In Friesland hef 25 % van de kinder op basisschoelen een taol- en rekenachterstand. Lu die niet wieder kiekt as dat de neus lang is, hebt wal ies zegd dat dit te maken hef met het feit dat der zoveul Fries proot wordt. Vanzölf is dat underzöcht en de Friese taol is nargens as boosdoener oet de bus kommen.

Gedippeteerde Bertus Mulder Underwiesgedippeteerde Bertus Mulder wil der slim veul an doen um die achterstand in te halen, starker nog: “In 2015 moeten de Friese scholen tot de beste van het land behoren.” Ien van de dinger um kinder wat extra’s met te geven, is volgens Mulder meertaoligheid. Hie wil of van het Fries as eilandje tussen de aandere vakken van de basisschoel. Het ‘foech Frysk’ mot vanof groep 1 een geïntegreerde plaots in het basisunderwies kriegen. Zo zult kinder daodwarkelijk hölpen worden.

Kansen zat
De achterstanden op reken- en taolgebied bint in Drenthe minder groot. Ok hier geldt, dat de streektaol niet de oorzaak is van achterstanden. En ok hier geldt dat warken an en in de richting van vrogge meertaoligheid een gunstig effect hebben kan. Gelukkig is de Drentse taol nog volop anwezig in oeze previncie. Kansen zat veur schoelen um kinder wat extra’s te geven. Maor dan is der wal gericht beleid neudig op dat gebied. In 2007 is der veur de schoelen in Friesland een neie lesmethode veur het Fries beschikbaar: ‘Studio F’. Het Fries kan dan een integraal underdiel op een Friese schoel worden.

Koezenzeert
Ok wat veur Drenthe en het Drents? Of verschoel we oes nog langer achter de leus: “We willen hier toch zeker geen Friese toestanden!” en doew net of der niks an de haand is? Misschien giet koezenzeert ok wal over zunder daw naor de tandarts gaot. Kom maor op met die struusvogels.

Bron: Het Onderwijsblad; nr. 12 d.d.10 juni 2006

◄ weerum naor het thoesblad