Op dinsdag 7 november lestleden hef de Drentse Muziek Maatschappij zuch prissenteerd. De neie stichting wil derveur zörgen, dat der de kommende drie jaor nei en kwalitatief hoogstaond Drentstaolig liedrippertoire maakt wordt. Zie wil dat doen laoten deur veural jonge muzikanten en tekstschrievers.

Op ’t previnciehoes kreeg gedippeteerde Henk Weggemans het eerste exemplaar van het prejectplan 2006-2009 anbeuden.

Hoe mot de vlag der in 2009 bij hangen?

1. Der bint 60 (ver)neie(nde) Drentstaolige liedties schreven, componeerd en oetvoerd.
2. Der bint in elk geval drie warkwinkels tekstschrieven en drie warkwinkels componeren geven.
3. Der bint drie neie cd’s oetkommen.
4. Der bint drie liedtiesfestivals organiseerd. RTV Drenthe hef die oetzunden en hef wieder roem aandacht geven an het wark van de stichting in heur programma’s.
5. Der is een Drentstaolige opera, operette of musical oetvoerd.
6. De artiesten die metan daon hebt, bint slim enthousiast worden.
 
Meer weten?
Zoaj hierboven lezen kunt, hef de Drentse Muziek Maatschappij zuch 7 november prissenteerd. De veurzitter van de stichting, Egbert Meyers, huul toen een openingstoespraak.

Der is ok een webstee lösdaon. Gedippeteerde Henk Weggemans dee dat deur op de juuste knop te drukken. Op www.sdmm.nl kuj het hiele prejectplan van de neie stichting lezen.


Wij bint der wies met!
Het sprek veur zuchzölf dat Drentse Taol slim wies met het in de bienen kommen van de Drentse Muziek Maatschappij is. Wij hoopt op een bluiende samenwarking.

◄ weerum naor het thoesblad