Old en Nei 20-12-2007

’t Olde jaor hef ‘t der zowat toou daon. ’t Neie jaor is begonnen. Dizze tied van ’t jaor hef paartie Drčentse schrievers inspireerd om wat moois te schrieven. Lees mor ies wieder.

De koegel is deur de kerk 20-12-2007

Woensdag 19 december hebt de staoten van Drenthe besleuten waor of het Huus van de Taol de kommende jaoren structureel op reken kan. Dat is niet het bedrag daw geern hebben wilt. Het is niet aans. Wij bint bliede dat de previncie oes genog daon hef um het neie pand in Beilen goed inrichten te kunnen. De verhoeskosten kriew vergoed. Het personeel dat nou beroepsmaotig wark döt veur de streektaol kan dat doen blieven. Veur de administratie hew aarmslag um der veur een diel iene bij an te stellen. Nou is dat niet hielemaol winst, ok al dee oeze gedippeteerde dat wal zo veurkommen, want op dit moment steunt de Provinciale Bibliotheekcentrale oes op administratief gebied.

Boetendes wordt de administratie van het tiedschrift Oeze Volk dommiet deur het Huus van de Taol daon. Biw tevreden? Nee, wij hadden geern wat meer handen vast an ’t bero had. Kuw op dizze basis wieder? Zeker wal. Wij denkt daw wal een stevige basis hebt. De previncie hef oes boetendes met klem vraogd um meer prejecten an te vraogen. Hiel wat wark kan dan op prejectbasis toch daon worden.

Zoorholtpries en Algemiene Anfieter Award bint oetlangd 20-12-2007

Zundag 16 december bint bij RTV Drenthe in het radiopregram Podium 30 de Zoorholtpries en de Algemiene Anfieter Award oetlangd. De volmachten van het Nei Drents Geneutschap waren um dizze reden naor Assen ofreisd um daor de genomineerden te ontvangen. Juryveurzitter Hans Jalvingh was vanzölf ok anwezig en hie kun vertellen dat de cultuurgedippeteerde van Grunning, Hans Gerritsen, de anfieterpries wunnen har. De Stichting Schrijven en Lezen har de jury wat minder hoog zitten. Dizze organisatie kreeg de Zoorholtpries. Aj der meer over weten wilt, moej het persbericht  (worddocument) maor even lezen dat het Nei Drents Geneutschap zölf opsteld hef.

Onderzeuik naor ’t leren van een vrumde taol 20-12-2007

Holger Hopp hef promotieonderzeuik daon naor het taolveerdigheidsniveau van Duutse studenten die Engels, Nederlands of Russisch as mooudertaol hadden. De Russen binnen in heur eigen taol bekend met naomvallen en daorom hadden die een veursprong op de Engelsen en de Nederlanders, zo is oet dat onderzeuik bleken.

Meer lezen? Klik hier: http://www.kennislink.nl/web/show?id=184099

Drentstaolige kerkdiensten op Radio Drenthe 20-12-2007 RTV Drenthe hef plannen um veer maol in ’t jaor een Drentstaolige kerkdienst op de radio heuren te laoten. Zie wilt dat doen met Paosen, Pinkstern, de oogsttied en Kerstmis / old-en-nei. Wij vindt dat aordig nuver van oeze regionale umroep. De eerste streektaoldienst die op de radio oetzunden wordt, is op zundag 30 december. Jennie Lambers-Niers is van 10.00 uur of veurganger van de dienst in de hervörmde kerk in Daolen.

De Aovend van het Neie Drentse Lied 13-12-2007

De Tamboer op Hoogeveen was zaoterdag 8 december jammer genog niet hielemaol vol. Echt jammer, want het was een mooie ‘Aovend van het Neie Drentse Lied’. Alle artiesten die op de eerste cd van de Stichting Drentse Muziek Maatschappij te heuren bint, hebt heur nummers op de planken bracht. Dat klunk mooi en smeuk naor meer. Peter van der Heide, van de kunstredactie van Dagblad van het Noorden was der ok. Hie hef bijgaond stuk in de kraant van maandag 10 december (.pdf-bestand) lestleden schreven.

Kaarstdaogen 13-12-2007 Over de kaarstdaogen binnen een koppel gedichten en verhaolen schreven. Stichting Het Drentse Boek hef al ies een booukie oetgeven, 'Kersttied, verhaolen en gedichten rondom Kerst'. Aj hier klikken, kuj een stuk of wat gedichies over de kaarstdaogen lezen.

Kemissie Cultuur en Welzijn is der niet oet kommen 08-12-2007

Het College van Gedippeteerde Staten hef der nogal een zet over daon um tot een beoordieling van oeze plannen (Strategisch Beleidsplan 2008-2012 en Bedriefsplan 2008-2012) te kommen. Intied is dat gebeurd en hef GS een veurstel opsteld, waor de Kemissie Cultuur en Welzijn op Sunterklaosdag over risselveerd hef. Wij bint niet veur honderd precent bliede met wat het College van Gedippeteerde Staten op papier zet hef.

Der is een bedrag van € 95.000,- bezunigd. De functie van underwieskundige/taolkundige vunden ze bij de previncie niet neudig. Die beleidsinvulling muit oes biezunder. Ok de Kemissie Cultuur en Welzijn vun het beleidsveurstel van GS niet zo’n best stuk. Zie bint der dan ok niet oet kommen. Op woensdag 19 december buugt Provinciale Staten zuch over de plannen veur het Huus van de Taol. Wij hoopt daw dan dudelijkheid kriegt. De veurzitter van het Huus van de Taol, Anne Doornbos, hef de leden van de kemissie oetstukt hoe wij dertegen an kiekt. Zien woorden kuj hier lezen. ► Taanden van de tied 12-12-2007 Marga Kool, Geert Jan Brader en Jan Veenstra hebt al een jaor of wat een aovendvullend streektaolpregram, dat van heur de naam Taanden van de Tied kregen hef. Zie hebt der veul succes met. Aj heur ies inhuren wilt, geef dan acht op het feit dat Jan en Marga verhoesd bint. Heur neie tillefoonnummer is (0523) 234001. Het bedrag dat ze geern ontvangen wilt, hef ok de taanden van de tied in zuch had, oftewal: as gevolg van de inflatiecorrectie vraogt ze van 1 jannewaori 2008 of het bedrag van € 350,00. Lees wieder.

Neie Drčentse meziek op TV Drenthe 05-12-2007

De SDMM hef een neie cd oetbrocht met neie Drčentse leeidties. TV Drenthe schenkt daor in tweei oetzendings aandacht an. Op de dunderdaogen 6 en 13 december kuj om 18.45 uur in ’t pregramma 'Neie maoten' zeein hoou of tekstschrievers in de kunde kommen met zangers en componisten en hoou of neie leeidties maokt worden.

SDMM 105-12-2007 Zaoterdag 1 december lestleden is de alderbarstend mooie, eerste cd van de Stichting Drentse Muziek Maatschappij prissenteerd. Dat gebeurde in het gebouw van RTV Drenthe, waor directeur/hoofdredacteur Klaas Samplonius gastheer was. Hie kreeg ok het eerste exemplaar van SDMM 1, dat hum oetlangd weur deur Bert Bouwmeester. Bouwmeester is in ’t dagelijks leven burgemeester van de gemiente Coevern, maor was nou anwezig as lid van ’t comité van anbeveling. Lees wieder.

Limbo-Hollaands 05-12-2007 Paartie lu dčenken dat de oorspronkelijke Limburgse streektaolen, die van dörp tot dorp verschilden, an ’t verdwienen binnen. In stee van die Limburgse streektaolen komp der een regiolect, een soort van Limbo-Hollaands, een mengtaol die in de heule previncie bruukt wordt. In ‘t booukie Limbo-Hollands. Op taalsafari in Limbabwe stukt taolkundige Paul Wijnands oet hoou of dat Limbo-Hollaands in mekaor zit. Hij beschref de geschiedenis, de zinsbouw, de woordenschat en aander aspecten van dizze neie mengtaol. Aj allennig naor de titel kieken, zuj dčenken dat ’t een grappig booukie is, mor de schriever is wel serieus. Met dizze verwiezings kuj meer neis over Limbo-Hollaands lezen: • Reportage TV Limburg: http://nieuwsbrief.taalpost.nl/r/tp.plx?2300-731 • Bestelinformatie bij uitgever TIC: http://nieuwsbrief.taalpost.nl/r/tp.plx?759-731s

Aj hier klikken, kuj lezen wat of Doutzen Kroes nog meer zeg. ’t is Een Engels artikel:  http://www.eurolang.net/index.php?option=com_content&task=view&id=2990&Itemid=1&lang=en

Zoorholtpries 2007 / Anfieterpries 2007 28-11-2007

Zundag 16 december ankommend wordt in het radioprogramma 'Podium 30' (11.00 – 12.00 uur, prissentaotie Lukas Koops) van RTV Drenthe de tooukenning bekendmaokt van de Zoorholtpries en de Algemiene Anfieter Award (körtweg Anfieterpries) 2007. Lees wieder.

Vrijdag 14 december a.s.: De Literaire Hemel 28-11-2007

Op vrijdag 14 december is van 't jaor de leste Literaire Hemel in broen café De Amer in Amen. Annette Timmer ontvangt weer literaire gasten oet het Nederlandse en Nedersaksische schriefgebied. Lees wieder.

Nedersaksisch Vocaal Ensemble in ‘De Noorderbak’ in Roswinkel 28-11-2007 Ankommende zundag 9 december gef het Nedersaksisch Vocaal Ensemble een koffieconcert in Theaterboerderij De Noorderbak in Roswinkel. De bekende streektaolzanger Klaas Spekken oet Ter Apel warkt deran met. Lees wieder

December 29-11-2007

De leste maond van ’t jaor is weer begonnen. Over dizze maond hef Klaas Koops een mooi gedicht schreven. Lees wieder.

De Drentse Boekenweek is lös 08-11-2007 Dinsdag 6 november is de Drentse Boekenweek lösdaon. Dat gebeurde op een bijienkomst bij boekhandel Hummelen in Assen. Gedippeteerde Rein Munniksma kreeg van de veurzitter van het Huus van de Taol, Anne Doornbos, de eerste Boekenweekkraant. Gerard Nijenhuis langde hum het eerste exemplaar van ‘Een plek um te blieven’ oet. Dit boek is het boekenweekkedo van 2007. Aj veur € 12,50 an (Drenthe)boeken koopt, kriej dizze körte roman vergees. Bibliotheken en boekhandels doet van alles in de Drentse Boekenweek, die tot 17 november duurt. Der bint optredens van schrievers en dichters, der wordt meziek maakt, der bint signeersessies en vanzölf is er hiel veul informatie over boeken in het Drents en over Drenthe. Kiek ok op www.drentseboekenweek.nl.

De plannen bint beproot 08-11-2007

Het College van Gedippeteerde Staten van Drenthe hef de plannen veur het Huus van de Taol beproot. Da’s mooi vanzölf. Een nuver persbericht (worddocument) hebt ze ok de wereld in slingerd, maor zo mooi as de zaken daorin veursteld wordt, is het volgens oes toch niet hielemaol. En ok de berichten in de kraant, dat Jan Germs zuch hielemaol richten kan op underwies en een eigen secretaresse kreg, bint een beetie te rooskleurig.

Het is namelijk zo, dat der € 95.000,- beknibbeld is op wat het Huus van de Taol geern structureel wil. Dat betiekent dat u.a. de functionaris die gangs weden zul met underwies en taolwetenschap der niet kommen kan. Dat muit oes. Het wordt sowieso al verknupte stoer um de ambitieuze plannen veur de kommende jaoren goed an de vörk steken te kunnen, ok zunder het körten op de wenste formatie. Het getuugt niet van realiteitszin as der zegd wordt, dat der nou veul meer tied is um het underwies te bedienen.

Slim mooi is ’t wal dat de previncie oes het vraogde bedrag veur herinrichting en verhoezing toekend hef. Op 5 december wordt de plannen in de Statencommissie Cultuur en Welzijn beproot. De oeteindelijke beslissing wordt op 19 december in de vergadering van Provinciale Staten nummen.

Bijgaond kuj het Strategisch beleidsplan 2008-2012 lezen, waor oeze plannen in staot.

Drents Dictee in Aalden 31-10-2007

Dunderdag 15 november ankommend wordt in Aalden een dictee in de streektaol holden. Elkenien kan veurgeefs metan doen en aj um half acht in De Anwende an de Paardelandsdrift 5 bint, kriej eerst een lekker koppie kovvie of thee. Um 20.00 uur begunt de spellingoefening. Koop Bos giet het dictee veurlezen, maor de eerste zin wordt daon deur een nog bekendere Drent. Elkenien in Aalden kent hum.
De taol waor het dictee in schreven is, is het plaotselijke dialect van Aalden / Zweel. Het dictee is organiseerd deur Sweel Cultureel en de bibliotheek. Aj metan doen wilt - en dat kost dus niks - kuj je anmelden bij de bibliotheek, tillefoon: (0591) 371840.

Dialectaovend in Dwingel 31-10-2007 Op woensdag 14 november hef Stichting Dwingels Eigen, in saemenwaarking mit de Bibliotheek Dwingeloo, de jaorlijkse dialectaovend. Dit jaor draegt Joop Timmerman uut ’t Hogevene, Gerda Bultje uut Echten, Carla Tuin uut Uffelte en Freek Wiechers en Ans Klok uut Dwingel veur uut eigen waark. Willem Fledderus uut Assen nemp het muzikale en vocale, ook in de streektaol, veur zien rekening. Ans Klok prat de boel an mekaer. De aovend wordt eholden in de bibliotheek an de brink in Dwingel. Het begont um kwart veur achte. Wie dizze aovend wil komen lustern, möt hum opgeven bij Ans Klok, tillefoon 0521-592468, want vol is vol. An ’t ende van de aovend krig de bibliotheek van Stichting Dwingels Eigen een nei boek. De historische veriening steunt de bibliotheek jaorlijks op dizze meniere.

Drčentse les op Nassaucollege in Assen 31-10-2007

Mangs hebben schooulen een projectweek. De leerlingen dooun dan aander dingen as aans. In stee van geschiedenis, aardrijkskunde, wiskunde en Nederlaands, Fraans en Engels gaon ze beveurbeeld rappen, gedichten schrieven of ies naor een moskee. Of vanzölf kriegen ze ies een Drčentse les.

’t Nassaucollege in Assen hef čend oktober een projectweek had. Stichting Drentse Taol is bliede dat dizze schooul de leerlingen de kaans gef om ies in de kunde te kommen met de Drčentse taol. De kinder leren in dizze lessen een bult over taol in ’t algemeein, en ’t Drčents in ’t bizunder. Haalf november is Stichting Drentse Taol neugd deur de Ronerborg in Roon. Daor geef wij al een jaor of vief een Drčentse les.

As der in Drenthe aander schooulen binnen die met een projectweek ok ies aandacht schenken willen an ’t Drčents, kunnen ze contact opnemen met oous, 0592-381172 of drentsetaol@pbcdrenthe.nl

Allerzielen 31-10-2007

Op 2 november is ’t Allerzielen. Dan herdčenkt de Kerk aal geleuvigen die oet de tied kommen binnen. Roel Reijntjes hef der een mooi gedicht over schreven.

Veurdrachtwedstried ’t Aol' Volk groot succes 24-10-2007 De veurdrachtwedstried in de streektaol voor schooulkinder, organiseerd deur ’t Aol’ Volk, hef vrijdagavond 12 oktober weer een groot succes west. De virtig winnaors van de veurronden in Zuudoost-Drenthe hebben in De Muzeval in Emmen streden om de felbegeerde Grada Eding-Askes-bokaol. De juryleden, Trijntje van der Scheer (streektaolzangeres), Wim Hulst (Radio Loco) en Harry Popken (RTV- Drenthe), hadden een zwaore taok om de winnaors an te wiezen. Aj hier klikken (worddocument), kuj lezen wel in wat categorie de winnaor worden is. Peter Jan Dijkstra much de Grada Eding-Askes-bokaol metnemen naor Sleen. Van wel zul e dat talent toch aarfd hebben?

De man met de rode sjaal weer naor hoes toe 24-10-2007 Hie mot zuch niet versloeken in ’t warme eten, want dat döt hum nog verknupte zeer, maor wieder giet het al weer aordig goed met Rieks Siebering. Rieks, schriever en bestuurslid van het Huus van de Taol / Het Drentse Boek, was al een beste zet gauw mu. Zien hart dee het wark niet zoas het feilijk moeten zul. Opname in ’t ziekenhoes kun dan ok niet oetblieven, en gelukkig kun der wat an daon worden. Half oktober hef e drei umleidings kregen, en het giet al weer zo goed met hum, dat e dunderdag 25 oktober hen hoes much. Rieks, wij wčenst je wieder beterschap en starkte toe en… niet te haostig eten!

De Zeuvendaagse - Leste oetzending op 24 oktober
Schrievers zeuven dagen an de wandel deur Drenthe 11-10-2007

Een dozien Drčentse en Grunnegse schrievers en dichters hebt čend september een dikke week an de wandel west deur Drenthe. Op paartie plaotsen hebt ze stil staon bij belangwekkende literaire zaken. Daor wuur veurdragen of meziek speuld. Op zaoterdagaovend 22 september is de Zeuvendaagse begund. Op zaoterdagaovend 29 september is e ofsloten met een speciale oflevering van de Literaire Hemel in De Amer in Amen.

Over de Zeuvendaagse is een documentaire maakt deur RTV Drenthe. Op de woensdagaovends 10, 17 en 24 oktober is die te bekieken op RTV Drenthe om kwart veur ’t hiele uur.

Taal aan Tafel veur kinder 11-10-2007 Op zundag 14 oktober is der in café-restaurant Poortman in Veeningen een speciale Taal aan Tafel veur kinder van de basisschoelen. Delia Bremer giet gedichten veurlezen, Lien vertelt een Drents verhaal en Rensje Ronzebons komt met heur poppentheater. De kinder huuft gien entree te betalen. Pap en mam of opa en oma die metkomt, betaalt € 5,00. Veur heur is der een wandeling under leiding van een gids van Het Drentse Landschap. As de groten weerum bint, kriegt ze een lekkere kop soep met Fraanse stoet. De kinder kriegt middageten: patat met wat derbij. Het begunt um 11.00 uur en is zo’n beetie um kwart veur twei oflopen.

Veurdrachtswedstried van ’t Aol’ Volk in Emmen 04-10-2007 Op vrijdagaovend 12 oktober ankommend holdt de Drentse veriening ’t Aol’ Volk in Emmen weer heur jaorlijks veurdrachtswedstried. Jongs en wichter, porken en bözzels, kleuters en pubers, zie kunt allemaol metan doen. Nao de veurrondes mugt de besten op 12 oktober in theater De Muzeval van zeuven uur of preberen de Grada Eding-Askes bokaal te winnen. In de verscheiden leeftiedscategorieën bint trouwens ok nog priezen in de wacht te slepen. Aj meer weten wilt, moej het (Nederlandstaolige) persbericht (word-document, 169 Kb) maor even lezen.

Neie Drčentse literatuurcursus 31-10-2007

Op d’Olde Smilde is op 30 oktober de neie Drčentse literatuurcursus begonnen. Dizze cursus wordt van ’t jaor oetperbeerd. As ’t de cursisten en oous gooud bevalt, wordt dizze cursus aander jaor in heul Drenthe anboden. Op d’Olde Smilde kriegen twaalf cursisten zes week laang les over de Drčentse literatuur. De eerste les hef Dr. Henk Nijkeuter een overzicht geven van 1837 tot vandaog an de dag. In de volgende lessen kommen de volgende Drčentse boouken an de orde.

• Peter van der Velde - Winter op De Paaizermao
• Roel Reijntjes - Late brummelpluk
• Jan Veenstra - Die nacht, een feest
• Hans Heyting - De dichter en de wichter
• Marga Kool - De mooiste kus

Huus van de Taol 25-10-2007 As alles metzit, döt het Huus van de Taol in meert 2008de deuren in Beilen lös. Hierbij alvast een paar foto's van de boetenkaant van het beoogde stee, dat opknapt is...

Wij fillesteert Siemon van harte met zien fulltime hoogleraarschap, maor feilijk moet wij het Grunneger streektaollaand nog meer gelukwensen. Aibels mooi waark!

Je kunt an de wandel in ‘Het Hollebomenbos’! 11-10-2007 Op dinsdag 9 oktober lestleden is ‘Het Hollebomenbos’ op OBS De Eshoek in Annen prissenteerd. ‘Het Hollebomenbos’ is een sprookiesboek dat schreven is deur Herma Stroetinga. De prachtige tiekeningen bint maakt deur Trudy Kramer, die ‘Kobus Knien op pad met Ad de Kat’ ok illustreerd hef. ‘Het Hollebomenbos’ is een oetgave van Het Drentse Boek en kost € 14,50. Lees wieder

Klaor veur de Start - Daarde cursusaovend 04-10-2007 Maandag 1 oktober lestleden was de daarde en leste cursusaovend veur peuterleidsters, vrijwilligers en SPW-stagiaires van vief peuterspeulzalen van de Weerdingermond, Emmer-Compas, Emmererfscheidenveen, Emmermeer en Klazienaveen. De leid’ was weer in handen van taolkundige Itie van den Berg, die hulp kreeg van Hilda Brandsma (Sedna) en Jan Germs (Huus van de Taol). Lees wieder. ► Projectplan 'Klaor veur de Start' (word-document, 103 Kb)

▲ Cursusmaarken 27-09-2007

Op zaoterdag 22 september hebben der in verscheiden bibliotheken weer cursusmaarken west. Stichting Drentse Taol hef ok op een koppel maarken met een kraompie staon. Volk met interesse veur de Drentse taol kan op een cursusmaark terecht veur een inschrieving veur een cursus. Wij hebben beveurbeeld in Zuudlaoren, Geeiten, Coevern en Beilen staon. In de gemeeinte Börger-Odoorn binnen een stuk of wat plaotsen met een dikke bus ofreisd.

Jasbuus vol Drents: Drentse les op TV Drenthe 27-09-2007

‘Jasbuus vol Drents’ is de naam van een nei programma van TV Drenthe dat op maandag 3 september begund is. Het oetzendschema hef een toerlang niet hielemaol in örder west, maor zie hebt bij RTV Drenthe zegd, dat ze van maandag 1 oktober of een strak schema anholden gaot: aal uur vlak veur het halve uur kuj de Jasbuus zien. De eerste maol um 19.28 uur en dan zo de hiele aovend en de hiele nacht deur. Veul plezeer der wieder met.

Activiteitenplan 2008 27-09-2007

Veur ’t eerst is der een warkplan / activiteitenplan veur het Huus van de Taol maakt. De plannen en activiteiten van Het Drentse Boek, Oeze Volk en Drentse Taol bint in mekaar scheuven. Makkelk was dat niet, ok umdat der zoveul onzekerheden bint. Het zal tied en energie kosten um met mekaar in ien pand oeze drei te vinden. Hoe makkelk giet oes dat of? En… Provinciale Staten nimt pas op zien vrogst in december een besluut over de toekomst van het Huus van de Taol. Dan pas weet wij hoe lang of de polsstok wordt.

Het warkplan 2008 mot feilijk zien worden as een veurlopig plan. Aj hum lezen wilt, moej maor even wieder lezen (.pdf, 119 Kb).

Haarfst 20-09-2007

Het is haarfst! De zummer is te rad weer naor zien inne gaon, hef Peter van der Velde al ies schreven. Over dizze tied binnen in ’t Drčents wel meer schiere gedichten schreven. Aj hier klikken kuj der een stuk of wat lezen van schrievers as Peter van der Velde, Roel Reijntjes en Louis Albert Roessingh. Vernuver je dermet!

Het ‘Committee of experts’ hef op bezuuk west 13-09-2007

Het ‘Committee of Experts of the European Charter for Regional or Minority Languages’ hef op dunderdag 6 september op bezuuk west in Zwolle. Dit comité is der sinds 1998 en komt kieken hoe of het stiet met de minderheidstaol in een bepaolde regio. Um de drei jaor komt het de stand van zaken opnimmen en gef dan allerhande raodgevings. Het ‘Committee of Experts’ wordt benuumd deur de Europese ministerraod. Lees wieder.

Beide smaakt hum goed en dat is an zien vingers en wangen te zien. “Zit niet zo te griemen, jong! Je bint ja een dikke tont.” zeg ik tegen hum, intied da’k hum een smok op zien besukkelaode wang geef. Lees wieder.

Broer zoekt vrouw 13-09-2007 Harm Dijkstra hef speciaal veur de Drentse veriening ’t Aol' Volk in Emmen een tenielstuk schreven: Broer zoekt vrouw. Het kommende winterseizoen, van 2 november of, wordt het in hiel Drenthe en op Hoogezand en Stadsknaol en in Stienwiek speuld. In oeze agenda hew alle veurstellings opneumen. Trouwens, op 24 febrewaori aander jaor bestiet ’t Aol' Volk 60 jaor. Op zaoterdag 23 febrewaori bouwt ze een feestie. Vrijdag 16 en zaoterdag 17 mei 2008 wordt der deur eigen leden in theater De Muzeval in Emmen een revue opvoerd.

Streektaol op pabo Emmen 05-09-07

Het Huus van de Taol gef nogal ies Drentse lessen op basisschoelen in Drenthe, en ok op een stuk of wat Drentse middelbare schoelen geef wij jaorlijks les over taol en meertaoligheid.

Vleden maandag biw op de Pabo in Emmen west. De tweidejaorsstudenten daor hebt in heur eerste lesweek van 3 tot en met 7 september les kregen over streektaol in het underwies.

Maandag 3 september hef Jan Germs een algemiene inleiding holden over streektaol, en daornao waren der drei rondes met workshops van Abel Darwinkel (poëzie) en Jan Germs (streektaollessen op de basisschoel).

Zangleraar en spil in de organisatie (die wieder in handen is van studenten oet het veerde jaor) Jan Kruimink zung ‘smiddags met vieftig studenten een stuk of wat mooie streektaolnummers, zoas Dreuge worst van Skik.

Wieder hebt de ankommende meesters en juffen veurbeeldlessies anlangd kregen en gaot ze de praktijk in. Dan is de ofsluting van de week.

PeerGroup goes streektaol 23-08-2007

Körtleden vreugen de lu van de PeerGroup um een flottie plakplaaties 'Hier kuj Drents praoten'. Wij vindt het aordig van Sjoerd Wagenaar en kompanen, dat ze de streektaol een warm hart toedraagt. Sjoerd kennende hadden wij daor trouwens gien twiefel over.

Mooi vin wij ’t ok dat de de PeerGroup nou een zummeraovendconcert met veer noordelijke zangers organiseert. Op zaoterdagaovend 1 september van 22.00 uur of gaot in het Strokasteel in Veenhoezen optreden: Egbert Meyers, Harry Niehof, Piter Wilkens en Bert Kamping.

Veer manlu, veer toppers. Met meziek in het Drčents, Grunnings en Fries. Dat kun minder. Veur kaorten en informatie: www.peergroup.nl. (Margaretha Kleine en Alex Vissering zulden eerst ok kommen, maor zie hebt ofzeggen moeten.)

Songteksten vertaold in het Drčents 23-08-2007 Op de CD-ofdeeiling van Warenhuis Vanderveen in Assen kuj van tied tot tied een vertaolde/bewarkte songtekst van Egbert Hovenkamp II lezen. Het geeit met naome um de poëzie in de tekst, het heuif niet zingbaor te weden. Wark van Leonard Cohen: 'Wel deur vuur' (‘Who by fire’), John Lennon: ‘Stel je ’ns veur’ (‘Imagine’, dizzende is trouwens wel te zingen), Sinčad O’Connor: ‘Wa’k neeit heb, dat heuif ik neeit’ (‘I don’t Want What I Haven’t Got’).

Sinds 21 augustus 2007: ‘Witte Vlag’ (‘White Flag’) van Dido, met as refrein: ‘Met dit schip za’k vergaon en ik zal mien aarms niet oetstrekken en mij overgeven / Der is gien witte vlag boven mien deur, ik hol van je en veur altied...'

Egbert Hovenkamp II is, wat het Drčents angeeit, allent nog met vertaolings/bewarkings gangs. Zien eigen wark is veural Nederlands. Veurlezen döt e in beide taolen, ofhankeliek van waor en wat en waorum

Oring of Odoorn? 08-08-2007 Of vekaansie je aaid een roemere kiek op de wereld gef, is de vraog. Maor mangs valt je toch dinger op. Ik heb het geluk had, da’k twei maol an de reize west heb. Eerst wa’k in Noord-Italië. De lu proot daor Duuts, Italiaans en streektaol. Dat laot ze niet allén heuren. Zie laot het ok zien. Op veul plaotsnaamborden ziej de andudings in drei taolen. In juli was ik met (een diel van) ’t gezin an de kust van Bretagne. Umdebij tien precent van het volk daor prat Bretons. Zie bint der groots op, ok de mčensen die het niet proten kunt. Het is daorum niet zo vrumd, dat in Bretagne hiel wat dörpen in twei taolen nuumd wordt. Het wordt hoog tied daw ok in Drenthe veul meer zien laot daw niet allén groots bint op oes materiële arfgoed, maor evenzogoed op oeze immateriële cultuurutings.

Gooud neis! 11-07-2007

In ’t Dagblad van ’t Noorden stun vleden maondag 9 juli ’t bericht dat der een goeie kaans is dat ’t kabinet ’t Nedersaksisch deeil 3 van het Handvest veur Regionaole Taolen geven zal. Dat is mooi neis veur ’t Drčents!

Hogere status Drents en Gronings - Kans op Europese subsidies groter door erkenning door kabinet
Door Johan de Veer - Het kabinet lijkt bereid het Nedersaksisch de internationale status toe te kennen die recht geeft op Europese subsidie. Voorwaarde is dat de regio's met goede plannen komen en zonder al te veel administratieve drukte projecten controleren. Volgens de Groningse gedeputeerde Hans Gerritsen, die gisteren in Den Haag overleg pleegde met staatssecretaris Ank Bijleveld van binnenlandse zaken, zijn er goede mogelijkheden. Er moet dan nog wel veel werk worden verzet. Gerritsen denkt dit najaar tot zaken te kunnen komen met het kabinet. Met een internationale status voor het Nedersaksisch is de kans groot dat er Europees geld vrijkomt voor culturele en educatieve projecten. Die projecten zijn bedoeld om streektalen als het Drents en Gronings te kunnen behouden en te ontwikkelen. Namens zijn collega's, de bestuurlijke voorvechters van het Drents, het Twents, het Achterhoeks en het Stellingwerfs, zegde de gedeputeerde toe snel met een handvest, een soort prestatiecontract, te zullen komen. Gerritsen: "De staatssecretaris wil onze plannen zien en vindt dat we zonder al te veel administratief gedoe moeten kunnen controleren of het geld goed is besteed." De gedeputeerde heeft geen idee welke bedragen door de status kunnen worden verkregen. "Laten we eerst met goede voorstellen komen en zorgen dat we die status krijgen."
 

		Jaor van de meulen 11-07-2007 Tweeidoezendzeuven (2007) is ’t Jaor van de Meul www.jaarvandemolen.nl. Stichting Drentse Taol döt daor vanzölf ok an met. Op 24 augustus komp der een booukie oet bij Stichting Het Drentse Boek met de titel Molentaal. Dde meul wet van gien wieken. ’t Is een handig booukie met Drčentse gedichten over meulen, raodselies over meulen, meulenspreekwoorden en de spelregels van het meulenspel en aal zuks wat meer. ’t Booukie is saomensteld deur Abel Darwinkel.
Op dizze webstee kuj al vast een meulengedicht en een paor spreekwoorden lezen. In Drenthe hebben deur de eeuwen hen veerhonderd meulen staon. Daor binnen noe nog zesendartig meulen van over, en daor moew slim zunig op weden. Een koppel van die meulen draait aal zaoterdaogen. Gao mor ies hen kieken bij een Drčentse meul bij joe in de buurt. • Hij kan aans niks liggen laoten as gloeiend iezer en meulensteinen. - Hij kan alles gebruiken. ook: Hij steelt als de raven. • ’t Meulenie wordt stomp. - Ik ben verzadigd, ik kan niet meer op. • As komp in de meul te pas. - Gezegd als iemand steeds maar veronderstellingen oppert en as zegt.

 

Drčentse woorden 11-07-2007 Dr. Geert Kocks (*Barger Oosterveld 1936 - †Zuidlaren 2003) is de saomensteller van ’t Woordenboek van de Drentse Dialecten. Bij zien waark hef e hulp had van een koppel mčensen. Bij ’t waark an ’t woordenboouk hef e ok interessante Nederlandstaolige stukkies veur verscheiden kraanten schreven over Drčentse woorden waor wat meer over te zeggen was. De kommende maonden wiw jullie op dizze webstee aal weken een stukkie dervan lezen laoten. Wij hopen daj je dermet vernuvern. Dizze week: Gaorenklopper

Zomerzinnen groot succes! 28-06-2007

’t Neie literaire festival Zomerzinnen is een groot succes worden. Der waren zaoterdagaovend 23 juni tweeidoezend man in ’t mooie dörpie Wezup.

Freek de Jonge dee ’t festival lös saomen met commissaoris Relus Ter Beek. Jammer genog regende ’t op dat moment peerdeogen, mor doe om kwart veur negen aal programma-onderdeeilen begonnen, was ’t gelukkig dreug. In ’t dörpie was ’t de heuile aovend gezellig drok en de delen van de boerderijen waor of de artiesten optraden waren staampvol.

Veur Stichting Drentse Taol en Stichting Het Drentse Boek mussen Lukas Koops, Martijje Lubbers, Suze Sanders, Geert Jan Brader en Gerard Stout in de baon. Zij hadden over aandacht ok niks te klaogen. Der waren nog meer Drčentstaolige optredens. Vrouwenteneel Erica hef tweei eeinakters op de plaanken brocht, Stop oet Börk stun op straot te speulen en Erik Harteveld, stadsdichter van Assen, dee zien optreden ok in ’t Drčents. Der waren ok een koppel landelijk bekende schrievers en dichters zoas Jan Siebelink, Kader Abdolah, Gerbrand Bakker en Driek van Wissen.

De organisaotsie geeit ’t literaire festival ankommende week evalueren. Wij hopen daw aander jaor weer zu’n mooi festival organiseren kunnen. Wij holden joe op de hoogte.

Meer sfeerbeelden kuj vinden op www.zomerzinnen.nl. Lees de belevenissen van schrijver Gerbrand Bakker tijdens Zomerzinnen op zijn weblog www.gerbrandsdingetje.nl

		Sjoerd Wagenaar hef Culturele Pries van Drenthe 2007 wonnen 28-06-2007 Sjoerd Wagenaar, artistiek leider van de PeerGrouP (en De Mobiele Theaterwaarkplaots), hef zaoterdag 23 juni in Wezup de Culturele Pries van Drenthe 2007 kregen. Hij was nomineerd saomen met Peter Dijkstra, Albert Haar, Ab Sligter (körs overleden) en Daniël Lohues. De oetreiking was veur ’t literaire festival Zomerzinnen an.
Commissaoris van de Keunegin Relus ter Beek hef de winnaor bekend maokt deur een een gedicht van Marga Kool veur te lezen. Sjoerd Wagenaar hef dizze Drentse Cultuurpries kregen omreden hij met zien locatietheater de Drčentse culturele infrastructuur een nei, kwalitatief hoogstaond element geven hef. Hij hef met ’t winnen van de Culturele Pries een bronzen legpenning en een cheque van 10.000 euro kregen van ’t provinciaal bestuur. De Culturele Pries van Drenthe wordt in 2010 weer oetlangd.

Drčentse Hagepreek in Schonerd 28-06-2007 Op ’t hunebed de Papeloze kerk in Schonerd is op zundag 22 juli om 19.00 uur een hagepreek, een openluchtdeeinst in ’t Drčents. Veurganger is Peter van Pesse, een lid van “Die Luyden van ’t Hooge Veene” (www.dieluydenvanthoogeveene.nl). Dat is een groep mčensen die ’t verleden weer tot leven brengen.

Minder kaans op Alzheimer!  21-06-2007

Tweeitaoligheid hef veul cognitieve veurdeeilen. ‘Dat kinder dervan in de war kommen, is nog nooit bewezen.’ Wel is bewezen dat kinder die tweeitaolig grootbrocht worden laoter minder kaans hebben op Alzheimer. Lees dit artikel mor ies dat in ’t zummernummer van Psychologiemagazine (.pdf-bestand, 1 MB) (juli/augustus) steeit.

Zummer 20-06-2007

De zummer is weer anbroken en die tied van ’t jaor binnen prachtige gedichten over schreven. Aj hier klikken, kuj een stuk of wat Drčentse zummergedichten lezen.

Meer as ien taol 20-06-2007

Der bint underzukers die zegt dat der umdebij 4000 taolen op de wereld bint. In 2004 bint der officieel 192 landen teld op oeze planeet. Een simpele rekensom leert oes, dat der gemiddeld twintig taolen in een laand spreuken wordt. Tussen de 70 en 80% van de wereldbevolking prat in hoes dan ok een aandere taol as de officiële landstaol. Dat is gloepends mooi. Der is niks mis met.

Op dizze webstee kuj lezen over het peuterpreject ‘Klaor veur de Start’. Gelukkig bint der hiel wat kleingies die in hoes een aandere taol heurt as oeze landstaol. Daor is niks mis met. Dat kan juust goed weden. Jammer genog blieft daor misverstanden over bestaon, en wat dat angiet is het artikel ‘Verkiezingspraatjes over taal’ oet het Friesch Dagblad van 18 november 2006 nog aaid leerzaam. Lees het maor ies. Dan begriep ie nog beter waorum wij met ‘Klaor veur de Start’ gangs bint...

Nog meer naor anleiding van ‘Klaor veur de Start’ 20-06-2007

In het preject ‘Klaor veur de Start’ proot wij met peuterleidsters over tweetaoligheid en hoe aj daor het beste met umgaon kunt. Wij hebt op de leste cursusaovend bijveurbeeld proot over OPOL en dat betiekent One Parent One Language. Daor wordt met bedoeld dat olders niet aal van de iene taol overgaon moet op de aandere.

Dat geldt feilijk ok veur peuterleidsters. Die proot Nederlands op de peuterspeulzaal. Daorum heb wij ok de Drents protende streektaolpop Bertus op batterij bracht. De leidster kan met de hulp van de pop Nederlands proten blieven en Bertus zingt, vertelt en prat in de streektaol.

Over dit underwarp stun veur een zet leden een schier stuk in het Friesch Dagblad. De muite van ’t lezen zeker weerd.

Literair festival Zomerzinnen in Wezup 20-06-2007 't Is bijna zo wied! De literaire organisaotsies in Drenthe hebben saomen met de previncie Drenthe een nei literair festival in de beeinen hölpen. Op zaoterdagaovend 23 juni 2007 kan elkeneein veurgeefs naor ’t neie festival met de titel Zomerzinnen. Het festival wordt holden in ’t mooie Drčentse dörpie Wezup. Op straot en op de deel van een koppel boerderijen kan ’t volk wil hebben an schrievers, teneeil en muziek. Lees wieder.

Nog tien sprekers van ’t Lijfs 20-06-2007

’t Lijfs ( een Finoegrische taol die verwant is an het Fins en het Ests) is de taol van ’t vroougere Lijfland, wat noe ongeveer Letland is. Het Lijfs hef nog mor tien sprekers. De meeiste Lijflanders binnen veur meer as honderd jaor overgaon op ’t Lets, dat zölf ok weer slim onder druk steeit van ’t Russisch.

Toch binnen der weer mčensen die ‘t Lijfs leren, omreden ze ’t jammer vinden dat dizze taol misschie verdwienen zal. Der worden zölfs tillefoonberichies stuurd in ’t Lijfs. Lees dit Engelse artikel mor ies.

Nei boouk van Jan Glas: Het getal hondje 13-06-2007 Veur dreei jaor hef de Grunneger schriever Jan Glas debuteerd met zien bundel ‘De vangers van zummer’. In 2006 hef dizze bundel de Literaire Prijs van Stichting 't Grunneger Bouk kregen. De jury von dat ‘De vangers van zummer’ het beste literaire produkt was van de leste dreei jaoren. In 2006 hef Jan Glas ok de Duutse Freudenthal-pries wonnen veur neie Nedersaksische schrieverij. De gedichten waor of e die pries met wonnen hef, binnen noe te lezen in zien neie bundel ‘Het getal hondje’. Jan Glas lat met staarke beelden en krachtige taol zeein dat e met van de beste Grunnegse en Nedersaksische dichters is.

		De Rageboll’n maoken goeie deurstart! 13-06-2007 De rockband De Rageboll’n hef een deurstart maokt met tweei neie bandleden: Henk Oosting oet Börger, bas en zang en Martin Wiggers oet Oring op drums. De band besteeit wieder oet: zanger-gitaarspeuler Bert Klaver, sologitaarspeuler Arnold ten Caat en gitaarspeuler Richard ten Caat.
De Rageboll’n binnen haard an ’t waark an de neie “Rageboll’n rock-’n-rollshow” met vrolijke rock-’n-rollmuziek en een stuk of wat metzingers. Neem een kroeg, een feesttent, wat hamburgers en een biertap, zet de Rageboll’n op ‘t podium en je hebben een echt rock-’n-rollfeest, muziek tot in de laote uurties!! Der is een remix maokt van ‘t nummer “Kom maar op met dat bier” van de CD “Spiekers met kopp’n” oet 2003. Dit nummer kuj veurgeefs kriegen op www.ragebollen.nl Op zundagmiddag 24 juni kuj de neie bezetting veur de eerste maol heuren op het Half Deur Festival bij de muziekkoepel an de Dörpsstraot in Gasselt. Het optreden begunt al om 12.45 uur.

De neie Oeze Volk is oet! 07-06-2007 Het Maondblad in de Drentse taol, jaorgang 51, nr. 5 is oet. In een redactioneel artikel wordt oetgebreid ingaon op het pad naor het Huus van de Taol. Ok vertelt de redactie over de toekomst van Oeze Volk en kondigt e an dat het blad over niet al te lange tied “in een nei jassie steuken worden zal”. Der zal bekeken worden of het blad “interessanter veur meer mčensen” maakt worden kan. Wat ok wal aordig is, is dat wat lu die metdoet an de schriefcursus van het Huus van de Taol dizze maond poëzie of proza in Oeze Volk staon hebt: Jan Timmer, Ingmar Roerdinkholder, Wim Oosting en Marchinus Elting.

Aj bedčenkt dat de cursisten Ina Hartholt en Jennie Lambers-Niers ok wel ies in Oeze Volk publiceert, dan kuw zeggen dat de schriefcursus niet veur niks organiseerd wordt. Trouwens, Gerla van Bergen oet Eel die de cursus Dieper-deur-Drenthe bij Harm Soegies volgd hef, hef heur schriefdebuut in de leste Oeze Volk met het gedicht ‘Veur ’t eerst vlaigen’.

Veur meer inlichtingen en proefabonnementen: www.oezevolk.nl

Straotnaamborden in de streektaol? 07-06-2007 In 'Onze Taal', het maondblad van het geneutschap Onze Taal,  stiet dizze maond een artikel met de naam “Gaat streektaalpolitiek te ver?” Hierin gaot de sociolinguďsten Koen Jaspaert en Sjaak Kroon in discussie met taolkundige Marc van Oostendorp van het Meertens Instituut. Jaspaert en Kroon zegt u.a.: “Dialect moet door streektaalbeleid niet gedwongen worden om de concurrentie met de standaardtaal aan te gaan.” Van Oostendorp vindt dat de beide manlu spoken ziet en is het niet met heur iens. Lees wieder

Streektaolconferčensie in Noordwolde in West-Stellingwaarf 31-05-2007 In ’t Vlechtwark in Noordwoolde is vrijdag 25 mei een internationaole streektaolconferčensie holden. Dik zestig man hebben luusterd naor ongeveer tien sprekers die een inleiding holden hebben over het streektaoalbeleid, op landelijk, provinciaol en lokaol niveau. De sprekers kwamen oet Nederlaand, Duutslaand en België. Piet Hemminga van de Fryske Akademy in Leeuwarden was dagveurzitter. Lees wieder

		Pet of veur Harm Soegies 24-05-2007 De Klokbeker in Nörg was dunderdagaovend 23 mei ofgeladen vol. De riege mčensen stun tot op het trottoir. Allemaol volk dat Harm Soegies de hand schudden wol, umdat e stopt as underwiezer an de schoel in Westervelde. Harm zee dat zölf trouwens aans: “Ik krieg nou meer tied veur aandere hobby’s.” Harm hef veul liefhebberijen, iene daorvan is het geven van cursussen veur het Huus van de Taol. Dat döt e geweldig goed. Dat e een fantastische underwiezer west hef, mot ok wal zo weden. Aans har der niet zoveul volk west. Met een aander bewies van zien veule verdiensten kwam burgemeester Hans van der Laan op de proppen. Hie was op de fiets kommen en toen e op het teniel stun, dee e een ket um de nak. Der was iene die miende dat e vergeten was, zien fiets goed te beveiligen tegen diefstal, maor het was zien ambtsketen. De burgemeester har namelijk een bar officiële handeling te verrichten. Hie much Harm Soegies vertellen dat het 'de keuningin behaagd har' hum lid te maken in de Orde van Oranje Nassau.
Harm, wij dčenkt dat de keuningin wal ies mindern op dizze manier eerd hef. Fillesteerd. Wij wčenst je, samen met Roely, een goeie toekomst wieder. Een toekomst met hopelijk veul tied veur het geven van Drenthecursussen!

Underwiesdag Midden-Drenthe 24-05-2007 De lesgevers van het basisunderwies in de gemiente Midden-Drenthe hebt maandag 21 mei heur jaorlijkse ontmoetingsdag had. De bijienkomst stun van ’t jaor in het tieken van cultuur. Umdat der ok bezuken an het Drents Archief en het Drents Museum in ’t vat zaten, weur de dag in Assen holden, in het ICO-gebouw. Lees wieder

De neie Taolkraant is der weer! 23-05-2007

Aj donateur binnen van de streektaolorganisaotsies Het Drentse Boek en Drentse Taol, kriej veer maol in ’t jaor de Taolkraant. Nummer 35 is lestdaogs verschenen en ’t is weer een mooi nummer worden. Domnie Hans Katerberg van de waarkgroep Kerkdeeinsten vertelt wat over ’t veurzichtige praoten van de Drenten. Jan Germs hef een stukkie schreven over ’t Huus van de Taol, de fusie tussen Drentse Boek, Drentse Taol en Oeze Volk.

Rieks Siebering hef een vraogpraotie holden met Harry Zomer en RTV Drenthe-prissentator Egbert Meijers mag in ‘Dat döt mij wat’ oetstukken wat gedicht hum wat döt. Dat, dievendaosie genog in dizze Taolkraant.

Aj slim beneid binnen naor de Taolkraant, wees dan zo loos om donateur te worden.

Vergeten woorden? 23-05-2007

In de neie Taolkraant staon ok een stuk of wat olde, vergeten woorden. ’t Zal oous nei dooun aj dizze woorden nog aal daogen bruken.

•	eerpelkrabbersvakaantie - extra schoolvakantie om aardappels te rooien
•	gasten, gaasten - op visite gaan
•	hanetree - korte afstand
•	holderd - einde van de werkdag, vrijaf na het werk
•	inschunen, instupen - influisteren, aanzetten tot iets
•	luiwievenknup - knoop die slecht houdt
•	hels - kwaad
•	sangblauwbont - pimpelpaars
•	rok, rak, rokkerig - loszittend
•	seupel - lam, slap

 

Stripverhaol over Jezus in ’t Limburgs 23-05-2007 ’t Bisdom Roermond prissenteert čend mei een neie oetgaove. Een stripverhaol over Jezus in een stuk of wat Limburgse streektaolen. Met dit boouk wil ’t bisdom ’t evangelie in de Limburgse taol onder de aandacht brengen van de Limburgers. Het eerste exemplaar wordt zaoterdag nao de internationaole pinkstermis in de kathedraol van Roermond oetlangd an mgr. Jozef Clemens, secretaoris van de Pauselijke Raod veur de Leken. Lees wieder

Dikke woordenboouken op internet 23-05-2007

De webstee van het Woordenboek der Nederlandsche Taal (WNT), saomensteld deur ‘t Instituut veur Nederlandse Lexicologie in Leiden, is vleden week bijwarkt en veurgeefs te bekieken. De liest met bronnen is oetbreid en der binnen een koppel verwiezings bij kommen. Het WNT zal in de kommende jaoren ok koppeld worden an de Bibliografie van de Nederlandse Taal- en Letterkunde (BNTL), het Woordenboek van de Brabantse Dialecten, het Woordenboek van de Limburgse Dialecten en het Woordenboek van de Vlaamse Dialecten.

Ok ’t Vroegmiddelnederlands woordenboek (VMNW), met meeist woorden oet de 13e eeuw kuj bekieken: http://gtb.inl.nl/?owner=VMNW. Daor kuj ok een liest met plantenaomen oet dizze eeuw, de beteeikenis van een 13e-eeuwse rechtsterm of onderzeuik naor persoons- of plaotsnaomen bekieken.

Taol bij ’t voetballen 16-05-2007

Aj an een teamsport dooun is ’t wel makkelk dat alle speulers dezölfde taol spreken. Op Damslog van Erik Dams http://www.erikdams.com/damslog/2007/05/het_geheime_wapen_van_ohl_1.html kuj lezen dat de speulers van voetbalclub OHL oet België almaol Nederlaands leren, omreden ze veul boetenlandse speulers derbij hebben.

Stichting Drentse taol begrep noe waorom WKE oet Emmen kampioen worden is in de hoofdklasse. Ze praoten daor almaol Drčents.

Nedersaksisch Vocaal Ensemble bestiet 1 jaor 16-05-2007 Het Nedersaksisch Vocaal Ensemble viert op zaoterdag 2 juni ankommend de eerste verjaordag met een verjaordagsconcert in Cultuurcentrum van Beresteyn te Veendam. Uutvoerd worden warken van Ede Staal, Herman Finkers, Harm en Roelof, De Thrianta’s, Alex Vissering, Klaas Spekken, Suze Sanders, Freek Kwint en Henk Kroeze. De bekende streektaolverteller Harm van der Veen uut Veendam warkt met an het concert. Kaorties veur ’t concert kosten € 5,00. Reserveren kuj via 0598- 634566 of vanberesteyn@veendam.nl

► Persbericht

▲ Bron afbeelding: http://www.annie-mg.com/intro.html

Annie M.G. Schmidtdag 09-05-2007 Annie M.G. Schmidt is misschie wel de beste kinderbooukenschriever van Nederlaand west. Met Jip en Janneke, Otje en ’t schaop Veronica hef zij personages schaopen die kinder nog aal anspreken. Annie Schmidt is geboren op 20 mei en daorom is die dag oetrooupen tot Annie Schmidtdag. Van ’t jaor wordt der in heul Nederlaand tussen 16 en 30 mei veul aandacht besteed an de schriefster. Veur dizze gelegenheid hef Drentse Taol ’t eerste hoofdstuk van Pluk van de Petteflat vertaold in ’t Drčents van Nörg.

Kuj Saterfries proten? 03-05-2007

Aal meer olde taolen in Duutsland wordt met oetstarven bedreigd. Het Saterfries, het Noord-Fries, het Nieder- en het Obersorbisch wordt deur aal minder mčensen proot. Um het immateriële cultuurgoed te redden moet kinder de olde dialecten zo vrog meugelk leren. Lees wieder.

Bedankt en weerkommen  03-05-2007

“’t Zijn de kleine dingen die het doen!” zungen Saskia en Serge al. Dat geldt ok veur het oetdragen van de streektaol. Keurslager Han Braamskamp oet Raol (Rolde) holdt van een goed preduct én van streektaol. Aj bij hum wat kocht hebt, stiet underan de kassabon “Bedankt en weerkommen”. ’t Is maor een kleinigheid, maor wij vindt het mooi!

Het Neie Testament 02-05-2007

Het Neie Testament in een hertaoling van Max Douwes is dunderdag 26 april prissenteerd in de kerk van Oring (Odoorn). Max Douwes hef Het Neie Testament čend jaoren zeuventig van de veurige eeuw al vertaold. Het is doedertied nooit oetgeven. Tweei leden van de warkgroep Kerkdeeinsten van het Huus van de Taol, Jennie Lambers-Niers en Frits Rosenbaum, hebben de vertaoling (Max Douwes zee altied hertaoling, omreden hij ’t niet oet de brontekst vertaolde) bewarkt en met wat centerij van de Provincie Drenthe en Drentse Taol hef Het Drentse Boek Het Neie Testament noe wel oetgeven. Het eerste exemplaor is oetlangd an Vrouw Douwes, de wedevrouw van Max Douwes.

’t Kerkie van Oring is kozen as as stee veur de prissentaotsie, omdat dizze kerk een belangrieke rol speult in de verhaolen van Max Douwes. De pries van het boouk is € 21,50 en ’t is te koop in de Drentse Boekhandels of te bestellen bij Stichting Het Drentse Boek op Zuudwolde.

Aj hier klikken, kuj een stukkie oet het Neie Testament lezen.

Kinder leren taolen op Dartigste Taolenfeest 02-05-2007

Lestdaogs is in de verschillende parlementen in Brussel ’t dartigste Taolenfeest holden. Kinder oet heul België en ok oet Brussel, hebben speulenderwies een aander taol leerd. In het Vlaams Parlement kunden Fraanstaolige Brusselaorties lessies Nederlands volgen. Lees wieder.

Gedichten Dodenherdenking 25-04-2007 Veer mei is de dag van de Dodenherdenking. Om aacht uur ’s aovends biw tweei minuten stil. Dan gedčenk wij aal mčensen die in de oorlog omkommen binnen. Stichting Drentse Taol hef daorom een stuk of wat Drčentse gedichten die over dit onderwaarp gaon op de webstee zet. Lees mor even wieder…

Symposium Streektaol en media 25-04-2007

SONT (Stichting streektaal organisatie in het Nedersaksisch taalgebied) hef op vrijdag 20 april in Ommen een symposium organiseerd over streektaol en media. Vertegenwoordigers van regionaole omrooupen zoas Roel Dijkhuis van RTV Noord, Tolsma van Omrop Fryslan en Egbert Meyers van RTV Drenthe hebben in ’t kört wat verteld over heur eigen omrooup en de rol die de streektaol daor speult. In Freeislaand wordt host allennig mor Freeis praot. In de Nedersaksische gebieden is dat jammer genog aans. Prissentators kunnen de Nedersaksische taol lang niet altied almaol spreken en as ze jan met de pet wat in ’t nederlaands vraogen, prat die meeisttied gien streektaol weerom.

Een kleine vieftig man was anwezig en de meeisten hebben heur meeining wel even heuren laoten. Der waren ok een stuk of wat provinciaole en landelijke politici die ofkomstig binnen oet het Nedersaksisch Taolgebied. Kopstukken zoas Henk Kamp, Sharon Dijksma en Johan Remkes waren der niet. De Grunneger dipteerde Hans Gerritsen hef zegd dat e hum in de kommende jaoren staark maoken zal om ’t Nedersaksisch, net as ’t Freeis, erkend te kriegen onder deel 3 van ’t Handvest veur Regionaole Minderheidstaolen.

Aj hier klikken, kuj nog een Nederlaandstaolig artikel lezen over dit symposium dat in de Stentor staon hef.

Les over Drents op VMBO 25-04-2007

‘t Huus van de Taol perbeert op alle schooulen (van peuterspeulzaolen tot de PABO’s) aandacht te kriegen veur de Drčentse taol. Binnenkört begunt der beveurbeeld een groot prejekt met de naom Klaor veur de Start op een stuk of wat peuterspeulzaolen.

Op de ofdeeiling VMBO Penta van ’t Nassaucollege in Assen hew in de ofgelopen maond tweei lessen geven. De eerste les ging vanzölf over de Drčentse taol, mor ook over aander taolen en meertaoligheid. De tweeide les hew een stuk of wat Drčentse schrievers en Drčentse verhaolen en gedichten bij de kop had. De leerlingen waren enthousiast en ankommend schoouljaor kriegen aal daarde klassen een paor lessen over de Drčentse taol en de Drčentse schrieverij.

Daniel Lohues hef Annie M.G. Schmidtpries wonnen 25-04-2007 Daniël Lohues hef de Annie M.G. Schmidtprijs 2006 wonnen veur ’t beste theaoterleeid van ’t jaor met ’t nummer ‘Annelie’. Dit leeidtie steeit op de solo-cd ‘Allennig’. De pries wör lestzundag oetlangd deur VVD’er Hans Dijkstal in theaoter Bellevue in Amsterdam. De pries is een bronzen borstbeeld van Annie M.G. Schmidt en 3500 euro. In de jury zitten vakmčensen zoas Martine Bijl, Kick van der Veer en cabaretrecensente Rinske Wels.

Aander lu die de pries ok al ies wonnen hebben, binnen Freek de Jonge en Robert Jan Stips met ‘Vergeet mij niet’, Erik van Muiswinkel en Diederik van Vleuten met ‘Tibetlied’ en Jeroen van Merwijk met ‘Dat vinden jongens leuk’.

Waspik prissenteert boouk en kös mooiste Waspikse woord 05-04-2007

‘t Braobaantse plaotsie Waspik hef daauwele (greeimen, motten) kozen as ’t mooiste Waspikse woord. Een groepie van vief mčensen hef tweei jaor haard waarkt an een onderzeuik naor de taol van Waspik. ’t Mooie risseltaot is ’t booukie ‘Waspikse praot’ dat noe verschenen is. Een booukie met verhaolen, anekdotes en een cd. Veerhonderd woorden staon op alfabet in de kantlien.

Marcel Donk, eein van de onderzeuikers vertelt: “Het gaat vaak om woorden die in de streek gesproken worden. Waspiks lijk op de taal van Dongen en 's Gravenmoer. Maar weer niet op de taal die in Sprang-Capelle wordt gesproken. Daar is vooral de uitspraak anders. Hier zeggen we kender als het over kinderen gaat, in Sprang is het keinder.”

► http://www.bndestem.nl/oosterhout/article1270048.ece (Nederlaandstaolig bericht)

Streektaolpries 2007 04-04-2007 De streektaolpries van Dagblad van het Noorden is van ’t jaor gaon naor Oetgeverij Kleine Uil veur de bundels 'De honderd mooiste Groningse gedichten' en 'De honderd mooiste Drentse gedichten'. Juryveurzitter Joep van Ruiten zee: “De winnende inzending is een bloemlezing die zichtbaar met veel liefde en kennis is samengesteld, zich richt op liefhebbers en leken en beide groepen op de wenken bedient. Met De 100 Mooiste Drentse en Groningse Gedichten heeft uitgeverij Kleine Uil wat inhoud en vormgeving betreft een prestatie van groot formaat geleverd. Deze bundels verdienen een plek in alle boekenkasten in Drenthe, Groningen en Friesland." Lees wieder.

Taoltoets veur kinder van een jaor of dreei? 04-04-2007

De Nederlandse staotssikketaoris van Onderwies Sharon Dijksma wil kinder van een jaor of dreei die opgruien in achterstandswieken van de veer grote steden in ’t westen, in Oost-Grunning en in Zuud-Limburg een taaltoets dooun laoten. Dat liekt nei, zeg de Amsterdamse hoogleraor Frans Hinskens, mor dartig jaor leden deden ze dat ok al. Dat hef doedertied niet opleverd wat ze hoopt hadden. In een artikel op de webstee van het Meertens Instituut stukt Hinskens de discussie oet de jaoren zeuventig nog ies oet en hij vertelt wat of we der vandaog an de dag van leren kunnen.

“De toon wordt gekenmerkt door het gebruik van wazige en beladen begrippen als ‘taalachterstand’. Achter de bedoeling kan men paternalisme vermoeden, maar of dat zo erg is? Het is echter wel te hopen dat men zich verdiept in wat er in de jaren zeventig gepoogd is en zijn voordeel tracht te doen met zowel de verworvenheden als de tekortkomingen van de taaltoetsen en de praktijk van het werken met taalcompensatieprogramma’s.”

► Meertens Instituut: http://nieuwsbrief.taalpost.nl/r/tp.plx?1886-650

Schrieverspetretten Lammert Huizing en Janny Alberts-Hofman  29-03-2007
		Al een jaor of veer worden der deur Albert Haar petretten op dvd en video maokt van bekende Drčentse schrievers en dichters. Aj kieken bij schrieverij/schrievers kuj ze almaol zeein. De leste paor maond is Albert Haar van RikRak Communications drok gaangs west met een schrieverspetret van dichteres Janny Alberts-Hofman oet Slien en journalist en amateur-historicus Lammert Huizing van ’t Hoogeveine.
► Schrieverspetretten ► Bestellen

Drents Dictee 2007 29-03-2007
		Jennie Lambers-Niers döt het weer “Goh, wat heb ik een stomme fouten maakt. Ik tel veur mijzölf zo al vief,” verzuchtte Jennie Lambers-Niers toen ze net oetschreven was. De winnares van het Drents Dictee 2005 en 2006 rekende dan ok niet op de hoofdpries in de spellingtoets van dit jaor. Maor… zie wun wal weer. Met maor zes fout har ze ien fout minder as Willem Wilms oet Zevenaar. Met acht fouten weur de winnaar van 2004, Henk Ovinge oet Hesseln, daarde. De poedelpries was veur Reino van Luytelaar, die 54 maol oet de bocht vleug. Reino woont nog maor dik een half jaor in Drenthe; hie is immigreerd oet Noord-Brabant umdat een schier wicht hum naor Drenthe lokte. Wij kunt daorum begriepen dat e wat veul fouten har. Aander jaor giet e het beter doen, hef e toezegd. Lees wieder.

'Een ze is neuimen ze in Noord-Drenthe een…' 21-03-2007

Hej muite um de zin hierboven te begriepen? En snap ie “Een ui is in ’t Drentse en …” wal? Nou je huuft je gien zörgen te maken, je hebt gien slietaozie an ’t benul. In de daarde meertmaondpuzzel in Dagblad van het Noorden is der bij het overzetten naor de kraant wat fout gaon. Dat gebeurt waor mčensen warkt. Der har staon moeten “Een zeis neuimen ze in Noord-Drenthe een….” en “Een ui is in het Drents een…” Wij hoopt daw je niet al te veul op ’t onstuur bracht hebt.

Het lop trouwens merakel goed met de puzzels. Wij wordt aal week overspuuld met oplössings.

▲ Giet het Huus van de Taol der zo oet zien?

Huus van de Taol 21-03-2007 Formeel en officieel is het Huus van de Taol der op ien meert kommen. In de praktijk is der nog niet veul veraanderd. Oeze Volk, Het Drentse Boek en Drentse Taol bint der eigenlijk nog. Dat betiekent niet, dat der niet an warkt wordt. Achter de scharms gebeurt van alles op het gebied van bestuur, personeelsbeleid, hoesvesting, bedriefsplan enz. Zo gauw as der dinger te melden valt, kriej het te heuren!

Negende Dialectendag in Mechelen in België 21-03-2007 In ’t Aarfgooudcentrum Lamot in Mecheln, tussen Antwaarpen en Brussel, in België is op zaoterdag 17 meert de Negende Dialectendag holden. Thema hef dizze reis west: 'Dialect in het spel'. Op ’t programma stunden lezings zoas ‘taalvariatie in de kinderspelwoordenschat’, en ‘spelcultuur op tillevisie’ en workshops zoas ‘chattaol van jongvolk’, ‘een Mechelse dialectwandeling’ en aal zuks wat meer. De waarknemers van Drentse Taol binnen derhen west. Op de vrijdag veur de dialectendag an hebben ze overleg had met de collega’s van aander streektaolinstituten.

Watveur streektaolnaomen hef touwgiespringen in Nederland? Wat zeggen ze in Braobaant tegen vortverkruperie? En wat oetdrukkings bruken ze in verschillende gebieden veur knikkers en knikkern. Zo mor een stuk of wat vraogen die an de orde kommen binnen op de Negende Dialectendag in Mechelen over Streektaol in spellegies. As der een dialectendag holden wordt, verschient der ok altied een boouk met artikeln oet alle regio’s van Nederland en België. Dizze keer hebben een stuk of vieftie schrievers interessante dingen schreven over spellegies. ’t Boouk is slim de muite weerd. Je kunnen ’t bestellen bij de Stichting Nederlandse Dialecten (SND). http://www.ru.nl/dialect/snd/ Met tweei jaor wordt de tiende Dialectendag holden. Wij hopen dat die wat dichterbij holden wordt. Dan heuiven de Drenten met belangstelling veur streektaol niet zo wied vort.

Drenten wies met eigen taol 21-03-2007

De previncie Drenthe hef deur middel van het Drents Panel underzuuk doen laoten naor 'Drenten en hun taal, een onderzoek naar de houding en het standpunt van de Drentse burgers ten opzichte van hun taal'. 1434 leden van het Drents Panel hebt de liest met twintig vraogen invuld en weerumstuurd. Der waren vraogen over de taolachtergrond, het taolgebroek, de taolholding en taolbevördering. Lees wieder.

► Veur het hiele underzuuk 'Drenten en hun taol': klik hier (pdf-bestand, 312 Kb)

		Bluebonnet Blues 21-03-2007 Bluebonnet is de naam van een lupinensoort, die in Texas veurkomt. Egbert Meyers hef in Austin verscheiden maol optreden en hie is daor feilijk op het idee kommen um ok ies een Engelstaolige cd te maken. Zundag 18 meert lestleden weur het risseltaot, 'Bluebonnet Blues' prissenteerd in café Hofsteenge in Grol. Het was der warm en drok en veur Egbert slim mooi dat der zoveul volk was. Voetbaljournalist Johan Derksen kreeg het allereerste exemplaar.
'Bluebonnet Blues' is cd-van-de-week bij RTV Drenthe. Wij vindt dat een goeie keus. Wij vindt Egbert zien oetstap naor het Engels gloepends aordig, maor wij hoopt dat zien volgende cd weer in het vertrouwde Drčents klinken zal. ► www.egbertmeyers.com

De zomer van ‘59 21-03-2007 In 1959 was de zummer lang, hiet en dreug. Het leup ok tegen het čende van de vieftiger jaoren, en de boezige jaoren zestig stunden an de deur te rammeln. Dat, een biezunder jaor. Jan Veenstra schreef der een (Nederlandstaolig) boek over: ‘De zomer van ’59’. Jan Veenstra hef al hiel wat schreven, in de streektaol én in ’t hoge. Dat e dat aordig schier kan, mag blieken oet het feit dat e in 1997 de SNS-literatuurpries wunnen hef. Wij denkt dat ‘De zomer van ’59’ het weerd is um veul lezen te worden. De prissentatie van de roman was op vrijdag 16 meert in Stad. Harry Muskee (Cuby dus) en Rense Sinkgraven (stadsdichter van Stad) kregen de eerste exemplaren. De zomer van ’59 hef 208 bladzieden en kost € 16,90. Aj der meer over weten wilt: www.uitgeverijpassage.nl

Underbouwdagen over verwondering groot succes 21-03-2007

De Regionale Underbouwdagen van 7 en 14 meert in Martiniplaza in Stad waren een groot succes. Zowat 800 lesgevers van de underbouw, leidsters van peuterspeulzalen en kinderdagverblieven oet de previncies Grunning, Fryslân, Drenthe en zölfs Overiessel waren op dizze dag ofkommen. Jan Germs was der namens het Huus van de Taol en hef der warkwinkels geven. Zaoterdag 10 meert har e ok al warkwinkels an leidsters en metwarkers van Sedna in Emmen geven.

Twintigdoezend man op de beein veur erkenning Occitaans 21-03-2007 Zowat twintigdoezend man hebben zaoterdag 17 meert heur stem heuren laoten veur de erkenning van ’t Occitaans. De manifestaotsie veur ’t Occitaans, een minderheidstaol in Zuud-Frankriek, was organiseerd deur zes saomenwaarkende organisaotsies onder de naom Anem, veur de Occitaanse taol! De organisaotsie wil dat ’t Occitaans een officiële taol wordt in stee van een host dooie taol. De organisaotsie hef steun kregen van presidentskandidaote Ségolčne Royal die zegd hef dat Frankriek verantwoordelijk is veur de culturele en taolige verscheidenheid, noe en in de tooukomst.

’t Occitaans is een taol die in Zuud-Frankriek sproken wordt, mor taolkundig meer liekt op ’t Catalaans van Noord-Spanje. Tot an de 12e eeuw waren ze eein taol. ’t Occitaans hef hum ontwikkeld oet het Volkslatien. In de 12e, 13e en 14e eeuw was ’t Occitaans slim belangriek, mor nao die tied wör ’t Fraans aal belangrieker.

Vandaog an de dag is ’t Occitaans een bedreigde minderheidstaol worden. Viefenzestig percent van Occitanië begrep ’t Occitaans nog en 2 miljoen mčensken spreken ’t nog aal daogen. Veur meer infermaotsie over ’t Occitaans kuj kieken op: http://nl.wikipedia.org/wiki/Occitaans.

Literaire Hemel 14-03-2007

In café De Amer in Aomen is vrijdagaovend 13 april de leste Literaire Hemel van dit seizoen. Zoas altied steeit de Literaire Hemel van april in ’t teeiken van de Tweeide Wereldoorlog.

Annette Timmer holdt een vraogpraotie met de schriefster Steffie van den Oord en Lukas Koops prat met de Drčentse dichter Anne Doornbos. Van den Oord hef cultuurgeschiedenis en literatuurweeitenschap studeerd. In 2004 is heur boouk ‘Liefde in oorlogstijd oetkommen. Heur neiste boouk heeit ‘’ Westerbork girl’. Anne Doornbos is veurzitter van het Huus van de Taol. In meert is zien eerste gedichtenbundel ‘Een eerder laand’ prissenteerd. In zien daogelijks leven is Anne gemeeintesikketaoris in Noordenveld.

Frits Grimmelikhuizen vertelt in Hemel of Hel over schriefster Etty Hillesum. In 1943 is zij saomen met heur familie naor Auschwitz brocht en daor is ze ‘tzölfde jaor nog vermoord.

Kaorten kuj bestellen bij café De Amer 0592-389271 of op www.literairehemel.nl
 

Meertmaond Streektaolmaond 14-03-2007 't Is weer zo wied, ’t is weer meertmaond-streektaolmaond! Der steeit weer veul te gebeuren op Drčentstaolig gebied. Aj even weeiten willen wat der almaol te dooun is in dizze maond, dan moej hier even klikken, dan kriej een overzicht.

 

		Gevuul veur de eigen streek 08-03-2007 Wij hebt de verkiezings veur Provinciale Staten al weer had. Aal maor weer lazen wij dat der twiefel is over het bestaonsrecht van previncies. Zie komt der vaak niet best of en de opkomst bij de verkiezings gaf ok gien reden um de vlag oet te steken. Raor toch, daw met mekaar niet grootser bint op oeze democratische rechten.
Op 7 meert gaf Netwerk andacht an het gevuul dat mčensen veur de previncie hebt. An het woord kwamen under andern Daniël Lohues, Jack Poels (zanger Rowwen Hčze) en Anne van der Meiden (Twentse dominee, die de biebel vertaold hef). Slim de muite weer um de oetzending nog ies te bekieken (op de helft komt het stuk met Lohues enz.).

 

Een zaoterdag op het previnciehoes 08-03-2007 Op zaoterdag 3 meert hef der een open dag op het previnciehoes west. Der was hiel wat divvendaozie. In de cultuurhoek hef Margaretha Kleine twei maol optreden. Het Huus van de Taol stun der met een kraom. En ok op aander steden was het gien prebleem um streektaol te proten, zoas oet bijgaonde foto wal blek.   ► Hej ok belang bij ien of meer stickers? Stuur dan een an jezölf geadresseerd kevort met € 0,44 an postzegels derop an Drentse Taol!

Streektaoldag op de Weerdingermond 08-03-2007

Aj goed met mekaar samenwarkt, kunt der mangs schiere dinger kommen. De Historische Vereniging Zuidoost-Drenthe hef het veurtouw neumen um een mooie streektaoldag te organiseren. ’t Aol' Volk, het Volk van Grada, de Culturele Raad Nieuw Weerdinge en Dorpsbelangen doet ok metan. Het risseltaot mag der weden:
 

•	Vrijdag 30 meert komt 377 kinder van de basisschoelen van de Weerdingermond naor de sporthal veur een prachtige dag. De hiele maond hebt de kinder zuch hier al op veurbereid, u.a. deur Drentstaolige gedichten in te studeren;
•	Vrijdag 30 meert is der van 19.30 uur tot 22.00 uur een aovend in het kader van de Drentse taol in dörpshoes De Badde. Veurdrachten (u.a. van Willemijn Dijkstra, de winnares van de veurdrachtswedstried van ’t Aol' Volk), meziek (Henk Scholte van Törf) en een lezing (Albert Haar) staot op het pregram.

Gloepends mooi al met al!

Streektaolfestival 'Plat op de plaanken' 07-03-2007 Veur de zesde maol organiseert café 't Keerpunt in saomenwaarking met Radio Loep ’t streektaolfestival Plat op de Plaanken. Op zaoterdag 24 meert van een uur of aacht of kommen de volgende streektaolartiesten op ’t podium: Martin Korthuis, Erwin Nijhof, Jan Veenstra, Marga Kool en Geert Jan Brader. Café ’t Keerpunt zit an de Oostermoer 1 op Spiekerboor. Op de website www.tkeerpunt.nl kuj van alles lezen over dizze oerolde kroeg.

Taol an Taofel 01-03-2007

Zundag 25 meert is de leste Taol an Taofel van dit seizoen in Nörg. In hotel-restaurant 'De Klokbeker' komt Anne Doornbos (gedichten), Martijje Lubbers (meziek) en Jan Germs (proza). Um een uur of twaalf stiet het warm eten klaor.

► Persbericht

Meertmaond lös 01-03-2007

Op dunderdagmiddag 1 meert is in ’t previnciehoes in Assen de meertmaond feestelijk lösdaon. Even veur de middag binnen de papierderijen veur ’t neie Huus van de Taol onderteeikend deur veer leden van het bestuur van het Huus van de Taol: Anne Doornbos (veurzitter), Frits Gerrits (sikketaoris/pongholder), Ryan Schepers en Rieks Siebering. Het neie Huus van de Taol is een fusie van Stichting Het Drentse Boek, Stichting Drentse Taol en Oeze Volk. As der een mooi ‘huus’ vonden is, gaon dizze dreei stichtings ok bij mekaor in ’t hok zitten, mor noe blieven ze nog even op heur eigen stee zitten. We holden dus ok nog even ’tzölfde tillefoonnummer, ’tzölfde lienpostadres en dezölfde webstee.

Nao ’t officiële gedeeilte hebben de vrouwlie van Vrouwentoneel Erica heur neie eeinakter 'HIBO Party verkoopdemonstratie' opvoerd. Daornao kwam Margaretha Kleine op ’t podium om een stuk of wat van heur Drčentse leeidties te zingen.

Meertmaond in Noordenveld 01-03-2007
		De gemeeinte Noordenveld döt aal jaor wat an streektaol in ’t Drčents. Van ’t jaor wordt de dichtbundel ‘Een eerder laand’ van Anne Doornbos prissenteerd veur de raodsvergaodering an. Bezeuikers van ’t gemeeintehoes in Roon kriegen in de meertmaond een kogel en een stuk of wat neuten waor ze met neutenscheeiten kunnen. Boetendes kriegen ze de Drčentse en Nederlaandse spelregels van ’t neutenscheeiten met. De historische vereeinings van Paais, Roon en Nörg hebben in de hal van ’t gemeeintehoes een tentoonstelling over Paosen inricht. Stichting Drentse Taol is vanzölf bliede met dizze aandacht veur de streektaol. Wij hopen dat der meer gemeeinten binnen die aander jaor meert de streektaol een plekkie geven willen.

Wies met Coevern! 01-03-2007

Wij bint wies met de gemiente Coevern. Zie geeft van ’t jaor in de meertmaond extra andacht an de streektaol. Het begun is der al en zal blieven: de algemiene bladziedes op de webstee bint van nou of an ok in het Drčents te lezen. Drentse Taol hef veur de vertaoling zörgd. Kiek maor ies op www.coevorden.nl. Lees wieder.

Vieftig jaor streektaol op pad naor de volgende bibliotheek 27-02-2007 De reizende tentoonstelling 'Vieftig jaor streektaol bij ’t pad' hef in febrewaori in de bibliotheek van Beilen staon. In de meertmaond is de bibliotheek van Aalden an de beurt. Het volk daor kan een hiele bult informatie opdoen, genieten van mooie beelden deur de dvd en het luusterboek veur € 9,95 kopen. Lees wieder.

Dag van de Moedertaal 21-02-2007

De UNESCO hef 21 feberwaori oetrooupen tot dag van de Mooudertaol. Dizze dag steeit in het teeiken van taolkundige en culturele verschillen en meertaoligheid. Veur de UNESCO holden taolen ’t culturele aarfgooud levend. Deur de mooudertaol in eren te holden, blif de taolkundige en culturele traditie bestaon en worden mčensen gewaor dat der verschillen bestaon tussen groepen mčensen. Zo kriej meer begrip veur mekaor.

De anleiding om dizze Internationaole Mooudertaoldag op 21 feberwaori te vieren, binnen rellen in Pakistan in 1952. Een koppel studenten binnen doedertied bij demonstraties omkommen. De demonstranten wolden dat ’t Bangla, de zesde taol van de wereld, ok erkend wör as een officiële taal van Pakistan. Pakistan bestun toen oet Oost- en West-Pakistan, ’t tegenwoordige Bangladesh en Pakistan. De regering stelde dat allennig ’t Urdu de taol van Pakistan was.

In debatcentrum Tumult wordt op woensdagaovend 21 feberwaori, 20.00 uur, een debat holden over mooudertaol en meertaoligheid. Bernadette van Dijck, manager RNTC Europe; leidt het debat met: Petra Prescher, germaniste RUG; Leonie Cornips, onderzoeksleider Variatielinguďstiek Meertens Instituut; Abder el Aissati, docent onderzoeksgroep Babylon, UvT en Jacomine Nortier, taalkundige Universiteit Utrecht. Locatie: LHC, Tolsteegbrug 1, Utrecht. Infermaotsie en risserverings: 030-2332430 / www.tumultdebat.nl.

De Rageboll’n zuukt een bassist! 21-02-2007
		Streektaolrockband De Rageboll’n is op zuuk naor een neie bassist. De Rageboll’n schrieft heur eigen nummers in de streektaol. Een koppel staot op de cd’s 'Veuruut' (2006), 'Spiekers met kopp’n' (2003) en 'Altied teeg’nwind' (2002). De Rageboll’n rippeteert ienmaol in de week. Zie treedt verscheiden maol in ’t jaor op, u.a. op festivals en in kroegen. Zie hebt een eigen oefenruumte op Klazienaveen. Aj meer weten wilt, kuj kieken op www.ragebollen.nl. Je kunt ok een lienberichie sturen naor ragebollen@wanadoo.nl of even bellen met Richard ten Caat (0591-622715).

Rouvoet hef de Lofpries wonnen 21-02-2007

ChristenUnie-politicus André Rouvoet hef de Lofprijs der Nederlandse Taal 2006 kregen. Rouvoet hef die pries wonnen, omreden de ChristenUnie in ’t partijprogram staon hef dat de Nederlandse taol in de grondwet verankerd wordt. In ’t regeerakkoord van ’t neie kamnet Balkenende is dit ok vaastlegd. Rouvoet mus in de baon met Edsilia Rombley, de Volkskrant en Mohammed Benzakour. In 2004 hef de Koninklijke Nederlandse Academie van Wetenschappen de pries kregen. Vleden jaor was Gerrit Komrij de winnaor. De winnaor wör kozen deur bezeuikers van de webstee van de Stichting Nederlands oet een liest met MaondLof’s en -Sof’s.

De Sofprijs der Nederlandse Taal 2006 is gaon naor het ministerie van Economische Zaoken. Dit ministerie hef dizze pries kregen, omreden ze perberen zo Engels meugelk over te kommen. In heur berichten an de kraanten bruken ze onneudig Engelse woorden. Ze organiseren bijeeinkomsten veur Nederlaandse ondernemers die heulemaol in ’t Engels binnen en ze bedčenken Engelstaolige naomen veur campagnes en aal zuks wat meer. Veurig jaor gung de Sofprijs naor Karla Peijs, mor die was dizze reis kandidaat veur de Lofpries. Eerdere winnaors van de Sofprijs waren Philips (2004) en Neelie Kroes (2005). Op Philips nao wolden aal Sofprieswinnaors de pries niet in ontvangst nemen.

Het krudige Veenkoloniaals in de Eerste Kamer? 01-02-2007 Ien van de bestuursleden van Stichting Drentse Taol is Greetje de Vries. Zie is u.a. old-gedippeteerde van oeze previncie en hef een bult bestuurlijke ervaring. Een weerdevol bestuurslid, die ok nog ies prachtig Veenkoloniaals proten kan. Greetje de Vries stiet op de tiende plaots van de CDA-liest veur de Eerste Kamer. Da’s mooi, want dat levert zowat zeker een zetel op bij de verkiezings deur Provinciale Staten in mei. In juni is daornao de installatie.

Geluudsfragment Derk Jan ten Hoopen 21-02-2007 Derk Jan ten Hoopen hef jaorenlaang hoesdokter west op Zuudwolde, mor van oorsprong is e ofkomstig oet de Achterhoek. Hij schref gedichten in zien mooudertaol. Hij hef der veur een dikke maond over verteld in De Literaire Hemel. Aj hier klikken, kuj een stukkie beluustern (mp3-bestand, 1833 Kb) dat geeit over ’t schrieven in de streektaol.

Nationaole Veurleesdaogen 01-02-2007 Op dinsdag 30 jannewaori binnen in Nederlaand de Nationaole Veurleesdaogen begonnen. Dizze daogen binnen insteld om de kinder die zölf nog niet lezen kunnen, leeifde veur lezen en boouken met te geven. Stichting Drentse Taol döt vanzölf ok met an de Veurleesdaogen. Wij lezen in ’t Drčents veur an kinder op Schoonoord (kiek mor ies naor de mooie foto’s) op d’Olde Smilde (Hoogersmilde) en in Emmer-Compascuüm.

		DvhN Streektaolpries 08-02-2007 Vleden jaor hef Henk Nijkeuter de streektaolpries van het Dagblad van het Noorden wonnen met het boouk ‘De dichter en de wichter’, waor alles over en van de schriever Hans Heyting in te lezen is. Een gloepends mooi boouk en dat von de jury ok. Van ’t jaor wordt der weer een streektaolpries oetlangd deur dagblad van het Noorden. Op zundag 2 april wordt de pries feestelijk oetlangd.
De tweeide DvhN Streektaolpries richt zich op waark oet 2006 van amateurs en professionals. Veurweerde is dat de streektaolproducten veur een breeid pebliek beschikbaor west hebben, of nog aal te koop binnen. Elkeneein kan tot 15 feberwaori Grunnegstaolige of Drčentstaolige boouken, speeigelplaoties, films en aal zukswat meer veurdraogen veur de streektaolpries 2007 an DvhN Streektaalprijs, Postbus 60, 9700 MC Groningen of via streektaalprijs@dvhn.nl. Veur ’t wedstriedreglement kuj ok kieken op www.dvhn.nl.

Luusterboek te koop bij Drentse Taol 06-02-2007 Zaoterdag 27 jannewaori is ’t luusterboouk ‘Vieftig jaor Streektaol bij ’t pad’ prissenteerd in de bibliotheek in Beilen. Dit luusterboouk is maokt naor anleiding van ’t vieftigjaorig bestaon van Oeze Volk. De cd is saomensteld deur een redactie, die bestun oet Abel Darwinkel (stafmetwarker Drentse Taol), Tjaart Imbos (redacteur Oeze Volk) en Hans Jalvingh (redacteur Roet). Zij hebben 66 verhaolen en gedichten van Drčentse schrievers en dichters oetkozen. De teksten binnen insproken deur Herma Stroetinga (RTV Drenthe), Jan Germs (Drentse Taol), Egbert Hovenkamp (Drentse Taol), Albert Haar en de redactieleden. ’t Luusterboouk is noe ok te koop bij Stichting Drentse Taol (0592-381172 of drentsetaol@pbcdrenthe.nl) veur € 10,50 (= € 9,95 + € 0,55 verzendkosten).

Dizze dubbel-cd, produceerd in saomenwaarking met RTV Drenthe, is uniek, omreden der een stuk of wat fragmenten bruukt binnen van oldere opnaomes zoas ‘Stemmen oet Drenthe’ oet 1969, zodat ook de markante stemmen van overleden schrievers as Hans Heyting en Max Douwes te heuren binnen.

Dizze cd is meugelk maokt deur een bijdraoge van het Prins Bernhard Cultuurfonds en de Provincie Drenthe, het VSB-fonds Groningen-Drenthe en het maondblad Oeze Volk.

Negende Dialectendag in Mechelen in België 06-02-2007 In ’t Aarfgooudcentrum Lamot in Mecheln, tussen Antwaarpen en Brussel, in België wordt op zaoterdag 17 meert de Negende Dialectendag holden. Thema dizze reis is: 'Dialect in het spel'. Watveur streektaolnaomen hef touwgiespringen in Nederland? Wat zeggen ze in Braobaant tegen vortverkruperie? En wat oetdrukkings bruken ze in verschillende gebieden veur knikkers en knikkern. Zo mor een stuk of wat vraogen die an de orde kommen kunnen op de Negende Dialectendag in Mechelen over Streektaol in spellegies. Op ’t programma staon lezings zoas ‘taalvariatie in de kinderspelwoordenschat’, en ‘spelcultuur op tillevisie’ en workshops zoas ‘chattaol van jongvolk’, ‘een Mechelse dialectwandeling’ en aal zuks wat meer. ’t Heule programma kuj vinden op http://www.vcv.be. De dialectendaogen worden organiseerd deur de Stichting Nederlandse Dialecten (SND). Op heur webstee http://www.ru.nl/dialect/snd/ kuj veul lezen over de dialectendag van tweei jaor leden en over de ankommende dialectendag. Aj geern naor de dialectendag in Mechelen willen, kuj je anmelden op de volgende webstee: http://www.vcv.be   Bakerproot 06-02-2007 Zu’n halve ieuw leden weur der ok al underzöcht of met twei taolen opgruien slecht weden zul veur de ontwikkeling van kinder. Dat gebeurde veural in de Verenigde Staten. Over ’t algemien kwamen de lu met aandere moedertaolen der slecht vanof. Kinder met bijveurbield het Spaans as eerste taol scoorden slechter as heur Engelsprotende leeftiedgenoten. Conclusie: as kinder met twee taolen opgruit, doet ze ’t slechter op schoel. Jammer is ’t wal dat der bij die underzukings gien rekening holden weur met het feit dat de van oorsprong Spaanstaolige kinder in een veur heur vrumde taol test weurden. Lees wieder.

Vieftig jaor streektaol bij ‘t pad 17-01-2007 Der wordt al meer as vieftig jaor stief an de weg timmerd, as het giet um de Drentse streektaol. In de tentoonstelling “Vieftig jaor streektaol bij ’t pad” wordt een beeld geven van ontwikkelingen op het gebied van de streektaol in de leste vieftig jaor. Een beeld dat ok mooi oettiekend wordt op de gelieknamige DVD, verzörgd deur Rikrak Communications. Wij wilt het Drents ok geern laoten heuren. Wij bint der dan ok slim wies met, daw tiedens de opening van de tentoonstelling op zaoterdag 27 jannewaori het ‘Drentse Luusterboek’ prissenteren kunt. Een mooie dubbel-cd met wark van zesenzestig schrievers en dichters. De tentoonstelling giet het kommende jaor an de reis deur de hiele previncie. De eerste halte is de bibliotheek van Beilen. Elkenien kan daor van 29 jannewaori tot 23 febrewaori hen gaon um het allemaol te bekieken. “Vieftig jaor streektaol bij ’t pad” is mandielig organiseerd deur Oeze Volk, Het Drentse Boek, Provinciale Bibliotheekcentrale Drenthe en Drentse Taol. Het geld is beschikbaar steld deur het Prins Bernhard Cultuurfonds. VSB-fonds Groningen-Drenthe en de previncie Drenthe.

Huus van de Taol op TV Drenthe 16-01-2007 Vanaovend (dinsdag 16 jannewaori) giet het tillevisieprogramma ‘Drents Diep’ van RTV Drenthe over het Huus van de Taol. Zoaj weten kunt, zal de Kemissie Welzijn en Cultuur van de previncie hier mörgen over proten. RTV Drenthe lat vanaovend verscheiden lu van poletieke partijen oet oeze previncie an ’t woord. Annne Doornbos zit namens de drie streektaolintellingen bij Andries Ophof in de studio um commentaar te levern. De oetzending is nao het regionale neis en wordt de hiele aovend herhaald.

"Stille" 10-01-2007

"Ik bin čempies stille ewest en ik heb mien gedachten ies hielemaole of esleuten, veur al ’t feestelijke en al ’t gruwelijke wat deur middel van de media de huuskamer in esmeten wördt. Wij bint daor mangs veuls te veule mit bezig, mit de sensatie van die tilleviesie en internetbeelden. ’t Belemmert oons in ’t stille weden." Lees wieder

Neie streektaolconsulent in de Achterhoek 10-01-2007

Streektaolmetwaarker in de Achterhoek, Geert Roelofs is der an ’t čende van 2006 met opholden. Zien vervanger Arie Ribbers is al begonnen. Zien eerste vraogpraotie hef e ok al had. Aj hier even klikken, kuj ’t lezen: http://www.tctubantia.nl/regio/winterswijk/article967761.ece

Meer andacht en geld veur de Drčentse taol en schrieverij 10-01-2007

Wat der boven dit stukkie stiet hew niet zölf verzunnen. Het komt oet het verkiezingspregram van de Socialistische Partij in Drenthe. Wij vindt het mooi, dat het der zo dudelk in stiet. En wij vindt het ok slim aordig, dat de SP heur verkiezingspregram in het Drčents overzetten laoten hef deur Drentse Taol.

Ientaolige Drenten die allén maor streektaol proot en leest bint der niet meer. Daor is het Drčentse pregram dus niet veur neudig. Maor de partij gef zo wal an, dat ze slim veul weerde geeft an de taol as underdiel van oes levende cultuurgoed.

◄ weerum naor het thoesblad