De viefentwintig dielnimmers hadden het dit jaor moeilijker as van teveuren inschat was. Bliekbaor har Drentse Taol-metwarker Abel Darwinkel hiel wat edders under ’t gres verstopt. Abel har het dictee in zien eigen moedertaol schreven: het Noordenvelds van Nörg.
Winnaor weur dit jaor Henk Ovinge oet Hesseln (Oosterhesselen) met tien fout. Hie har al meerdere jaoren thoes met zitten schrieven en dit jaor maor ies de stoute schoenen antrökken met de heufdpries as onverwachte risseltaot. Klaas Koops oet Schipbörg, de winnaor van vleden jaor, dee het ok dit jaor weer gloepens best. Hie har maor ien fout meer as Henk Ovinge en weur daormet tweide. Diny Vedder-Bruins oet Eext, die al meerdere keren metdaon hef, weur daarde met dartien fout. Veerde weur Geert Kroezenga oet Emmen met 19 fout en Harm Sijnstra zörgde derveur dat Schipbörg nog een maol in de top-vief kwam: met 21 fout legde hij beslag op de viefde plek.
Wim Boer van de PvdA-fractie in de Provinciale Staoten mus op het leste moment ofzeggen. Zien partijgenoot Herman Idema oet Emmen was spontaon en sportief en beud onmiddellijk an zien plek in te nimmen. Drei uur veur het begun van het dictee kun e met zien veurbereidings begunnen en dat was te kört. Hie meuk 66 fout in het dictee. Aander jaor mag Herman op herhaoling. As pries kreeg e van Drentse Taol een Drenthecursus anbeuden, die e vast van plan is te gaon volgen. Tweide pries winnaor Klaas Koops scheuf boetendes zien pries, de drei dielen van de ‘Grote Kocks’, deur naor de winnaor van de poedelpries. Naor verwachting giet Herman Idema aander jaor veur eerste plek.
Zeuven burgemeesters deden der dit jaor metan. Het was overdudelijk dat zie een drok bestaon hebt, want tied um zuch veur te bereiden op het Drèents dictee was der bliekbaor niet genog. Hans van de Laan, de baos van de gemiente Noordenveld, dee het aordig schier. Hie eindigde met maor 27 fout op de zeuvende plaots. De aandere zes burgemeesters hadden het der dudelijk stoerder met en eindigden in de achterhoede.
De viefentwintig dictee weurden dit jaor naokeken deur maor liefst negentien mensen, naomelijk de docenten van Stichting Drentse Taol. Zie stunden under leiding van Jan Tissing, Harry Slot en Geert Enting, die met zien dreien de jury vörmden. Elk dictee weur twei maol naokeken en de schriefsels van de top-vief hef de jury nog ies extra bekeken.
Het Drèents dictee wordt mandielig organiseerd deur RTV Drenthe en Drentse Taol. Drentse Taol zörgt veur de meer ‘taolige’ kaant (schrieven dictee, controle, benaodern jury en naokiekers). RTV Drenthe zörgt veur de oetzending met alles wat daorbij kieken komt. Herma Stroetinga las dit jaor veur de zeuvende keer de twaalf zinnen veur. Roelof Pieters en Margriet Benak zörgden veur de prissentaotie.