3 febrewaori 2004

Krap drei maond leden weur het prachtige boek ‘Scheupers van de Taol’ in Roden prissenteerd. De saomensteller van dat boek, Rouke Broersma, kuj zunder overdrieving een goed literatuurkenner numen. Rouke Broersma hef de Drèentse literatuur hoog. Op zien Drents gezegd: dat kun wal minder. Zeker ok aj ’t vergeliekt met aandere streektaolliteratuur. In zien boek gef Rouke Broersma een prachtige bloemlezing van die Drentse literatuur. Elke gezin in Drenthe, en wied daorboeten, zul dat boek feitelijk op de bossum hebben moeten.
 

Streektaol is veur veul mensen spreektaol. Je moet die taol heuren. Het is dus goed dat der nogal wat Drèentse aovends bint, waor streektaol veurlezen wordt. En vanoet dat veurlezen koj dan misschien en misschien wal automatisch ok tot zölf lezen. Maor niet elke Drent zal dunderdag veer meert naor de bibliotheek in Hoogeveen tugen um daor Marga Kool en Jan Veenstra te heuren veurlezen of op 26 meert hen Gasselt reizen um daor Anne Doornbos te heuren.

En umdat niet elke Drent ‘Scheupers van de Taol’ in de boekenkast hef en niet elke Drent op 7 meert naor Hesseln giet um Gerard Nijenhoes en Suze Sanders te heuren, is der vanof vandaog de webstee ‘Taolpad Drenthe’. Wereldwied kunt mensen Drentse literatuur tot zuch nimmen. Niet allén kunt ze het lezen zoas in ‘Scheupers van de Taol’. Zie kunt de schriever ok heuren, zoas op een Drentse aovend. Je huuft der niet iens de deur veur oet. En as breedband, ASDL, ADHD en hoe ’t allemaol ok heten mag in hiel Drenthe realiseerd is, wordt het allén nog maor mooier, makkelker en sneller.

Ik nuumde hierboven een paor bijienkomsten met schrievers. Nou je kunt in de streektaol vanzölf ok prachtige meziek schrieven. Niet veur niks komt GeertJan Brader metdoen in Hoogeveen en Lucinda en Christiaan in Hesseln en de Fiebeldekwinten in Roden. Ok meziekschrievers zult in het Taolpad Drenthe naor veuren kommen. En dat maokt het nog schierder, levendiger. Hiermet kan elkenien hielemaol zien eigen Drèentse bijienkomst saomenstellen. Je huuft niet iens in Drenthe te wonen. Zoas oeze stickers ok heur weg naor Canada vunden, zo kunt export-Drenten heur hang naor de roots bevredigen.

Hopelijk maakt het zien, lustern, lezen neisgierig en zet het an tot meer belangstelling veur met naome Drèentstaolige literatuur. En as der lu bint die prikkeld wordt deur wat heur beuden wordt, dan kunt ze ok zölf an de slag en wark anlevern.

Körtum: dizze webstee bödt hiel wat. Veur jong en old, maor zeker veur jong. Internet is heur wereld. Taok veur Het Drentse Boek en Drentse Taol um de jeugd de weg naor Taolpad Drenthe te wiezen, der aandacht veur te blieven vraogen.

In het kader van het Consulentschap, een mandielig plan van de beide organisaoties, zuw daor in elk geval haard an trekken gaon. In oes ideaalbield zult ok leraoren Nederlands en CKV in het vervolgunderwies het Taolpad Drenthe under de aandacht van heur leerlingen brengen. De Drèentse literatuur verdient het!

Het plan dat ten grondslag lig an Taolpad Drenthe komt oet het brein van kunstenaor Ko Vester, die samen met Egbert Meijers al een demo op CD-Rom zet hef. Het oegeven van een CD-Rom was niet haalbaar. Een klein marktunderzuuk da’k oetvoerde meuk dudelijk dat der gien markt veur zukswat was. Maor met wiedergaonde en aal beter wordende techniek kwam een webstee wal binnen de meugelijkheden te liggen. Het risseltaot kuj dolkies zien, maor Ko Vester en Egbert Meijers mugt wat mij betreft as geestelijke pap en mam ok wal een beetie groots weden.

De webstee wordt maokt deur professionele mensen ( Albert Haar van RikRak Communications en Fred Fontijn van Fontijn en Partners), maor zie hebt daor de steun bij van geweldig kundige en enthousiaste vrijwilligers, zoas Ab Drijver en Eite Brink. Op de achtergrond wordt metdacht deur bijveurbield Frans Westenbrink en Rieks Siebering.

Lu, ok naomens Het Drentse Boek, stief bedankt veur jullie betrökkenheid, inzet, metdenken en invulling.

Met dizze prissentaotie is ‘Taolpad Drenthe’ niet of. Feitelijk is ’t allén maor goed as dizze webstee nooit of komt: constant moet der neie schrievers bij op zet worden, schrievers met nei materiaol in bield of aans portretteerd worden; wordt de interactieve elementen vervangen enzovoort, enzovoort.

Tja, en hoe beroerd ok. Zunder geld waw nargens kommen. Prachtig dat der organisaoties bint die de cultuur, in dit geval de streektaol as levend immaterieel cultuurgoed, een warm hart toedraogt. Bedankt oeze hoofdsponsor Stichting De Boer Supermarkten. Bedankt oeze sponsors VSB-Fonds Grunning-Drenthe, Prins Bernhard Cultuurfonds Drenthe en Previncie Drenthe.

Ik eindig mien woordtie met het oetspreken van de hoop dat Taolpad Drenthe een groot succes worden zal. De Drentse literatuur, en daor reken ik dus ok de meziekschrieverij bij, verdient het.

Ik geef nou geern het woord an Kees Schmalz, die naomens oeze hoofdsponsor Stichting De Boer Supermarkten jullie kört toespreken zal.