’t Is zummer en daor binnen prachtige gedichten over schreven. Aj hier klikken kuj een stuk of wat Drèentse zummergedichten lezen.

Hans Heyting - Zommeraovend

De waereld lop op
zachte zieden hozen
de nacht in de muut.

Kamperfoelie en rozen
drinkt dauw en geurt zuut.

In een hemel van
bedauwde blauwe droeven
zoeft de vleugels van
twee late doeven.

De aovendwind waakt
en douwt speuls tegen
mien wiedopen raam
dat piept op de haak.

Oet: Scheupers van de taol

Gré Seidell-Broekhuizen - Hoogzomer

Wanneer de dauw nog druppelzwaor
dof dale hangt, op ’t keerpunt waor
nog stilte is van ’t nacht’lijk zwiegen,
begunt wied vot een locht te stiegen
aover de drömpel van de morgen
ánzet van zegen en van zorgen.
In ’t schemergries van lochtig glop,
Drenthe wordt wakker en stiet op.

Een leeuwerik drag heur lichte lach
hoog naor de klaorte van de dag
en ’t vredig vee komp saam edreven
um witte wèelde of te geven;
er giet een golden golving deur
de riepe rogge langs het speur.

En as ze ’s aovends muu, verhit
nog even op de huken zit
tegen de holtwal, vuult ze ’t beven
van het zowat voldragen leven
en mit een glömlach op ’t gezichte
knupt ze heur nevelnachtjak dichte.

Oet: Scheupers van de taol

Rieks Siebering - Zummer

umdat
er gien begun anzit
liekt der ok gien ende
an te komen

liekt het wel

het was al aovend
en zummer
altied valt het weer samen
zummer en een jaorenlange nacht

ik was onderwege
worde as de bewegens
worde bewegens
balanceren in bewegen
bij oe wezen is stillestaon

Oet: Scheupers van de taol

◄ weerum naor het thoesblad