In de nacht van zundag 25 juni is op 58-jaorige leeftied Geert Enting oet de tied kommen. Geert was de leste jaoren veural bekend as veurzitter van Oeze Volk, maor hie hef veul meer daon veur de streektaol. Van 1969 of schreef Geert Enting in het maondblad Oeze Volk. Wieder kwam der wark van hum in verscheiden verzamelbundels oet, zoas de Drentse Schrieversalmanak, Midwinter in de olde landschap, Oes Eigen Taol en ’t Larfje. Hie was metwarker an het Woordenboek van de Drentse Dialecten, waor dr. G.H. Kocks de samensteller van was. Bij het Drents Zakwoordenboek was e betrökken en van het P.J. Meertensinstituut wussen ze hum ok te vinden, umdat e veul wus van het Drčents.

Zien kennis van het Drčents is ok wal bleken bij het Drčents dictee. Verscheiden maol was Geert de beste van Drenthe op dit gebied. De leste jaoren zat e as deskundige in de jury bij dizze spellingwedstried.

Bestuurlijk hef Geert altied slim actief west. Hie was u.a. lid van het prejectbestuur Drentse Taol en van 1993-1996 was e waornimmend veurzitter van de Drentse Schrieverskring. Van 1991 of was e veurzitter van het bestuur van het streektaoltiedschrift Oeze Volk.

In zien geboortedörp Eext dreug Geert Enting zien stien bij an de gemienschap. Meziek was ok een grote liefhebberij van hum. Geert Enting was trouwd en har een zeun en een dochter. Beroepsmatig was Geert financieel ambtenaar bij justitie. Ofgelopen december kun e profiteren van een vutregeling. Hie hef der geern gebroek van maakt, want der waren nog plannen zat veur dizze actieve man. Daor zul e mooi de tied veur hebben. Het is der niet van kommen.

Marchie en de kinder verliest in heur man en pap een geweldig plezerige kirrel. Het gemis zal groot weden veur heur. Dat geldt ok veur de Eexter gemienschap en de wereld van de Drentse taol.

◄ weerum naor het thoesblad