Drs. Henk Hadderingh is oet de tied kommen

Maandag 4 juli bereikte oes het bericht dat drs. Henk Hadderingh oet de tied kommen is. Henk was de zeun van Bertus Hadderingh, beter bekend as Bart Veenstra, en Martha.

Henk studeerde an de universiteit in stad Romaanse taolen. Hie is wat betreft de streektaol veural bekend worden deur het Drents Woordenboek, dat e samen met zien pap meuk. Wieder was e een toerlang columnist veur ’t Neisblad van ’t Noorden veur de rebriek Drenten over Drenthe. Ok schreef e artikels veur Oeze Volk over een hiele koppel verschillende taolkundige underwarpen. Met Vief graopers en ’n aarvenis schreef e een klucht in drei bedrieven.

Henk Hadderingh was slim veul gangs met het bij ‘nkander garen van Drèentse woorden um ze te bewaren en te bestuderen. Het samenstellen van het Drents Woordenboek, dat in 1979 verscheen, was dan ok niet zo vrumd.

Het woordenboek van de Hadderinghs gef een oetgebreide verzameling van woorden, oetdrukkings, zegswiezen en spreekwoorden oet de Drèentse dialecten. Wieder wordt der gebroeken en spellegies beschreven en bint der versies, riempies, raodsels en zukswat opneumen in de 368 bladzieden. Het woordenboek bevat ok nog ies 88 foto’s en aandere plaaties um underwarpen dudelijker te maken.

Bij het maken van het woordenboek hebt Henk Hadderingh en zien pap veural keken naor woorden, oetdrukkings enz. die in ’t Drèents dudelijk aans bint as in ’t Nederlands. Een woord as taofel, waorin ‘t verschil maor ien klinker is, zuj der niet in vinden. Dargelieke woorden bint allén vermeld as ze het hoofdwoord van bijveurbield een spreekwoord vörmt.

Henk Hadderingh is 56 jaor worden.

◄ weerum naor het thoesblad