Oet Stienwiek, Dronten, Emmeloord, Zwolle, Emmen, Deventer, Amsterdam, Wageningen, Leeuwarden, Utrecht, Enschede en Grunning kwamen leden van Drentse verienings zaoterdag 22 april naor Assen um daor de tweijaorlijkse Drentendag te holden.

Toen Piet Hage, veurzitter van de warkgroep ‘Drenten in de Vrömde’ um een uur of tien de dag lösdee, waren der zowat 250 mensen in Party-Town in Assen. Nao de inleidende schermutselingen, zoas het openingswoord van de veurzitter en een prootie van streektaolfunctionaris Jan Germs, was het woord en het teniel veur ’t Aol Volk oet Emmen.
 

Eerst brachten leden van dizze Drentse veriening een diel van heur kledingshow. Tien kinder dreugen daornao gedichten veur, die ze bij de veurdrachtswedstried van ’t Aol Volk ok al ies op de plaanken bracht hadden. Gloria Sommer stelde de veurlezers an de zaal veur; het was echt genieten geblaozen.

Nao de kinderveurdrachten kreeg het volk weer een stukkie kledingshow te zien. De volksdansgroep oet Dronten jeug zuch daornao in ’t zwiet, intied dat de mensen in de zaal het niet biester warm hadden. De verwarming har kuren. Gelukkig weur het in de loop van de dag beter.

Rond het middaguur kun veurzitter Piet Hage een ‘hassebassie en broodmaoltied’ ankondigen. Maor veul belangrieker was het toen feitelijk, dat mensen ies oetgebreid bijkletsen kunden. Boetendes waren Het Drentse Boek en Oeze Volk der met boekenkraomen, zodat der ok nog hiel wat leesvoer kocht worden kun.

Het nommedagpregram bestun oet zang van de Paizer Hopsingers en een ienakter van de tenielgroep oet Zwolle.
De organisaotie van dizze dag was in handen van de warkgroep Drenten in de Vrömde. Zie hadden eer van heur wark.

▲ Veurdracht deur kinder		▲ WDOB met meziek		▲ Old-veurzitter Jan Tijink verkocht boeken
▲ In de riege veur de eterij		▲ Het smeuk best!

◄ weerum naor het thoesblad