ‘k Wil
fietsenmaoker worden, is mooi joh. Dan kan ‘k zulf ok lekker op de mooiste
fietsen rieden. ‘k Wil ’n fiets met heul veul kleuren. Jao, en dan ok nog met ’n
heul apart stuur d’r op. Henk, kom maor bij mij warken dan krieg je ok gekleurde
fiets van mij. Mooi man, dan kunt wij saomen fietsen maoken. En as we klaor bent
met warken kunt we saomen oet fietsen gaon. Weet je, dan kunt we Jantje en
Hennie wel vraogen of ze met oons wilt fietsen. We kunt dan ok wel wat lekkers
met nimmen op de fiets. Dan gaot we argens in ’t bos op ’n kleed zitten te
smikkelen. Chips eten en cola drinken. Hoe heet dat ok al weer? Picknicken! Dat
doet grote mensen ok vaok. Weet ie wat de groten dan ok doet? Ze geeft mekaor
dan kussies, weet ie wel waorom? Omdat ze graog poppies wilt hebben. ‘k Heb ’t
zulf heurt van oons mam. Jao, ze zee dat ’n keer tegen otie. Daorom ben ‘k ok
geboort. Snap ie! Nee, ‘k snap d’r geen donder van Geert. ‘k Heb nou geen zin om
dat allemaol oet te leggen dat doe ‘k wel as ‘j groot bent, dat zeg oons pap ok
altied.
Henk ‘k heb ’n plannegie, dat bedenk ‘k nou zo even. Zult we oonze fietsen zulf
gaon varven. Oons pap het allemaol gekleurde spuitbussen in de schuur staon. Jao,
dat is ’n goed plan Geert. Mien pap het ok wel van die spuitbussen. Zult we heul
veul soorten gaon gebruuken. Gaaf joh! Vind oons pap en mam ok vast wel mooi as
wij op gekleurde fietsen rond ried. Waor doet we dit bij jou thoes of bij mij?
Mag wel bij oons want pap het zaoterdag net de schuur opruumt. Alles is weer
netjes en daordeur heb wij nou ok weer ’n bult ruumte. Goed, maor dan gaot we
eerst even naor mien hoes de spuitbussen ophaolen. Oke, dan gaot we nog een keer
op oonze saaie fietsen. Wie ’t eerst bij mien hoes is? jao, dat doet we. ‘k Kan
lekker heul haard. Ik ok! Pas op Geert, daor staot ’n putdeksel open. Waor? Daor
an de kaant van de straot. Ohhhhhhhhhhh, donder ju wat gebeurt d’r. Au……. Holie
shit! Henk, help mij, mien fiets, mien been, mien alles en nog wat. Oh, kiek nou
toch, allemaol bloed. Potverdorie waorom gaot die putdeksel net open staon op
plek waor ‘k wil fietsen. Moei nou toch is kieken, is mien boks ok nog naor zien
grootje. Henk, zit d’r ok bloed op mien kop. Laot is zien, nee hor allen maor op
je been en je beide handen. Valt wel met hor. Je moet niet zo piepen. Weet je
wat mien mam altied zeg as ‘k mij zeer daon heb? Kom op flink wezen, stuur je
traonen vot en haol je glimlach terug. Dat moet jij ok doen Geert. Jao, jij hebt
makkelijk praoten jij hebt geen bloed en ok geen kapotte boks. Mam het veurige
week zegt dat ‘k beter op moet letten. En as ‘k nog ’n keer thoes kom met
kapotte boks dat ‘k dan allen nog maor boksen zunder piepen an krieg. Ok in de
winter hor. Weet ie wel hoe kolt of ‘t dan is? Wat stom van jou mam, jij kunt
dit toch ok niet helpen. Wij bent toch echte jongens en die ried altied haard op
de fiets. En dan kun ‘j niet alles op tied zien. Wichter, die ried allen maor
veurzichtig, die vaalt ok nooit. Maor wij, wij bent toch echte stoere donders.
Dat moet ze maor begriepen dat wel is mis kan gaon. Is jou mam dan niet kwaod as
jou boks stuk is. Nee, maor mien mam hoeft ze ok niet te maoken dat dut oons
otie wel. Oh! Is je fiets ok stuk? Even kieken, nee alles dut nog. Kom laot we
maor gauw wieder gaon. Weet je wat we doet, we gaot heul veurzichtig rieden net
as de wichter. Jao, dat doet we. He Geert nou bent we net mietjes. Jao niks an.
Kom we gaot weer knetterhaard fietsen. Een, twee, drie en racen maor. Hoi, hoi,
hoi ‘k heb wonnen. Jao, dat komp omdat ‘k blesseerd ben. Dat zal wel, maor ‘k
heb maor mooi even wonnen. Even kieken waor mien mam is. Oh, die is bij de
waslien, kom we gaot gauw naor de garage. As zo oons ziet mot ze vast weten wat
we allemaol weer doet. En dat mag niet want dan is ’t geen verrassing meer. De
fietsen moet eerst heulemaol spoten wezen en dan laot we ze pas zien. Kiek mien
pap het heul veul spuitbussen. Zult we ze allemaol met nimmen, hij het toch
genog. Even kieken of mien aole rugzak hier nog lig. Henk, hier lig e, kiek maor.
Nee, die is van mien zussie. Och gef niks dan nim we die toch met. Goed, help je
wel even om alles d’r in te stoppen. Wat gaot d’r ’n bult in, verdorie die leste
past d’r niet meer in. Jammer, dat is net z;n mooie kleur. As ‘k de dop d’r aof
haol wilt vast wel. Help is, nog even deurdrukken dan past ’t wel. Oeps, wat
gebeurt d’r. De bus maokt lawaai. Shit, mien boks is nat. Hoe kan dat? Jij hebt
op de spuitknop drukt. Nee hor, jij! Ik vuul dit toch zulf. Doe jij dat expres.
Nee, waorom zal ‘k. Omdat jou boks stuk is! nou wil jij dat ‘k ok op mien donder
krieg van mien mam. Nou, dat dut ze toch niet hor. Mien mam is hartstikke lief.
O ja, waorom mag ze dan niet zien dat we de garage in gaot. Jij mag eiglieks
heulemaol niet in de garage kommen he. Nou ik wel hor. Dat is niet zo. Jij
verzint maor zo wat Geert de Boer. Dat doe jij altied. Ik …. Nietes dat doe jij
altied Henk de Vries. Waorom nuum jij mij bij de achternaom, omdat je niet kunt
winnen! Niets, welles, nietes, welles. Ssssssssssssssssssssssst. Straks heuren
ze oons. Dan is oons geheimpie geen geheimpie meer. Hebt wij dan ’n geheimpie?
Jao natuurlijk, oonze gekleurde fietsen. O jao, is ok zo. Jao en echte vrienden
het geheimpies. Jao toch. Jao hor en wij bent toch echte vrienden. We hebt zo
wel allebei ’n heule stoere boks an. Jij hebt ’n kapotte boks en ‘k heb ’n
gekleurde boks. Stoer toch! Kom we gaot weer naor mien hoes want we moet nog
heul haard waarken. Jao, we moet van oonze fietsen echte kunstwaarken maoken.
Even kieken of mien mam nog bij de waslien is. Nee, ze is vast weer naor binnen
gaon. Kom we springt rap op de fiets en gaot naor oonze fietsenspuiterij. Jao,
kei gaaf.
Weet je, zul we oonze spuiterij “De Knalspuit”nuumen. Jao, dat is ’n mooie naom.
Past heul goed, “De Knalspuit”van Geert en Henk oet Exel. Wat zult oonze olders
trots op oons wezen. We kunt hun fietsen ok wel gaon spuiten en die van oonze
opa’s en oties’s ok. Jao, dan maokt wij ze allemaol verschillend. Hoe bedoel ie
dat? Nou as we nou is tekeningen maokt van verschillende vorms. Vorms? Jao,
dizze knipt we dan oet en plakt ze op de fiets. ‘k Begriep d’r geen snars van.
Nou, we gaot gewoon de binnenkaant oet knippen van ’n vorm. Dizze plakt we op de
fiets en spuit daor dan varf in. ‘n “Mal”heet zoiets. Hek wel is op televisie
zien. Weet je, we gaot kleine fietsies tekenen. Jao, nou snap ‘k ’t en dan knipt
we ze oet en zo hebt we oonze eigen mal. En dan gaot we ze allemaol op
verschillende manieren spuiten. ‘ t Is niet mooi as iedereen de zulfde kleur
fiets kreg. Nee, we kunt de baanden en ’t stuur ok wel gaon varven. Jao dan
maokt we bij de ene de baanden rood en ’t stuur geel en bij de aander maokt we
’n paars stuur en oranje velgen. We kunt zulf ok allerlei kleuren maoken. En we
kunt ok nog wel verschillende soorten fietsen oetknippen. Wat mooi he. Zulf
ontwarpen maoken en dan op de fiets leggen en inspuiten. Maor allen ’n fiets d’r
op is niet genog. We kunt de fiets ok wel geliek in ’n aandere kleur spuiten.Of
in verschillende kleuren, dat is gaaf. Jao, zie je t’ al. Opa op ’n fiets met
gruune baanden ’n geel stuur, rooie velgen en ’n blauwe bel. Jao en dan ok nog
met zun gekleurd fietsie van oons zulf d’r op spoten. Misschien wil oonze
meester ok wel zun fiets. Weet je, wanneer we ’t drok kriegen kun we ok niet
meer naor school. Nee, maor dat begriept oonze meester vast wel. We moet dan wel
geld gaon vraogen veur oons wark. Jao, maor hoeveul? Weet ‘k niet, jij wel? We
moet ’n optelsom maoken, dat zeg mien pap ok altied. Hoe dan? Nou gewoon. Jao,
hoe gewoon dan. Alles op ’n rijgie zetten. Wat bedoel ie nou weer. We moet
optellen wat we moet kopen. Oh, bedoel ie dat. De fietsen moet de mensen zulf
maor met nimmen. Wij koopt de spuitbussen wel. We kiekt wel hoeveul varf we
neudig hebt veur ’n fiets. Dit tel we dan bij mekaor op. O jao, wat kost oonze
mal. Niks, we hebt maor een neudig. Die kunt we aal weer gebruuken. Jao maor we
hebt wel ontwarpkosten. Tuurlijk!!! En wij dan, wat kost wij per uur?
Heuuuuuuuuuuuuuul veul. Wij bent ’n exclusief bedrief. D’r is maor een zo as
wij. Dus wij bent uniek. Papzeg altied wanneer je de enige bent dan ben je
uniek. Dus mag je ok ’n unieke pries vraogen. Jao toch! Ben ‘k ‘t met eens.
Wanneer we alles bij elkaor optelt kun we best veul verdienen. Jao en van die
verdiende euries kun we mooie dingen doen. Jao, weet je dan vraog we of Hennie
en Jantje ’n keer komt kieken bij oons in de spuiterij. Vind ze vast mooi. Jao
dan trekteer wij ze op ’n ijsco. We hebt dan toch oons eigen geld. Huuft pap en
mam dat ok niet veur oons te betaolen. Zul we oonze olders dan ok ’n ijsco
geven? Mij best. Opa en otie kunt zulf wel ’n ijsco kopen want die bent al zo
old. Jao, die hebt al veul meer waarkt dan wij dus hebt ze ok meer geld. He,
Henk waorom zit we eigenlijk hier zo an de raand van de sloot? We waren toch
onderweg naor oonze spuiterij? Jao, maor we moet toch ok saomen zaokelijk
praoten. We hebt geen kantoor zoals pap dus moet we dat hier maor doen. Je hebt
geliek, maor zul we nou toch maor wieder fietsen naor “De Knalspuit”. Strak
plan!
◄ weerum naor het thoesblad