Leden van de Eerste en Tweeide Kaomer, moi volk,
Bliede daj der binnen. Wij zitten hier van ’t jaor in de Ridderzaol die vanneis
inricht is. Dizze historische zaol is een symbool van oouze rechtsstaot. 22
november ankommend binnen der verkiezings veur ’n neie Tweeide Kaomer. De
regering hef daor rekenschap met holden bij ’t opstellen van de begroting veur
2007. De volgende regering kan in de kommende jaoren met dizze begroting gaangs.
Nederlaand is een staark, riek en vrij laand. Dan kuj der vanzölf neeit om hen
dat oous laand roeziederij en noodsituaoties in de wereld helpt anpakken. In de
maande met aander staoten perbeer wij der veur te zörgen dat aal landen zich
holden an de internationaole regels en wetten. Nederlaandse soldaoten dooun in
’t boetenlaand heur best veur de veiligheid en om ’t laand vanneis op te bouwen.
De manlu en vrouwlie van ’t Nederlaandse leger binnen an ’t waark in landen as
Afghanistan, Soedan, Bosnië, Irak en Congo. De soldaoten hebben een beste
opleiding had en dooun heur waark met inzet en overtuging in een omgeving die
slim gevaorlijk is. Ze weeiten dat wij heur haalf staon. De regering dèenkt an
de femilie en vrienden van de naobestaonden van soldaoten die oet de tied kommen
binnen.
Het lot van de wereld is ok oous lot. Wij blieven vechten tegen armoou en
zeeikte, en veur een beter milieu. Nederlaand helpt mèensken in
ontwikkelingslanden an schoon waoter, duurzaome energie, medicienen, en gooud
onderwies. De regering is vanzölf niet de eeinige die hulp böd, ok börgers,
bedrieven en organisaotsies helpen met.
Oous laand wil een positieve rol speulen in de wereld, deur gooud met aander
landen saomen te waarken. Der is veul kribberij, der is terreurdreiging, en
daorom moe’n we noe zeein laoten dat der aander oplössings binnen veur geweld en
onrecht. Nederlaand wil creatief metzeuiken naor neie oplössings.
Eein van de plakken om in de maande preblemen op te lössen is de Europese Unie. De regering is in de Unie gaangs met vraogen die het daoglijks leven van de mèensken angeeit. Zoas oouze veiligheid, oouze welvaart, oous milieu en oouze energieveurziening; dizze zaoken kun we op ’n besten mandeeilig regeln met aander Europeaonen. De regering wil leeiver an dizze praktische zaoken waarken, as aal mor praoten over hoou of de Europese Unie deroet zeein moet.
De landen in oous keuninkriek - Nederlaand, Aruba, en de Nederlandse Antillen
- moe’n zörgen dat ze in eein schip kommen over hoou of ze in de kommende jaoren
saomenwaarken gaon. Daor moew almaol oous best veur dooun. De regering zet hum
in veur een gooud risseltaot. Ik gao zölf binnenkört oet gaasten in de
Caribische landen van ’t keuninkriek, en dat liekt mij wel mooi toou.
Nederlaand nemp zien verantwoordelijkheid in de wereld. Dicht bij hoes hol wij
oous an de naoberplicht: we helpen mekaor zo veul as wij kunnen. De regering wil
geern dat aal mèensken in Nederlaand wieder kommen, en dat ze niet an de kaant
staon. Daor hew onderwies veur, en dat moet dan wel onderwies weden waor of
mèensken enthousiast van worden en waor of ze neie ideen van kriegen. De
regering wil derveur zörgen dat meer leerlingen een stage volgen kunnen, of
waarkervaoring kriegen kunnen. Leraoren hebben meer vrijheid neudig om heur
lessen an te passen an wat de leerlingen bruken kunnen. Daorom kommen der minder
overheidsregels veur de schooulen. As blik dat een schooul gooud waark levert,
zal de onderwiesinspectie niet meer zo gauw ankommen.
’t Is niet zo mooi dat veul jongen gien diploma haolen en der binnen ok aal
meer kinder die in hoes of in de buurt preblemen hebben. We moe’n dizze jongen
niet mor zo geworden laoten. Om der veur te zörgen dat ze in elk geval naor
schooul gaon tot ze een diploma haold hebben, hew de leerplicht verlengd tot
achttie jaor. Wel niet om liek wil, krig begeleiding.
In de jeugdzörg binnen nog aal waachtliesten. De instellings gaon die
waachtliesten van ’t jaor nog opschonen deur beter saomen te waarken; ze kriegen
daor ok meer centen veur. De regering wil an gezinsvoogden meer meugelkheden
geven om jongelu gooud te begeleiden.
De misdaod nemp of; dat is bleken oet onderzeuik. Mèensken binnen niet meer zo
benauwd. De regering wil dat dizze verbetering gauwer geeit; daorom komp der
meer centerij veur de plietsie en veur een veilige omgeving in de grote steden.
Vanzölf moe’n we ok de dikste onhemmels anpakken.
Oj noe jong of old binnen, dik in order of zeeik, elkeneein in oous laand moet
metdooun kunnen. Om dat meugelk te maoken, komp der een neie wet veur
maotschappelijke ondersteuning. Die zal zörgen veur zörg in hoes of hulpmiddelen
an mèensken die dat neudig binnen. Dat wordt dan regeld deur de gemeeinte,
omreden die ’t dichtste bij de mèensken steeit. Verpleeghoezen moe’n nog beter
worden; in de thoeszörg binnen gien waachtliesten meer, omreden de regering daor
meer centen in stoken hef. Mèensken die veur eein in de femilie zörgen,
maantelzörgers, kriegen van ankommend jaor of meer centen veur heur weerdevolle
waark.
Aw ’t gooud hebben willen, moew mekaor haalf staon. Een schiere buurt, een mooie stad, een staark laand; ’t hef almaol te maoken met aandacht veur mekaor en begrip veur een aander zien meeining. Op een koppel steden worden plannen oetvoerd die mèensken dichter bij mekaor brengen. Dat is mooi. Mèensken en organisaoties die heur best dooun om meer begrip veur mekaor te kweken, kriegen de steun van de regering. Mor aj mekaor begriepen willen, moej mekaor wel verstaon kunnen. Daorom moet elkeneein kennis hebben van de Nederlaandse taol. Dat is een slim belangriek dooul van de Wet die ’t inbörgern van neie Nederlanders regelt. Wel of hum anpast hef, wordt Nederlander. Van ankommend jaor of vier wij dat met een naturalisaotiebijeeinkomst in de eigen gemeeinte.
De regering döt zien best om al het moois daw in Nederlaand hebben, te beschaarmen en veur elkeneein zichtbaor te maoken. ’t Rieksmuseum wordt verneid en der komp een nei museum veur de nationaole geschiedenis. Cultuur maokt ’t leven mooi en brengt mèensken dichter bij mekaor.
We moe’n niet allennig oous best dooun veur mekaor en veur de rest van de
wereld, mor ok veur een mooie tooukomst. Oous kinder én kleinkinder, moe’n net
as oous een kaans kriegen om in Nederlaand wat oet stro te zetten.
Het hef de leste jaoren niet makkelk west. Paartie maotregeln van de regering
gungen aordig wied. Dat was neudig. Bedrieven, warknemers en de regering hebben
der in de maande veur zörgd dat Nederlaand noe klaor is om met te gruien met de
wereldeconomie. Nederlaand hef de kop deur de halster. Nederlaand waarkt.
Nederlaandse ondernemers binnen gaangs in de heule wereld. In bedrieven, op
schooulen, in zeeikenhoezen en op nog veul meer steden wordt haard waarkt an
verneiing. Oouze economie kan ’t gevecht met aander landen weer an. Dat kuj
zeein, omreden der kommen ja meer baonen bij. En de lasten binnen daold.
Elkeneein hef noe meer centen in de portmenee.
De economie gruit, mor wij hebben ’t toch veur mekaor kregen om de
luchtvervoeling te vermindern. Om de lucht nòg schoner te maoken, wordt ’t
gebruuk van schone auto's anpitjerd.
Der is de leste jaoren veul oet stro zet. In de kommende jaoren kun we daor
wieder met. De begroting is ankommend jaor oet de rooie ciefers. Der is aordig
snuid in regels en bepaolings van de overheid. Mèensken met een eigen bedrief
hebben daar veul veurdeeil van. Wieder wil de regering ’t makkelker maoken om de
opvoeding van kinder te combineren met een baon. Kinderopvang wordt goedkoper en
makkelker. Aal bedrieven moe’n daor dommiet an metbetaolen. Schooulen moe’n der
veur zörgen dat de kinder veur en nao de lessen opvangen worden kunnen.
Der is een gooud systeem invoerd veur de verzekering van zeeiktekosten. De
gezondheidszörg blef op dizze meneer te betaolen. De börgers hebben noe meer
keur. Verzekeraars moe’n elkeneein annemen veur dezölfde premie, ok mèensken die
zeeik binnen. De verzekering van kinder is veurgeefs.
De regels veur waarken en oetkeringen binnen anpast. Der binnen noe meer
mèensken an ’t waark en der worden ok minder oetkeringen anvraogd. ’t Is veur ’t
eerst dat ’t tal an oetkeringen veur mèensken zunder waark,
arbeidsongeschiktheid én bijstand daold is.
Deur aal zukke maotregels kunnen de AOW en aander sociaole veurzienings in de
kommende jaoren bestaon blieven.
Der binnen veul centen stoken in ’t verbetern van ’t vervoer. De regels veur
bouwen binnen makkelker maokt. Nederlaand is daorom beter op de tooukomst
veurbereid. Een koppel risseltaoten zuw in 2007 zeein kunnen.
Börgers, bedrieven, gemeeinten en previncies muggen noe zölf meer besluten nemen. Der worden veul meer neie hoezen bouwd. En ’t geeit aordig schier met de stadsverneiing.
Der wordt hard waarkt an wegen, spoorlienen en waoterwegen. De Hogesnelheidslien-Zuud en de Betuwelien binnen zowat klaor. Oouze naobers over de grup kun wij dan makkelker bereizen.
’t Is slim belangriek daw ’t leegliggende laand van Nederlaand beschaarmen
tegen de gevaoren van hoog waoter. Zwakke dieken en dunen worden verstaarkt, in
de maande met de previncies en de waoterschappen. De netuur wordt beschaarmd met
nationaole parken en landschappen. De regering wil der veur zörgen dat de boeren
deur verneiing veuran lopen blieven en de regering döt ok zien best veur de
vissers, die ’t slim stoer hebben.
De regering wil de basis veur de kommende jaoren wieder verstaarken deur de
belastingen veur börgers en bedrieven te verlegen. Zo wordt ’t veurdeeiliger om
een bedrief te hebben en verneiend gaangs te weden. Daar komp een speciaole wet
veur: ‘Waarken an winst’. In de maande met de bedrieven en de vakbonden wil de
regering zien best dooun om te beholden waw noe veurmekaor kregen hebben. Aw ’t
klaor kriegen, kan Nederlaand in 2007 wieder bouwen an een goeie tooukomst.
Leden van de Eerste en Tweeide Kaomer,
Met tweei maond kiezen aal Nederlanders van achttie jaor en older een neie
Tweeide Kaomer. In oouze democratie binnen vrije verkiezings slim belangriek.
Het is dé meneer veur mèensken om zölf te kiezen. Niet allennig veur oouszölf,
mor ok veur de wereld om oous toou, veur mekaor en veur de tooukomst.
Leden van de Eerste en Tweeide Kaomer, jullie hebben een belangrieke taok. Een
koppel mèensken wèensen jullie veul wiesheid toou en wij bidden met ’n allen dat
God jullie helpen wil.
Ik zul zo zeggen; ’t beste mor weer.
◄ weerum naor het thoesblad