Zundag 23 april was de tweide van de drei kovviemörgens, die het Heimatmuseum oet Leer (Ost-Friesland), Kostverloren oet de previncie Grunning en Drentse Taol mandielig organiseert. De lu van Huize Bareveld waren gastheer en hadden de boel goed veur mekaar.

Het pregram was slim gevarieerd. Naodat Bert Huizinga van Kostverloren de mörgen lösdaon har, traden eerst de drei manlu van ‘Woarom Nait’ op. Kinderveurdrachten waren der daornao van Hilvert ten Have en Jur Sander oet het Grunnegerlaand. Oet Ost-Friesland lazen Marc Bergenthal, Meike Schulte en Janneke Müntinga prachtige verhalen in ’t Platt-Duuts veur.

Drenthe was dizze mörgen vertegenwoordigd deur Erik Harteveld. Hie leut poëzie en proza heuren. Zunder overdrieven kuw zeggen dat het derin gung as Gods woord in een olderling, daor in Bareveld. Lutz Holler leut liedties van over de grup heuren. Hie begeleidde zuchzölf op de gitaar.

Cultuur, en zeker ok streektaol, mak hongerig en daor hadden ze reken met holden. Gruunte- en tomatensoep en mooi opmaakte kadetten smeuken best.

Lutz Holler har nao de pauze nog meer op ’t rippertoire en de tweide ‘Over de Grup’ weur ofsleuten met ‘Diner for one’. De miesten ziet dat rond old-en-nei vast wal ies op tillevisie, maor in Bareveld kregen we de Platt-Duutse variant te zien. Miss Sophie vierde heur niggentigste verjaordag met heur veer denkbeeldige gasten; butler Johann har het der maor stoer met. Het was een geweldige oetsmieter.

Op zundag 21 mei is de leste kovviemörgen. Dan is oeze previncie gastheer en kuj genieten van prachtige streektaoloptredens in café Hofsteenge in Grol. Henk Puister, Jan Veenstra, Marga Kool en Geert-Jan Brader zult optreden. Der bint kinderveurdrachten en vanzölf huuj niet verhongern: der is soep en stoet met Drèents beleg.

▲ Marc Bergenthal		▲ Marc Bergenthal oefent nog intied dat Meike Schulte metkek		▲Jur Sander
▲ Hilvert ten Have		▲ Janneke Müntinga		▲ Meike Schulte
▲ Dinner for one: Miss Sophie wacht op 't eten		▲ Butler Johann hef het der stoer met		▲ Woarom Nait
▲Lutz Holler		▲ Erik Harteveld

◄ Aj hier klikken kuj kaorten bestellen!

◄ weerum naor het thoesblad