Het ‘Committee of Experts of the European Charter for Regional or Minority Languages’ hef op dunderdag 6 september op bezuuk west in Zwolle. Dit comité is der sinds 1998 en komt kieken hoe of het stiet met de minderheidstaol in een bepaolde regio. Um de drei jaor komt ze de stand van zaken opnimmen en geeft dan allerhande raodgevings. Het ‘Committee of Experts’ wordt benuumd deur de Europese ministerraod.

Lakse landelijke overheid
Under leiding van Frans-Xaver Goop oet Liechtenstein waren alle streektaolinstellingen oet het Nedersaksische taolgebied van Nederland bij mekaar op het previnciehoes in Zwolle. Namens Sont preut eerst de heer Haveman een puut vol. Hie sprak under andern zien teleurstelling oet over de lakse holding van de landelijke overheid. In de loop van de mörgen bleek dat Frans-Xaver Goop het hielemaol met hum iens is. De veurzitter van het comité was feilijk nog veul meer kwaod as teleursteld over oeze regering. Drei jaor leden hebt de Europese deskundigen een tal an raodgevings veur het landsbestuur opsteld. Ien van de belangriekste dinger die nuumd weur, was de noodzaak um te kommen tot een “coherent language policy”. Nou die taolpolitiek is der niet kommen, starker nog, de lu die der in Den Haag over gaot, hebt niet iens het fatsoen had in de richting van het comité te reageren. In drie jaor tied gien enkele reactie! Net zo verbaosd was de heer Goop derover dat an gien enkele streektaolinstelling ooit ies wat vraogd is deur de landelijke overheid.

A minority language is in everybody’s interest
Jammer genog kan het ‘Committee of Experts’ allén maor adviseren. Zie hebt gien feitelijke macht, maor dat de Nederlandse verantwoordelijken de boks opbunden hebben moet, is wal dudelk. Een landelijke taolpolitiek mot der gewoon kommen, want “a minority language is not just an advantage for the people who speak it. It ’s in everybody’s interest. It has it’s own value and represents keywords as knowlegde, dynamics, cultural inheritance and tolerance.” Die woorden bint oes oet het hart grepen.

Wies met de Provincie Drenthe
De Provincie Drenthe drag de streektaol een warm hart toe en döt zien best derveur. Daor bin wij wies met. Maor het wordt tied dat de landelijke overheid ies ongenadig op zien sodemieter kreg. Franz-Xaver Goop vindt dat, Sont vindt dat en wij bint het er hartgrondig met iens.

◄ weerum naor het thoesblad