Dat giet dan benaom um personen of organisaoties die in een positie verkeert, waorvan verwacht mag worden dat zie in de gelegenheid bint um het Drčents op een positieve wieze veur het voetlicht te brengen.

Ondanks oeze heldere oetgangspunten en onofhankelke opstelling realiseer wij oes as jury dat an een zekere maote van subjectiviteit niet te ontkommen valt. Wieder biw der van overtuugd dat de grčens tussen zoorholt en anfietern hiel marginaol is. Ik wol maor zeggen: aj nomineerd bint veur de zoorholtpries, zit ij ok dicht tegen de anfieterpries an. En čeinlijk bedoel ik te zeggen: aj op de zoorholtliest veurkomt, verwacht wij daj in ’t ankommende jaor as anfietergenomineerde weerum komt. Zodoende.

Het pech-underwegbedrief Route Mobiel hef alles in ’t wark steld um zuch een plaots op de markt te verovern. Dat is heur goed recht. Of het netties is zuch te profileren ten koste van de concurrent, is de vraog, maor dat is nog niet het argste. As men het volk van Drenthe an zuch binden wil met de oetspraok “Drenties opgelet” is dat onvergeeflijk, getuugt het van weinig respect veur de Drentse samenleving en derhalve een zoorholtnominatie meer dan weerdig. Gelukkig hebt zie ’t zölf ok inzien, maor met een beetien meer veuroverleg met Drentse Taol had dit veurkommen worden kunt.

Jannes Kersies is raodslid van de gemiente Midden-Drenthe en in zien vrije uren panellid (daor he’k zo gien goed Drčents woord veur) van het tillevisiepregramma “Boven het maaiveld” van RTV Drenthe.

Van het deur de wol gevarfde ervaren staotenlid en kuunstenaor Arie Fonk oet Raol hew tamelijk hoge verwachtings. Wat de streektaol angiet hef e daor niet an beantwoord. Over de inhold van de cultuurnota “De kunst van het combineren” van de Previncie hebt de taolinstituten zuch grote zörgen maakt. Die zörg weur dield deur de mieste politieke fracties. Arie, naomens de VVD, kwam feilijk niet veul wieder dan de waorschuwing dat wij in Drenthe veural oppassen mussen veur Friese toestanden. Laow hier maor het zwiegen toe doen, hopend dat Arie het diep in zien hart niet zo kwaod bedoeld hef en dat e alles doen zal um hier ankommend jaor weer te kommen, maor dan op de anfieterliest.

Over de kandidaoten veur de anfieterpries wil de jury het volgende kwiet:

Taal aan tafel is een literair, muzikaol en culinair pregramma in de Zuudwesthoek van Drenthe dat al meer as tien jaor bestiet. Het is een underdiel van Het Drentse Boek.Veur de streektaol is een belangrieke rol vortlegd. Veurbereiding en prissentaotie ligt bij Baukje Bloemert en Rieks Siebering. Wij hebt heur niet allén nomineerd, umdat ze ’t zo lang volholden hebt en dat ze iedere keer weer een hoop volk naor Veeningen weet te trekken.
Taal aan tafel ontwikkelt neie initiatieven. In de kindermaond oktober weur der een twietaolig pregramma (diels in de streektaol) prissenteerd veur kinder van basisschoelen oet de omgeving. Opkomst en enthousiasme waren hartverwarmend. As dat gien anfietern van de Drentse taol is!

In de tied van het Neisblad van het Noorden en de Drčentse Kraant huul de belangstelling van de schrievende pars veur de streektaol niet over. Dat bield hef nao de komst van het Dagblad van het Noorden čn Pieter Sijpersma as heufdredcteur een hiel aander anzien kregen. Deur zien toedoen kwam de streektaolpagina “Schepers Erf” tot stand, was e actief betrökken bij de verkiezing van het mooiste Drčentse woord en de hoes-an-hoes-actie van de Trektocht. Daor zit een visie achter die undermeer bleek oet zien volgende oetspraok in de kraant: “Wie het dialect spreekt, laat onwillekeurig zien trots op of verbonden met zijn of haar geboortestreek te zijn. De streektaal drukt een groepsgevoel uit. Het is van grote waarde die vorm van cultuurgoed te bewaren in een wereld die steeds eenvormiger wordt. Gelukkig doen allerlei scholen hun best het dialect aan hun leerlingen te onderwijzen”.

Dat dit gien loze oetspraok is, bewes de openbaore basisschoel Zuderenk oet Wiester.
Daor wordt het belang van de streektaol, beheurend tot het culturiel arfgoed, op de juuste wieze inschat. Kinder van alle groepen wordt op een speulse menier vertrouwd maakt met de Drčentse taol. Meertaoligheid, daor giet het um. Kinder bint der ontvankelk veur. Een half uur Drčents in de week, niet veul, maor toch…En, laow het op dizze plaots nog maor ies zeggen: wetenschappelijk underzuuk hef overdudelk oetwezen dat het gebroek van de streektaol de beheersing van het Nederlaands absoluut niet in de weg stiet! Groepsleerkracht Bertha Abbing fietert het allemaol an en as het an de jury lig, wordt der in de toekomst in Drenthe nog hiel veul van zukke leerkrachten ansteld.