Van 18 juni of begunt Harrie Popken en Geerhard Gras met een neie reis veur het radiopregram ‘Op Pad’. Op Pieterpad ditmaol. Met zien tweebeiden loopt de manlu het bekendste wandelpad van oes laand, dat van Pieterburen in Grunning tot an de Sint Pietersberg bij Maastricht zowat viefhonderd kilometer lang is. Aal zundagnommedagen vertelt ze de luusteraars wat heur overkommen is.

Geerhard en Harrie begunt met een grote camper in Coevern. Zie komt wandelaars integen met voestdikke laogen eelt under de voeten, zoveul kilometers hebt ze der al op zitten. Zie slaopt bij boeren in ’t heui en zingt traonentrekkers bij ’t kampvuur. Zie gaot op zuuk naor antwoorden op vraogen as “Waorum zit er een gat in de toren van Zelhem” en “Waorum woont er een dokter op het klooster bij Coevern?”. Een bakker trakteert heur op speciale Pieterpadkoeken, zie bezuukt een supermark op een platbodem in de Rijn, zie gaot kieken bij oorlogsgraven en umdat het zukke trankiele kirrels bint, ziet ze zölfs korhoenders lopen op de Sallandse heuvelrug.

Vanzölf vliegt Harrie en Geerhard mekaar regelmaotig in de haoren. Dat begunt metien de eerste dag al as Geerhard zien portemonnee vergeten is. Hoe dat oflop, kuj 18 juni in ‘Op Pad’ heuren. Aal weekèenden kuj op Tekst TV van RTV Drenthe een fotoverslag bekieken.

En… wat nou nog ies extra mooi is: Harrie en Geerhard proot de streektaol met zien beiden. Het gef het pregram een extra laogie. Wij bint beneid hoe wied de beide mannen komt met heur Drèents. Aj ok neisgierig bint, moej gewoon lustern!

◄ weerum naor het thoesblad