Gasselt – In ’t Maotie in Gasselt is zaoterdag 18 september de eerste Roel Reijntjes-pries oetlangt an Wim Hidding. Hidding is al vanof 1971 de fotograaf van maondblad Oeze Volk. Hij hef zich jaorenlaang inzet veur de streektaol.

Zu’n vieftig man waren zaoterdag 18 september in café ’t Maotie anwezig om getuge te weden van de oetreiking van de eerste Roel Reijntjes-pries. De Beiler dichter/performer is roem een jaor leden oet de tied kommen. Hij hef Oeze Volk een legaat naolaoten, waorvan ’t bestuur eeinmaol in de tweei jaor een pries oetlangen moet an eein die zich slim inzet hef veur de streektaol. Zaoterdag meuik veurzitter Geert Enting bekend dat de eerste Roel Reijntjes-pries, een oorkonde en 1400 euro, naor Oeze Volk-fotograof Wim Hidding gung.

’t Bestuur van Oeze Volk had de naom van de winnaor stil holden. Hidding wus der niks van. Hij docht dat hij in ’t Maotie was om foto’s te maoken veur ’t volgende nummer van Oeze Volk. Hidding was wies met de pries, maor hij vun wel dat der eigelijk ok nog zoveul aandern waren die de pries ok wel kriegen kund hadden. Geert Enting was ’t daor wel eeins met, maor zee drekt dat de pries hum tooukwam.