In Memoriam Jan Tissing (* Hies 1940 - † Hies 2006)

Jan Tissing, veurmaolig streektaolfunctionaoris, is 22 augustus körsleden oet de tied kommen. Hij hef bij Drentse Taol waarkt van 1987 tot 1999. In die tied hef e nogal wat oet stro zet.

Hij hef de Drenthecursus ontwikkeld en dreei maol een groep van zu’n vieftie docenten opleid. Een koppel van dizze docenten gef nog altied de cursus die deur Jan ontwikkeld is. Hij hef wieder dreei lespakketten Drčents ontwikkeld veur ’t basisonderwies, hij hef een WP-spellingcontrole Drčents veur tekstverwerkers maokt en hij hef veurzitter west van de Federaotsie SONT (Streektaolorganisaotsies in het Nedersaksische Taolgebied).

Jan Tissing hef altied en overaal zien best daon om ’t Drčents in de beeinen te holden. Hij sprak elkeneein an in zien eigen Drčents (Rune) en zag dan wel hoou wied of e kwam.

Jan kun mooi vertellen, hij hef een koppel lezings geven in ’t Drčents van Rune, zien mooudertaol. In die lezings bruukt’e vaok veurvallen oet zien eigen leven. Zo verteld’e vaok ’t verhaol dat e ’n maol neugd wör deur de baank veur een gesprek. Hij preuit vanzölf Drčents tegen de baankmetwarker en die verstun dat best. Ze kregen ’t over spaoren en Jan zee dat de baank toch eigenlijk maor bar weinig rente gaf op spaorrekens. “Oh, dat kan wel aans,” zee die jong van de baank en hij leuit een folderie zeein over spaoren. “Met tillefoonspaoren kriej een haalf percent meer,” zee e, “za’k je een formuliertie ophaolen, dan kuj ’t daolijk invullen. “Ja, ho ies even”, zee Jan Tissing en hij wees op het woordtie internetsparen, “Wa’s dat dan.” “Oh, da’s internetspaoren”, zee e. Jan keek hum even an en zee: “Oh, ik bin zestig jaor, ik praot Drčents, dus za’k van internet wel gien verstand hebben?” Die jong daacht even nao en zee: “Ik dčenk da’k vanmörgen wat leerd heb.”

Jan Tissing prissenteerde Strunen in ’t vrije veld in ’t programma Mandielig van Marga Kool bij Radio Noord en Wij leest veur en Rondum taol bij Radio Drenthe. Hij hef metwaarkt an Poëzie van hunebedden; een cultuurhistorische benadering (1996) en hij hef een koppel stukkies schreven over Drčentse schrievers in ’t maondblad Drenthe. Jan Tissing was ok de saomensteller van ’t Drents zakwoordenboek. Van dat booukie binnen zowat tiendoezend verkocht.

In 1999 is Jan met ’t waark oetscheid, mor ok daornao hef e zien best daon veur ’t Drčents. Hij was een jaor of wat jurylid bij ’t Drčents Dictee, hij zat in de neie spellingkemissie en hij hef Drčentse teksten van Drčentse schrievers naokeken. Hij hef een koppel lemma’s schreven veur de Drčentse encyclopedie en veur Stichting Drčntse Taol hef e van ’t veurjaor nog ’t verneide cursusboouk Rune verbeterd.

Veurdat Jan Tissing an ’t waark gung as streektaolfunctionaoris hef e van 1961 of onderwiezer west op verscheiden steden. Eerst in Echten, laoter hef e hoofd west van de schooul op Stoefzaand en op Zuudwolde. Van 1979 tot 1987 hef e didactisch metwarker west bij de Schooladvies- en -begeleidingsdienst Drenthe (SABD). Hij hef metschreven an een topografiemethode en tweei leesmethodes veur ’t basisonderwies.

Jan hef ok altied bestuurlijk actief west. In de natuurbeschermingsvereniging op Zuudwolde, de Vereniging tot Bevordering der Bijenteelt in Nederland en de Stichting Vrienden van de Ruiner korenmolen ‘De Zaandplatte’.

Jan Tissing was trouwd en had een zeun en een dochter.
Stichting Drentse Taol wčenst zien vrouw, kinder en kleinkinder veul starkte met ’t verwarken van ’t verleeis. De Drčentse taolwereld zal hum missen.

◄ weerum naor het thoesblad