De cursus ‘Dieper-deur-Drenthe’ is klaor. Een warkgroep, die bestiet oet Tjaart Imbos, Roel van der Molen, Gé Blauwgeers, Jantien Assies, Arnold van Lon, HarmJan Lesschen, Anton Wieringa, Jan Thalen en Jan Germs hef der een beste bult wark an had. En niet te vergeten: Harm Eggens die zörgd hef veur prachtige illustraotsies.


Behalve de lu die hierboven nuumd wordt, is de hulp inroepen van gastschrievers. Egbert Meijers hef materiaol anleverd veur de les over streektaolmeziek. Roel Sanders schreef een artikel over de schilders van Drenthe.


De bekendste Drèentse kok Roel Kuper hef hölpen bij de les over koken. Dr. Henk Nijkeuter was behulpzaom bij het underdeel ‘schrieverij’. Koop Bos zörgde voor dia’s en inhold bij de les ‘Vrogge bewoning, korenverbouw en tael’. Wieder hebt mensen hölpen met vertaolings, waren lu van het Drents Museum bereid de deuren speciaol veur oeze fotograaf lös te doen, hef amateurfilmer Jan Weits drei hiele dagen deur Drenthe reden veur opnaomes en zo kuw nog wal even deurgaon.


Het veurlopig risseltaot mag zuch zien laoten. Veurlopig jao, want de cursus ‘Dieper-deur-Drenthe’ wordt nou eerst oettest. As der dan mankementen opspeurd wordt, zult die vanzölf verbeterd worden. Pas nao het oetpreberen wordt de cursus definitief opmaokt en giet e in het cursusanbod van Drentse Taol met. Dat zal in ’t naojaor van 2005 gebeuren.

Het oetpreberen van ‘Dieper-deur-Drenthe’ gebeurt in de bibliotheek van Peize. De docenten Jan Fonk en Harm Soegies gaot de cursus daor geven an zestien dielnimmers. Aal aovends zal der iene van Drentse Taol achter in de klas zitten um scharp op te letten of der fouten in het boek zit.

Behalve een cursusboek is der een apart warkschrift veur alle taoloefenings en aandere opdrachten. Cursisten huuft dus niet te maggeln in heur schiere cursusboek. Veur de docenten is der een antwoordenboek en een handleiding.

‘Dieper-deur-Drenthe’ is niet in meerdere soorten Drèents schreven. Elke les is schreven in een aandere variant van oeze streektaol. Hierunder ziej een overzicht van de lessen en het dialect waor e in schreven is:
 

1. Taolschat – een schat an taol Noordenvelds
2. Vrogge bewoning, korenverbouw en tael Zuudwestnoord
3. Raauwen en traauwen Veenkoloniaols
4. Streektaolmeziek – meziek in de streektaol Zuudoostveen
5. Het lantrecht van 1412 Z Zuudoost/Midden
6. Drèentse schrieverij  Zuudwestzuud
7. Dwelen deur Drenthe Zuudoost/Midden
8. Koken, beelden en schilders Verschillend
9. Veldnamen en spellegies Verschillend


Het is vanzölf zo, dat binnen de verschillende varianten van het Drèents ok niet overal hetzölfde is. Daorover kan proot worden under leiding van de docent en dit kan zien worden as een bron van verrieking en misschien inspiraotsie tot wiedere studie.

Oet het liestie met underwarpen blek wal, dat ‘Dieper-deur-Drenthe’ meer is as allén maor een cursus over taol.
 

◄ weerum naor het thoesblad