Veur ’t volk dat belangstelling had veur dizze dialectendag, was der een schier pregramma saomensteld.

’s Mörgens was der eerst een lezing van Jan Stroop, Universitair hoofddocent Nederlandse Taalkunde an de Universiteit van Amsterdam. Stroop heuil een slim lollige lezing over siepels, eerpels en petat. Hij vertelde waor de verscheiden dialectwoorden veur dit eten oet de ‘basse cuisine’ de lege keuken, vortkwamen.

Derk Jan Eppink, Een Achterhoekse VVD-er die in Vlaandern waarkt, vertelde over zien ervaorings met dialect in de Achterhoek, ’t gebruuk van de verschillende taolen in ’t Europees Parlement en over spraokverwarring. Zo beteeikent Neelie Kroesie in ’t Ests, veer pilsjes en kuj in ’t Duuts niet zeggen: ‘die Huren sind teuer’, aj bedooulen dat de huurpriezen hoog binnen.

Nao ’t middageten vertelden Harrie Scholtmeijer en Charlotte Giesbers wat over de Gelderse dialecten en dan veural over ’t neie woordenboek van de Gelderse dialecten, waor ze met gaangs binnen. Kiek mor op www.ru.nl/dialect/wgd/info.htm.

Kathy Rys oet Maldegem in Vlaanderen hef onderzeuik daon naor ’t Maldegems, de taol die zij van heur oldelu leerd hef. In heur onderzeuik hef zij keken naor de holding die jonge kinder hebben ten opzichte van ’t Maldegems. Zij leuit geluudsopnaomen heuren die zij maokt had op de legere schooul in Maldegem. Deur de grote invloed van ’t Nederlaands maoken kinder die ’t Maldegems niet meer in hoes leren, fouten in heur Maldegems.   ◄ De Achterhoekse schriever jan Ottink leuit zien luusterleeidties heuren.

Veur meer infermaotsie over de Stichting Nederlandse Dialecten moej kieken op www.ru.nl/dialect/snd/. Op dizze site kuj ok ’t boouk bestellen, waor de lezings in staon die op dizze dag holden binnen.

Foto's: Joop van den Bremen
webstee streektaolmeziek: http://home.wanadoo.nl/streektaalmuziek