Old Neis 2005 : klik hier

▼Old Neis 2004

Nei bestuurslid 23-12-04 Binnen het bestuur van Drentse Taol hef een wisseling plaots vunden. Miny Hofsteenge is dermet stopt en Stieneke Boerma hef heur plaots inneumen. Miny Hofsteenge hef van 1987 bestuurlijk actief west veur Drentse Taol. Zie volgde indertied Klaas Kleine op. Een schiere staot van dienst dus.
Miny stopt, umdat het wal goed is dat der nao zoveul jaor een aander veur heur komt. Boetendes hef ze het praktische prebleem, dat ze gien auto redt en het bezuken van de bestuursvergaoderings in de aovenduren in Assen is met het openbaar vervoer te doen, maor wal bar umslachtig. In ’t verleden kun ze aaid metrieden met Aimé van Reydt, maor die is deur verhoezing naor België ok stopt as bestuurslid. Zien vacature is nog niet invuld, maor we hoopt veur hum binnenkört ok een neie te hebben.Stieneke Boerma hef u.a. metwarkt an de streektaolspecialisaotsie op pabo ‘De Eekhorst’, samen met Rouke Broersma en Gerard Nijenhuis. Met Rouke Broersma hef ze ok ‘Drèentse Schrieverij’ schreven. Zie wet al met al een hiele bult over de streektaol. Beroepsmaotig hef ze een staffunctie op het Noorderpoortcollege in Stad. Zie woont in Olde Meul (Oude Molen).

Prissentaotsie videopetretten Bonnie Veendorp en Gerrit Kuipers 16-12-04
		De prissentaotsie van de videopetretten van Gerrit Kuipers en Bonnie Veendorp dinsdag 9 november in de Wemme in Zuudwolde was heul mooi. Beide schrievers waren slim bliede met ’t petret dat Albert van heur maokt had. De neugde bezeuikers waren ok te spreken over ’t waark dat Albert Haar van RikRak Communications daon had. ’t Eerste exemplaor van beide video’s gung naor old-dippeteerde Jan Hollenbeek Brouwer. Beide schrievers hebben wezen op ’t belang van dizze politicus veur de Drèentse cultuur. Hij hef veul oet ’t stro zet. De veurmaolig dippeteerde van cultuur heuil een toouspraok in zien mooudertaol, ‘t prachtige Veenkoloniaols van Valthermond. Albert Haar is in de maande met de redactieleden Lukas Koops en Henk Nijkeuter en Stichting Drentse Taol alweer gaangs met de veurbereidings veur de volgende tweei petretten. Tweei schrievers die in de jaoren ’80 begonnen binnen met schrieven, Rieks Siebering en Jan Veenstra.
De video’s en DVD’s van dizze Drèentse schrievers binnen te koop veur € 20,= ‘t stuk, exclusief verzendkosten, maor je muggen ze ok bij oous ophaolen. Je kunnen oous bellen of mailen Stichting Drentse Taol 0592-381173 of e-mail drentsetaol@pbcdrenthe.nl.

Concept-Cultuurnota 25-11-04

De concept-Cultuurnota 2005 – 2008 van de previncie Drenthe met as titel ‘De kunst van het combineren’ is der in november kommen. Op veul steden hej derover lezen en heuren kund. Aj dizze conceptnota zölf lezen wilt, kuj terecht op de webstee van de previncie: www.drenthe.nl. Lees wieder.
 

Krummels lespakket 10-12-04 Op legere schooulen in Drenthe wordt al jaoren gien structureel aandacht besteed an ’t Drèents. Stichting Drentse Taol is ’t daor vanzölf niet eeins met en daorom perbeer wij der wat an te dooun. Lees wieder.

 

Roel Reijntjes-tentoonstelling in Drents Archief 04-11-04 Al is e in 2003 oet de tied kommen, de Drèentse dichter Roel Reijntjes blef in ’t middelpunt van de belangstelling staon in Drenthe. Hij kan tevreden omdeelkieken, we binnen hum nog niet vergeten. Nog maor een maond leden is de eerste Roel Reijntjes-pries oetlangd an Wim Hidding, en noe is op vrijdag 29 oktober in de Kloostergang in ’t Drents Archief een tentoonstelling opend deur schriever en dichter Gerard Nijenhuis over hum met de naom: Roel Reijntjes, dichter an de Beilerstroom. De tentoonstelling is te zeein van 30 oktober of tot 14 jannewaori 2005. Drents Archief hef ’t persoonlijke archief van Reijntjes kregen. Dat, der binnen manuscripten van hum te zeein, een deeil van zien bibliotheek, zien breeiven an collega’s. Drentse Taol hef der ok nog an metwaarkt. Een heule koppel persoonlijke breeiven van Roel Reijntjes zaten bij oous in ’t DLD en die heb wij beschikbaor steld an ’t Drents archief. ’t Is de muite weerd om der ies even hen te gaon!

 

		Deuren lös groot succes 02-12-04 Meer as dreeihonderd man hebben der zaoterdagaovend 12 november in Meursinge in Westerbörk bij de culturele aovend van Drentse Taol en Drentse Boek west. De aovend weur lös daon deur bestuurslid Klaas Koops, waornao Jans Polling ’t volk vernuverde met zien kiek op de tooukomst van ’t Drèents. Daornao much ’t Uffelter Mannenkoor heur zangkunsten heuren laoten. Van haalf negen of kunden de bezeuikers tweeimaol kiezen oet veer verschillende pregramma’s. Lees wieder.

 

Viefentwintig jaor Roet 04-11-04 Zaoterdag 30 oktober is in Zuidveld de blooumlezing '25 jaor Roet' prissenteerd. Mister Roet, Martin Koster, hef de leste maonden aal olde Roetnummers deurlezen. ’t Beste hef een plak kregen in ‘t booukie en ’t risseltaot mag der weden. Een mooi boouk, waor je je een stuk of wat haarfstaovends met vernuvern kunnen. Lees wieder.

Vertaoling van een Drèents gedichie 26-10-04

Ingmar Roerdinkholder schref wel ies een Drèents gedichie. Die binnen te lezen op oouze webstee: Schrieverij / Schrief ’t ies op. Aj hier klikken kuj ‘t gedichie Lieksteeën lezen in een paor taolen.

Ingmar zit op ‘t internet sinds kört ok bij de Lowlands-groep van Reinhard/Ron Hahn, ‘n Duutse Amerikaon die veul mit Nedersaksisch en aandere taolen en dialekten döt. En toen hef e Lieksteeën doar hen stuurd as veurbeeld van Nedersaksisch in Nederland. Ze vonden ’t heul mooi, want ze hebben ‘t nou al vertaold in ‘t Engels, Duuts, Nederduuts, Jiddisch, Zuud-Afrikaons, Mölmsch en Schots!

Zul der een Drèents gedicht weden die in meer taolen vertaold is as dizze? Wij binnen beneid.

Gedicht Suze Sanders miljoenen keren ofdrukt 28-09-04 De bekende Drèentse dichteres Suze Sanders hef een hiel biezundere wedstried wunnen. Een gedicht van heur wordt miljoenen keren ofdrukt op het strand van Vlieland (en ok net zo vaok weer oetwist). Lees wieder.

Drenthecursus veur femilie Biewenga 21-09-04
		Het gezin Biewenga is een zettie leden in Uffelte kommen wonen. Zie hebt heur hoes kocht bij Schelhaas Makelaardij, die nei-Drenten in zu’n geval een Drenthecursus kedo döt. Wij vindt dat aordig schier van de Hoogeveense makelaar. Maor lu, vergis je niet… de Drenthecursus is der niet allén veur de neie inwoners van oeze previncie. Ok veur lu die heur hiele leven al Drèents proot, is de Drenthecursus gloepens interessant. Zeker de helft van al oeze cursisten is old-Drent. Zie bint over ’t algemien dik te spreken over de lessen over de taol én de cultuur van Drenthe.

As Drent binj altied stoned… 24-08-04 ‘As Drent binj altied stoned umdaj tuschen hunebedden woont’ dichtte Egbert Hovenkamp. Een ‘grinnikding’, zoas Egbert het zölf nuumt. Het Nationaal Hunebedden Informatiecentrum hef dit glopens schiere gniezertie op een T-shirt zetten laoten. Daor is het ok te koop. Binnenkört komt het op meer plaotsen in de handel. Tweetaligheid leidt tot betere mentale prestaties 24-08-04 Wat wij bij Stichting Drentse Taol al laang weeiten is noe ok weer ies bleken oet een onderzeuik van Ellen Bialystok, hoogleraar cognitieve psychologie aan de York University in Toronto. Tweetaligheid heeft een positief effect op bepaalde cognitieve vaardigheden. Lees wieder.

Underwiezersdag Aa en Hunze 24-06-04

De lesgevers van de openbaore schoelen in de gemiente Aa en Hunze hadden woensdag 16 juni heur jaorlijkse gezaomenlijke dag. Drentse Taol gef ok lezings en prissentaotsies en de veurbereidingsgroep vun een streektaolinvulling van een dagdiel wal zinvol. Drentse Taol vanzölf ok. Beide partijen hebt het bliekbaor as zinvol ervaoren. Underwiesambtenaor Joop Velthuis bestelde nao de lezing spontaon veur alle schoelen het op staopel staonde lessenpakket ‘Krummels’. Dát en het spontaone applaus meuken de metwarkers van Drentse Taol bliede!

Consulentschap Basisunderwies 24-06-04

Zes consulenten van Drentse Taol, naomelijk Ria Zantinge, Jan Boelens, Willy Vugteveen, Geesje Hoving, Jan Kooi en Jettie Drewes-Ploeg, hebt het schoeljaor 2003-2004 vieftig basisschoelen in oeze previncie bezöcht.

Met naome TV Drenthe hef der een paor keer vrij negatief over bericht (vunden wij, maor wij bint vanzölf ok niet objectief). De schoelen zulden der niet warm veur lopen en kinder wolden der al hielemaol niet an.

De consulenten kwamen met hiel aandere verhaolen de schoelen oet: zowal kinder as lesgevers waren over ’t algemien positief en enthousiast. Och en vieftig schoelen is zu’n beroerd aantal toch ok weer niet. Zoas de Drent met gevuul veur understatement zeg: “’t Kun minder.” Lees wieder.

Harrie Popken en Geerhard Gras Op Naober Pad 10-06-04
Vanof zundag 6 juni hebt Geerhard Gras en Harrie Popken de wandelschoenen weer an. Zie volgt veur het Radiopregram ‘Op Pad’ het 380 kilometer lange Naoberpad. Underweg kriegt ze zunder twiefel hiel wat varianten van het Nedersaksisch te heuren. Aj dervan metgenieten wilt: aal zundagen van kwart over twaalf tot ien uur op Radio Drenthe. Lees wieder.

Het Noord Nederlands Orkest op de streektaoltoer 25-05-04
		Het is vanzölf zo logisch as ’t maor kan, dat het Noord Nederlands Orkest het Fries, Grunnings en Drèents niet verget. In de meertmaond van 2005 gaot ze der echt wark van maoken. Maor… aj metdoen wilt an de liedtiesschriefwedstried moej der véúr september bij wezen. Lees wieder

Drentendag groot succes 27-04-04

De Drèentse vereeinings in Nederland hebben zaoterdag 24 april heur tweei-jaorlijkse Drentendag had in Partytown in Assen. Een kleine veerhonderd Drenten oet bijveurbeeld Enschede, Amsterdam en Steenwijk kwamen zaoterdag 24 april terug naor d’olde Lantschap om ies even as Drenten onder mekaor te weden. Lees wieder.

Neie docenten Drentse Taol 20-04-04 Op 19 april körsleden kregen virtien neie lesgevers van Drentse Taol heur docentendiploma oetlangd deur de veurzitter van de stichting, Koob Schelhaas. Lees wieder. ► Foto's 20-04-04

‘Bericht van Jacobus' in het Drèents 18-03-04 Zaoterdag 13 meert körsleden zat de kerk van Raol (Rolde) tegen een uur of veer aordig vol. Zu’n 120 mensen wolden de prissentaotie van het ‘Bericht van Jacobus’ geern bijwonen. Lees wieder. ► Foto's van de prissentaotie 08-04-04 ► Jacobus zien bericht an het Drèentse volk 15-04-04

Bart Meursing en de kunstbende 23-03-04 Bart Meursing hef met zien Drentstaolige verhaol ‘Het diefie’ de tweide pries wunnen in de categorie ‘Taal’ tiedens de Drentse veurronde van de Kunstbende 2004. Bart hef een zulvern röt kregen, mag metdoen met de toernee ‘Het zit geramd’ (zes optredens verspreid over Drenthe) en hef twei vrijkaorten kregen veur de Nationale Kunstbende in Utrecht. Mooi wark, Bart! Schiere Streektaoldag in Emmen 11-03-04 De streektaoldag in de bibliotheek in Emmen van zaoterdag 6 meert is schier verlopen. Der was aordig wat belangstelling veur de veurdrachten van Erik Harteveld en Johan Veenstra, de zang svan Lucinda en Christiaan, Klaas Spekken en de Fiebeldekwinten. Lees wieder.

25 meert: Meertaolige gemienteraodsvergaoderings 18-03-04

Je kunt zingen, schelden, je geliefde zute woorden influstern, vluken enz. in het Drèents. Je kunt die taol vanzölf ok op bestuurlijk gebied gebroeken. De gemienteraoden van Noordenveld en Börger-Odoorn holdt op dunderdag 25 meert meertaolige gemienteraodsvergaoderings. Wij bint daor wies met, want zie geeft hiermet overdudelijk an dat streektaol op alle niveaus gebroekt worden kan.

'Drentse Taol ook op web gemoedelijk en onderhoudend' 11-03-04

Uit: Dagblad van het Noorden, dinsdag 9 maart 2004. (Let op! Gescand artikel: 65,35kB)

Spreekbeurt over de Dreentse Taol 02-03-04

Een maond leden kwam de 12-jaorige Hendrik Sikkema met zien mam bij Stichting Drentse Taol. Hendrik (of Henderk op zien Drèents) zit an de legere schooul in Hogersmilde (CBS De Vaart) in groep aacht. Aal kinder moeten daor een spreekbeurt holden en Hendrik wol ‘t geern dooun over ’t Drèents. Hij kwam bij oous om materiaol. Jan Germs hef hum flink wat paperassen metgeven. Hendrik kun best wies worden oet de grote hoeveulheid infermaotsie over ’t Drèents. Haalf febrewaorie was ’t zo wied, toen mus e veur de klas. Hendrik hef zien klasgenoten alles verteld over ’t Drèents. Van de meester kreeg e een achtenhaalf veur zien spreekbeurt. Hulde veur dizze jongeman, hij lat blieken dat e haart hef veur ’t Drèents. As der meer kinder binnen die een spreekbeurt holden willen over ’t Drèents of over de Stichting Drentse Taol, dan kunnen ze bellen met 0592-381172.

Krummelwarkzaomheden gaot deur 02-03-04

Deur de ofwiezing van oes subsidieverzuuk deur de Advieskemissie van het Actieprogramma Cultuurbereik van de previncie kwam de productie van oes lessenpakket ‘Krummels’ op de tocht te staon. Gelukkig kuw toch deurgaon. Lees wieder. Meertmaond-streektaolmaond 02-03-04 Een maond lang stiet de streektaol extra in de belangstelling in het hiele Sont-gebied. Een beste flot activiteiten vindt der dan ok plaots. Hiel veul van wat der gaonde is, kuj lezen in de meertmaondagenda die Drentse Taol saomensteld hef. Die lig bij de bibliotheken in oeze previncie, maor kuj ok vinden aj wieder leest.

	Feestelijke opening webstee Taolpaddrenthe.nl 03-02-04 Dinsdag 3 febrewaori körsleden is de webstee www.taolpaddrenthe.nl lös daon. Je kunt het zien as een gruibriljant: der zal constant an de webstee warkt worden. Het begun is der met acht schrievers en eerste quisvraogen. Maor der komt nog veul meer. TaolpadDrenthe is een mandielig initiatief van Het Drentse Boek en Drentse Taol.
		Lees wieder.
		Openingstoespraok Jan Germs

Drèents op schoel 27-01-04 Zu’n virtig schoelen doet met an het geven van Drèents op schoel en wordt of bint bezöcht deur ien van de consulenten van Drentse Taol. De Openbare Basisschoel Bonnen is ien van de underwiesinstellings die metdöt. Boetendes is daor ok veurlezen in de streektaol tiedens het ‘Nationaal Voorleesontbijt’ van dinsdag 27 jannewaori. As veurlezers waren Margriet Benak van RTV Drenthe en Jan Kooi, Abel Darwinkel en Jan Germs van Drentse Taol der.

 

Peter van der Velde overleden 26-01-04 Op zaoterdag 24 jannewaori van dit jaor is Peter van der Velde oet de tied kommen. Een paor jaor leden weur e tröffen deur een beroerte, die e nog weer redelijk te boven kwam. Maor in mei 2003 kreeg e nogmaols een harsenbloeding. Peter sleug zuch der bewondernswaordig deurhen, maor de tied hef hum dus toch inhaold. Drenthe verlös in hum een begenaodigd schriever en een veurvechter van (zuver gebroek van) oeze streektaol. Peter van der Velde is 85 jaor worden. Lees wieder.

 

Bart Veenstra en Roel Reijntjes op petret 13-01-04 De prissentatie van tweei videopetretten van Bart Veenstra en Roel Reijntjes in ’t Maotie in Gasselt op vrijdagavond 19 december 2003 was slim nuver. De lu die der bij waren, hebben beide petretten in zien geheuil zeein en elk en eein was ’t er over eeins dat beide schrievers een schier videopetret kregen hebben. Lees wieder.

 

Lezing 'Dieper deur Drenthe' 06-01-04 De Historische Verieniging Zweeloo gef op dinsdag 27 jannewaori in hotel Hegen in Wezup, in saomenwarking met Drentse Taol, de lezing ‘Dieper-deur-Drenthe’ met as undertitel ‘Continuïteit in Bewoning, Graanverbouw en Taal, van prehistorie tot 1412’.   Lees wieder.

▼Old Neis 2003

Prissentaotsie videopetret Gerard Nijenhuis 18-11-03

In 2001 weur de pilot over Peter van der Velde prissenteerd. Daornao is der weer een bult tied verloren gaon, maor noe hebben we de gang derin. Zaoterdag 8 november weur het videopetret over Gerard Nijenhuis prissenteerd in de kerk van Geeiten. Een kleine honderd man was der getuuge van. Lees wieder.

Bezuuk kemissie Cultuur en Welzijn 07-10-03

Woensdag 1 oktober hebt Het Drentse Boek en Drentse Taol bezuuk had van de kemissie Cultuur en Welzijn van de previncie. Van twaalf tot twei haw een soort van warklunch, waorin de streektaolorganisaoties heur warkzaomheden oet de doeken daon hebt. Roel Kuper zörgde veur de eterij: mosterdsoep, broene bonen met slaot en soepenbrij met stroop. Alles oet hetzölfde bord met dezölfde lepel. Zowal de informaotie as ’t eten gung der goed in.

In het spoor van de Hunebedbouwers 07-10-03
		Drentse Taol hef metwarkt an het project “In het spoor van de Hunebedbouwers” op een zestal basisschoelen in de gemiente Börger-Odoorn: Valthermond (“Oost” en “De Aanloop”), Klijndijk, Valthe (“Linderakkers”), Odoorn en Ees. DrentseTaol zörgde veur de “taolige” invulling: veurlezen en meziek maoken in de streektaol.

Drentse Taol in het underwies 07-10-03

Het weekende van 4/5 oktober begunde wat beroerd veur Drentse Taol. Het consulentschap kwam vrij negatief in de media naor veuren. Da’s jammer, want wij zit feitelijk aordig schier op schema. De schoelen die al deur de consulenten bezöcht bint, reageert enthousiast. Ok kinder van schoelen waor Drentse Taol in een aander verbaand komt, bliekt het Drèents zo raor nog niet te vinden.

Wij moet het maor zien as een communicaotiesteurnis tussen RTV Drenthe en Drentse Taol. Op pabo ‘De Eekhorst’ lat Drentse Taol trouwens ok zien neus zien en gef daor gastcolleges.

Oeze neie metwarker is begund 09-09-03 Oeze neie metwarker Abel Darwinkel is begund. Abel hef het Noordenvelds as moedertaol en dizze streektaol is bij hum nog slim levend. Abel is geboren in 1968 en hef under andern studie daon op het gebied van Romaanse taolen en culturen en Algemiene Literatuurwetenschappen. Zien beroepsmatige warkzaomheden tot dusver lagen veural op het gebied van de journalistiek. In augustus is Abel al verschillende maolen bij Drentse Taol west um zuch een bield van de organisaotie te vörmen, maor nou mag e echt an de bak. Veurlopig warkt Abel op dinsdag, dunderdag en vrijdagmörgen. Aj hum rechtstreeks an de lien hebben wilt, moej (0592) 381173 bellen.

 

Jans Jeuring en Geert Kocks overleden 12-08-03 De ofgelopen vekaansieperiode bint twei belangrieke mensen oet de wereld van de Drentse taol oet de tied kommen. Half juli overleed Jans Jeuring oet Börk. Jaorenlang hef Jans metdreid in de warkgroep Kerkdiensten van Drentse Taol en tot an zien dood was e daor veurzitter van. In hum is een lieve, aimabele man hengaon. Wij wenst de femilie vanzölf veul starkte toe. Op vrijdag 8 augustus overleed dr. Geert Kocks,  de saomensteller van het Woordenboek van de Drentse Dialecten. Daornaost hef e een groot aantal publicaoties op zien naom staon, hef e met an de basis van de Drentse spelling staon en kan e zunder overdrieving beschouwd worden as een grootheid in het Nedersaksisch taolgebied. Vanof de deurstart van Drentse Taol stun Geert aaid met raod en daod klaor en was een belangrieke steun op de achtergrond. Wij zult hum missen en wenst Toos en de kinder veul starkte. Aj meer over Geert Kocks lezen wilt, kiek dan hier.

Consulentschap basisunderwies 15-04-03

Het is de bedoeling dat consulenten van Drentse Taol dit naojaor en in ‘t begun van 2004 zestig basisschoelen in oeze previncie bezuukt um meer te vertellen over de streektaol. Zie nimt lesmateriaol met en het is de bedoeling dat meesters en juffen zölf ok ies wat aandacht besteed an de streektaol: een lied, een verhaol, een gedicht, een woordenschatoefening of wat dan ok. Niet hiel stoer, niet een vracht wark die der ok nog ies weer bij komt. Wal een verrieking.
Schoelen die denkt: “Dat is misschien wal wat veur oes, kunt alvast wal ies contact opnimmen met Drentse Taol.”

Warkgroep Liedteksten 22-05-03

Een groepie mensen zul het aordig schier vinden as der meer artiesten komt die streektaolmeziek maokt. Het zul dan vanzölf ok niet zo gek wezen as de meziek van dizze lu ok veul te heuren is, as ze zölf teksten schrieven kunt, as ze spiegelplaoties maoken kunt enzowieder. Frans Westenbrink, Albertien Klunder, Ab Drijver, Eite Brink, Jan Kruimink, Egbert Meijers, Bea Lunsche en Jan Germs hebt de koppen bij mekaor steuken um te kieken of ze der wat an doen kunt. Wij laot je der wal meer van heuren. Kiek ok ies op de webstee www.drenthecentraal.nl, de prachtige webstee van Ab Drijver. Hierop stiet u.a. een liedtekstenbaank. Wij neugt je oet je eigen liedteksten an Ab an te levern.

Taolwetenschappelijk underzuuk 13-05-03

Drentse Taol hef de leste jaoren niet veul doen kund an taolwetenschappelijk underzuuk. Verleden jaor hew een schier, veerjaorig plan opsteld op dit gebied. Saomen met pabo ‘De Eekhorst’ wolden wij dit graog an de vörk steken. De previncie, die veur de neudige gelden zörgen mus, kun in ‘t begun het juuste pottie niet vinden. Maor… het liekt derop daw nou toch reur kunt. De kemissie Welzijn en Cultuur hef het veurstel van Gedippeteerde Staoten um geld veur het eerstre jaor van dit plan beschikbaor te stellen (€ 38.170,00) van een positief advies veurzien.

Jammer is ‘t nou wal dat de man, dr. Henk Nijkeuter, die de spil van dit underzuuk bij de pabo wezen zul, daor per 1 juni vertrekt. Binnenkört herstart we het overleg met de Eekhorst um toch een goeie invulling van dit wezenlijke underdiel van het wark van Drentse Taol te vinden.

Contract videopetretten tiekend 13-13-05-03 Maondag 12 mei was een historische dag: het contract um een serie van tien schrieverspetretten op video en DVD te gaon maoken weur toen tiekend. Albert Haar van RikRak Communications en Frits Gerrits (sikketaoris/penningmeester van Drentse Taol) zetten heur handtiekening. Daormet giet een taomelijk uniek preject van start. In ‘t verleden bint der wal ies zukke petretten maokt, maor dan gung het aaid um ien of twei. Veur het eerst wordt der nou een hiele serie maokt. Behalve veur de archivering wordt de petretten in de toekomst gebroekt veur het underwies, cursuswark, oetlien in bibliothieken, oetzending RTV Drenthe, internet enzowieder. Lees wieder.

Roel Reijntjes overleden 22-04-03

Zaoterdag 19 april körsleden is Roel Reijntjes overleden. De leste tied gung het met zien gezondheid al wat minder. Aal vaoker mus e ofspraoken veur optredens ofzeggen. Roel Reijntjes is tachtig jaor worden. Dunderdag 24 april is Roel in Beilen begraoven. Met hum is ien van de grootste dichters van Drenthe hengaon. Understaond gedicht komt oet ‘Mien liefste, ach wat is met mij’ (Het Drentse Boek - 1993). Aj meer weten wilt over leven en wark van Roel Reijntjes moej even wieder klikken.

Drents Dictee 2003 01-04-03

Het Drents Dictee 2003 zit er weer op. Viefentwintig dielnimmers hebt heur best daon op 14 zinnen in het dialect van Diever. Gemiddeld meuken ze 21 fout. Winnaor weur dit maol Klaas Koops (7 fout), die Heide Broers (8 fout) en Wim Oosting (10 fout) net veur bleef. Grietinus Harms har met 50 fout de poedelpries. Veur de complete oetslaogenliest, foto’s en het dictee van dit jaor: Lees wieder.

Gemienteraodsvergaodering in Emmen 20-03-03

Op 27 meert vergaoder de de gemienteraod van Emmen. In tegenstelling tot Hoogeveen deden ze ‘t daor allèn maor in oeze standaordtaol. Toch kregen de raodsleden van Emmen dizze aovend wat Drèents te heuren, want Jan Germs kreeg an ‘t begun van de vergaodering een minuut of tien spreektied . Hij heul een pleidooi veur de streektaol. Burgemeester, raodsleden en wetholders kregen het Drèents zakwoordenboek.

Opiniepeiling 18-02-03

In opdracht van RTV Drenthe hef ‘Aha! Marktonderzoek en marketingadvies’ van 11 t/m 13 febrewaori een representatieve steekproef van 750 Drenten van 18 jaor en older weer een flot vraogen steld. Dit gebeurt wekelijks tot an de verkiezings van 11 meert ankommend. Elke maol wordt der vraogen stelt over de verkiezings en elke week wordt der ok vraogen steld over wisselnde underwarpen. Dizze week weurden der vraogen steld over de streektaol.
Aj de oetslaogen bekieken wilt moej maor ies wieder lezen.

Hoogeveense gemienteraodsvergaodering ok in ‘t Drèents 06-03-03

Op 27 meert  vergaoderde de gemienteraod van Hoogeveen weer. Alle leden van de raod hebt van het presidium bericht kregen dat ze ok Drèents praoten muchen. Wij bint hier wies met. Het lat zien dat het presidium het met Drentse Taol iens is en vindt dat de streektaol meer is as allèn maor de taol van borrel, kroeg en straot. Ok op bestuurlijk gebied kuj met het Drèents best oet de voeten. Wij hoopt dat veul raodsleden in Hoogeveen van de meugelijkheid gebroek maoken zult.

Landelijke dialectendag 27-03-03

Zaoterdag 22 meert was veur de zeuvende keer de landelijkedialectendag. Dit maol in Middelburg. De Stichting Nederlandse Dialecten har eer van heur wark. “Het har wal minder kund”, um het maor ies op zien Drèents te zeggen. Boeiende sprekers (Johan Taeldeman, Driek van Wissen, Gerard Rooijakkers), een interessant zeuvende dialectenboek ('’Aan taal herkend – Het bewustzijn van dialectverschil”), veul warkwinkels, rondleiding deur Middelburg, taofels met allerhaande informaotiemateriaol, veul boeken en schiere optredens (u.a. Frank den Hollander, Peter de Haan en Alida Kiers oftewal de veurmaolige ‘Bende van Baflo Bill’).

Drentse Taol zöcht enthousiaste consulenten 06-03-03

Het Drentse Boek en Drentse Taol hebt een mandielig plan ontwikkeld. Ien van de underdielen van dit preject is het bezuken van 60 basisschoelen in oeze previncie. Consulenten gaot op die schoelen vertellen over streektaol, over de weerde dervan veur de mensen in ‘t algemien en schoelkinder in ‘t biezunder en draogt lessuggesties en –materiaol an. Oetdaogend wark! Aj de streektaol een warm hart toedraogt en denkt dat zu’n consulentschap misschien wal wat veur je is: lees wieder.

Optredens Meertmaond 2003 14-01-03

Meertmaond is in streektaollaand ‘dialectmaond’. In het hiele Nedersaksisch taolgebied stiet het in de lentemaond nog ies extra bol van de activiteiten. In Drenthe is der een hiele flot te beleven op het gebied van de streektaol. Lees wieder

TOP- 48 van Streektaolmeziek 13-02-03

Woj meer inlichtings: Bart Nijstad (streektaolmetwarker van Radio LOEP) Tillefoon: (050) 3093842 Lienpost: bartnijstad@hotmail.com

Concretiseringsunderzuuk Sont 20-03-02
Mevrouw drs. Daisy Vliegenthart oet Den Haag is gangs west met het ‘Concretiseringsonderzoek erkenning Nedersaksisch deel lll’. Zoaj wallicht weet (en op een aandere plek op oeze webstee ok wal lezen kunt) wordt het Nedersaksisch erkend under diel 2 van het ‘Europees Handvest veur regionale talen of talen van minderheden’.
Erkenning under diel lll stiet hoog op het prioriteitenliestie in het Nedersaksisch taolgebied, maor die kriej niet cadeau. Een streektaol mot an hiel wat veurweerden voldoen um erkend te worden under diel lll. Daisy Vliegenthart hef de stand van zaoken in kaort bracht. Zie hef praot met mensen van de streektaolinstituten in het Nedersaksisch taolgebied, met ambtenaoren van de previncie, politici en met deskundigen. Heur bevindings hef ze vastlegd in het rapport ‘Koesteren van een cultureel erfgoed’. Vrijdag 10 jannewaori hebt lu van de verschillende streektaolorganisaoties en previncies oetgebreid praot over het rapport. De algemiene conclusie was, dat het der goed oetzöt. Hier en daor zal Daisy Vliegenthart nog wat toevoegen en aanpassen en dan kan het definitieve rapport binnenkört openbaor maokt worden en kunt zowal de landelijke as de regionaole poletiek der kennis van nimmen. Lees wieder

Streektaol belangriek in de Drèentse poletiek?15-02-03

In de verkiezingspregramma’s van de mieste Drèentse partijen nimt de streektaol gien grote of hielemaol gien plaots in. Wij trapt een lösse deur in aw zegt daw dat jammer vindt. Een beetie ofguunstig biw dan ok wal op oeze Grunneger buren, waor partijen as PvdA en CDA de streektaol wal prominent opneumen hebt in het verkiezingspregram.

Een tied leden hef Drentse Taol enquêteformelieren stuurd an poletieke partijen in Drenthe. Wij waren wal ies neisgierig naor de holding ten opzichte van en de belangstelling veur de streektaol. 38 (kandidaot-)staotenleden hebt de muite neumen het pepier in te vullen en an oes weerum te sturen. 53 % van heur prat dialect en maor 21 % vindt de streektaol belangriek genog um ok in het underwiesaanbod van schoelen opnimmen te laoten. Lees wieder.

Niks veraanderd 14-01-03

Bovenstaond tegelie oet lang vervleugen tieden toont an dat der niet zo veul veraanderd is.

Enquête under Drèentse staotenleden 21-01-03

Dinsdag 11 meert bint de verkiezings veur de provinciaole staoten. Veur de Stichting Drentse Taol en de streektaol in zien algemienheid bint die staoten van groot belang en wij bint dan ok meer as ‘n beetie neisgierig hoe belangriek de staotenleden de streektaol vindt. Wij hebt daorum een kleine enquête under de staotenleden in gang zet. CDA, OPD, Drents Belang, VVD, D'66 en de heer Schaap van de PvdA hebt al reageerd. Wij hoopt binnenkört op nog meer reactie. De risseltaoten van dit kleine underzuuk kuj binnenkört op oeze webstee lezen.
Aj weten wilt welke vraogen wij (in oeze standaordtaol) an de staotenleden steld hebt, moej even wieder kieken.

◄ weerum naor het thoesblad