Het Huus van de Taol hef verlet van een administratief metwarker (m/v)

Huus van de Taol
Het Huus van de Taol is een stichting, die gangs is met de streektaol in de previncie Drenthe en hef as doel het anfietern van het actief en passief gebroek van het Drèents in de miest briede zin van het woord. Het Huus van de Taol wordt subsidieerd deur de Provincie Drenthe en voert het beleid oet dat de previncie in heur cultuurnota opschreven hef. Der wordt wark verzet op de terreinen taolpremotie, underwies, schrieverij, meziek en taolwetenschap.

Oetgeverij Het Drentse Boek is underdiel van het Huus van de Taol. De tiedschriften Roet en Oeze Volk hebt een zölfstandige redactie, maor wordt oetgeven deur het Huus van de Taol. Het Huus van de Taol gef ok De Taolkraant oet.

Körte veurgeschiedenis
Het Huus van de Taol is een samenvoeging van de stichtingen Oeze Volk, Het Drentse Boek en Drentse Taol. An ’t begun van meert van dit jaor is het echte samengaon een feit en wordt der begund in Beilen in een pand met een spiksplinterneie indieling en inrichting.

Inhold van de functie
De neie metwarker bemenst de receptie van Het Huus van de Taol / Het Drentse Boek en döt administratief en sikketarieel wark. Hie of zie warkt under leiding van oeze sikketariaatsmetwarker.

Veurlopig warktiedenschema:

Maandag	:	8.15 - 12.30 uur 13.00 - 16.30 uur
Dinsdag	:	13.00 - 16.30 uur
Woensdag	:	8.15 - 12.30 uur (in overleg is een aandere mörgen ok wal meugelk) 13.00 - 16.30 uur
Dunderdag	:	13.00 - 16.30 uur

Enkelt bint der ok activiteiten op een aovend of in het weekèende.

Warkumschrieving

•	Administratief wark wat kopij veur de tiedschriften en manuscripten angiet;
•	Typen en verbetern van brieven en het doen van aandere correspondentie;
•	Bijholden van adressenbestanden (donateurs, vrijwilligers, abonnees enzowieder);
•	Administratief wark veur de cursussen die het Huus van de Taol gef;
•	Bijholden van het algemiene archief en het sikketariaatsarchief;
•	Zörgen veur het halen, brengen en verwarken van de post;
•	Tillefoon annimmen en as ’t kan de tillefoonties ofhandeln;
•	Bestellingen en aandere vraogen ofhandeln of deurspeulen;
•	Het doen van de dagelijkse boekholding (beheren van de kleine kas);
•	Ontvangen en deurverwiezen van bezukers;
•	Veurraodbeheer.

Wat moej in je mars hebben?

•	Je bint in de eerste plaots Drentstaolig. Dat wil zeggen, daj ien van de varianten van het Drèents goed beheerst;
•	Je kunt het Drèents goed lezen en schrieven. As dat niet het geval is, bi’j bereid je dat zo gauw as meugelk is eigen te maken;
•	Je hebt een opleiding op MBO-niveau, bij veurkeur vanzölf iene op administratief gebied;
•	Je kunt goed warken met Word en Excel - aj je ok goed redden kunt met Powerpoint hej een streepie veur;
•	Je bint vlot in de umgang met aandern;
•	Je kunt nauwkeurig en zölfstandig warken;
•	Je hebt gien negen-tot-vief mentaliteit

Aj meer weten wilt
Het kan weden, daj nog vraogen hebt over de organisatie of de functie. Nim dan gerust contact op met het Huus van de Taol. Je mugt bellen met Jan Germs (0592-381172) of de lienpost gebroeken: jan.germs@pbcdrenthe.nl

Je mugt je belangstelling ok met de lienpost dudelk maken. Gebroek daorveur de knop  hierunder.

◄ weerum naor het thoesblad