Gelukkig neijaor

’t Is kold in het veld en de hazen bint ril.
De slag van ’n carbidbus…. En dan is ’t weer stil.
Het is oldjaorsdag…
’t Wordt staodigan duuster, van ’t jaor veur het lest.
Nog even, en dan is ok dit jaor der weer west.
Het is oldjaorsaovend.
Het hoes straalt wat locht of, het rök er nog zuut.
De baklocht van jöskoeken komp oes in de muut…
’t Is zo weer neijaor.

Een jaor is weer um en waor blef toch de tied.
En Otien verzucht dat ’t zo gauw almaol giet…
“’t Is zo weer neijaor…”
Een jaor is weer um, der is hiel wat gebeurd.
Het mal en het mooi hef oes almaol bereurd.
Al weer een neijaor.
Der was veul ellende en veul ienzaomheid.
Hoe zal dat van’t jaor gaon?
Wij bint zo beneid…
Gelukkig neijaor.

Een nei jaor lig veur oes. Een nei jaor vol hoop.
En nao middernacht komp het volk an de loop.
“Gelukkig neijaor!”
Dan wens wij mekaar heil en zegen in ’t neijaor.
En aal deuren staot lös en de zeupies staot klaor,
want ’t is toch neijaor.
En die’t mangs ies stoer had hef in ’t olde jaor,
die proot wij weer moed in: ’t Komp non vast wal klaor!
’t Is gelukkig neijaor!

Harm en Roelof - Van de CD ‘Zie is zo mooi’

Neijaor

Verleuren dwarrelt zwarte kreeien
um de toren
en krast de vrogge mörgen lös
snippers papier koomt um de hoeken
van de straoten weeien
het neie jaor haalt aosem
en bevrös

ebrèuken bint de scharven van de wraak
verschèuten bint de vuren steerns
van tekört-eschèuten dromen
de kwaodheid is versleept
het jaor wördde feest
het feest is um-ebracht

oens blef de schraole treust
van zute wien en zolte bonen
en in de naomiddag het kolde kuierpad
aover de nes
daor in ’t bevreuren bouwlaand
de winterrogge slöp
mar wacht

Marga Kool

Oldjaorsgedachten

Veurjaor, zummer, haarst en winter
Weer gung der een jaor veurbai
Elke schriever kocht een printer
Veur zien Drintse schrieveraai.
En zo tusken aacht en negen
Nao het aachtuurs weerbericht
Tikt e over zoere regen
Of de aids een naai gedicht.

Veurjaor, zummer, haarst en winter
Onderwaarpen overal
En daor raotelt oet zien printer
Wat een bundel worden zal
Drintse dichter maag e wezen
En in Drinth’ beroemd misschien
Mor, wel zal zien versies lezen
Zeg mor, nao een jaor of tien?

Oet: Peter van der Velde - Winter op de Paaizermao

Naaijaor

Wel kint het raodsel van de tied
van daogen en van jaoren
die, as de wolken an de lucht,
naor ’t onbekende vaoren?
waorvan een heil klaain paartie mor,
as ’t wat wil, wai beleven?
Wel kint het raodsel van de tied
En kan ons antwoord geven?

Oet: Peter van der Velde - Winter op de Paaizermao

Het denneboompie

Een dennegie stun in de bos
Hie was wat klein van stuk
De grote dennen die zeden: “Man
Wat blief ie toch een kruk!”

“Wat bin ie toch een miezertie,
Ze mussen oe ummehakken!”
Het boompie reerde hum toen zat
En ’t drupte van zien takken!

Op zek’re dag toen kwaamp de boer
Zien dennegies ies bekieken
“Dit is de mooiste,” zee e blied,
“Die zal bij oes wel lieken.”

Hij haalde ’t boompie uut de grond
En legd’ hum op de wagen.
De aand’re dennen keken zoer
Wuzzen glad niet wat ze zagen!

Thuus bint de kiender van de boer
Het boompie gaon versieren
Mit gliensterspul en naomaaksnei
Um ’t karstfeest te gaon vieren!

Toen was de kleine denneboom
Het mooist van allemaole…
En de grote dennen in de bos?
Die stunden in de kolde!

Gedicht deur Bonnie Kuik-Veendorp

◄ weerum naor het thoesblad