Vrijdag 16 juni hef de eerste Nationale Streektaalconferentie west. ’t Was vrog opstaon veur de bezukers oet het Nedersaksische taolgebied, want de conferentie weur holden in het previnciehoes in Maastricht. Um half 11 dee prof. dr. Van Hout (van de Universiteit van Nijmegen en veurzitter van de Raod veur ’t Limburgs) de conferentie lös.

Sprekers die wat te zeggen hadden
Der waren hiel wat mensen neugd um die dag het woord te voeren. Zo waren der lezings van de gedippeteerden van cultuur van de previncies Limburg en Noord-Braband en heul drs. W. van Gelder (commissaris van de keuningin in Zeeland) een pleidooi veur het gebroek van de streektaol. J. Braun van het Conseil Permanent de la Langue Luxembourgeoise vertelde oes hoe het met het Letzeburgisch in zien laand zit. Mooi um te heuren dat de Luxemburgers, ondanks het Duuts en Frans in het publiek verkeer, heur taol massaal trouw blieft. Overal, in hoes, op het wark, op het schoelplein, an ’t voetbalveld proot de mensen Letzeburgisch met mekaar. Zie heurt het via radio en tillevisie. En die moedertaol zit het Duuts en Frans niet in de weg. Integendiel.

Gé Reinders (www.g-reinders.nl)
Ok lustern mak hongerig. Dat weet Limburgers as gien aandern en daorum stun der tegen ien uur lekkere stoet klaor. Maor hoogtepunt van de lunch was niet het eten, maor een optreden van Gé Reinders en begeleidingsorkest. Bekende nummers as ‘Blaosmuziek’, ‘Eder Keteer’ en ‘Aad waere mit dich’ klunken fantastisch, daor in het Gouvernement aan de Maas.

Nao de middag
Even nao twei uur begunde het middagpregram. Limburgs, tweitaolig dichter J. Corstjens dreug veur oet eigen wark. Daornao gooiden prof. dr. K. Jaspaert (old-sikketaris van de Nederlandse Taalunie) en prof. dr. S. Kroon (expert moedertaoldidactiek) de knuppel in ’t hoenderhok. De twei manlu bint namelijk tegen erkenning van streektaolen under ’t Europees Handvest veur Minderheidstaolen. Beiden bint dialectsprekers, maor die erkenning vindt ze onneudig. En aw dan bedenkt dat de Limburgers gloepende bliede bint met her erkenning under hoofdstuk ll en Sont zuch slim drok maakt veur erkenning van het Nedersaksisch under diel lll, dan kuj begriepen dat de woorden van Jaspaert en Kroon niet bij elkenien goed deelkwamen.

Gelukkig leut dr. L. Heijenrath (vice-veurzitter van de Raod veur ’t Limburgs) weer een hiel aander geluud heuren.

Paneldiscussie
Tegen het ende was der een paneldiscussie. Ien van de forumleden was dr. Henk Bloemhoff van de Stellingwarver Schrieversronte www.stellingwarfs.nl Het was geweldig um de gedrevenheid van oeze buurman te heuren. Ter zake, zörgvuldig geformuleerd, maor ok zo raak kwam Henk as onbetwist winnaar oet de forumdiscussie hen veuren. Hie stelde de slappe holding van lu die blieft twiefeln en maor niet beslissen kunt of ze linksum of rechtsum wilt an de kaak.

Ofscheid van de Limburgse streektaolfunctionaris
An ’t ende van de dag weur nog ofscheid neumen van dr. Pierre Bakkes, die de leste zes jaor streektaolfunctionaris van Limburg was. Pierre hef enorm veul oet het stro en in gang zet. De dank in zien richting en anslutende receptie waren meer as verdiend.

Geen daden maor woorden Der bint enorm veul mooie woorden zegd, daor in het Limburgse laand op dizze vrijdag. Maor met mooie woorden en intentieverklaorings allén biw der vanzölf niet. Aw verdan wilt met mekaar dan mot der investeerd worden, investeerd in tied én geld. Zoas prof. dr. Van Hout zee: “Een stenen monument kun je bij wijze van spreken tweehonderd jaar verwaarlozen en dan alsnog restaureren, zodat hij weer heel lang mee kan. Voor het immateriële erfgoed, waaronder de taal valt, geldt dit niet. Die heeft onze zorg nú nodig.”

Weer op hoes an
Tja, en dan hej in de auto op weg naor hoes mooi dik drei uur de tied um alles nog ies even te overdenken. Theoretisch gezien har dat ok kund, maor dan har Nederland niet tegen Ivoorkust voetballen moeten. Met Jack van Gelder an ’t oor kwam der van naodenken niks terecht. As de mensen zuch nou ies net zo drok over de streektaolen maken zulden as over voetballen.

◄ weerum naor het thoesblad