De Concept-Cultuurnota Provincie Drenthe 2005 – 2008, met as titel ‘De kunst van het combineren’ lig der. Daorin wordt proot over vief zogenuumde cultuurdragers en ‘taligheden’ is daor ien van. Daor valt Drentse Taol vanzölf ok under.

En, ik kan het niet aans zeggen, der bint prachtige dinger formuleerd over de streektaol en heur organisaotsies. Ik pak der even wat oet:

• De previncie giet de wiedere professionalisering van de streektaolorganisaotsies met raod en daod steunen.
• Educatieve streektaolactiviteiten moet diel oetmaoken gaon van de cultuureducatieve infrastructuur (in de kunstmenu’s en cultuurtrajecten).
• Met het streektaolbeleid wil de previncie het gebroek en de acceptaotsie van het Drèents bevördern.
• De previncie constateert dat het Drèents een underdiel is van het Nedersaksisch en older is as de Nederlandse taol en dus vindt de previncie het belangriek dat Drenten groots bint op heur taol as underdiel van de eigen identiteit en wil ze hiervan bewust maoken.
• Een groot diel van de inwoners van Drenthe vindt het behold van de Drentse taol belangriek.
• De kleinschaolige en daordeur kwetsbaore streektaolorganisaotsies wordt over een paor jaor saomenvoegd tot ien starke organisaotsie.
• De previncie wil dat der ien Hoes van de Drentse taol komt, waorin Drentse Taol, Drentse Boek, Oeze Volk en de stichting Roet zuch verienigt, want met de oprichting van een centraol anspreekpunt veur advies, informaotsie en understeuning wordt de kwaliteit en de structuur van het anbod op het gebied van de streektaol verbeterd.
• De komst van het Hoes van de Drentse taol leidt tot impulsen veur de Drentse taol en cultuur. Neie predukten op het gebied van theater, meziek en literatuur zult ontwikkeld worden.
• De bundeling van deskundigheid in ien Hoes van de Drentse taol kan ok leiden tot ien literair tiedschrift in Drenthe.
• De saomenvoeging van streektaolinstellings en –functies drag dertoe bij dat der meer streektaolprejekten in het underwies ontwikkeld wordt.
• Schoelen die dat wilt, kriegt underwiesactiviteiten anbeuden die het gebroek van het Drèents bevördert.
• Der komt cultuureducatieve activiteiten op basis van taolwetenschappelijk underzuuk naor de behuufte an streektaolactiviteiten in het underwies.
• De streektaolorganisaotsies of het Hoes van de Drentse taol dus moet kieken wat schoelen wilt an educatieve streektaolpredukten. Dat tiedig beschikbaor hebben kreg prioriteit. Daorum wordt saomenwarking met de pabo anfieterd.
• Structureel wetenschappelijk underzuuk naor de Drentse taol en literatuur kan het Drèents een stevige basis geven. Dit is te bereiken deur de anstelling van een biezunder hoogleraarschap, die een kenniskring um zuch hen organiseert en die underzuuk naor de Drentse taol en literatuur stimuleert en enthousiasmeert. Het taolwetenschappelijk underzuuk is de basis veur het streektaolbeleid van de previncie.
• De previncie Drenthe blef zuch inzetten veur erkenning van het Drèents under hoofdstuk 3 van het Europees Handvest veur Minderheidstaolen. De previncie verwacht ok dat de rieksoverheid al het meugelijke doen zal um dizze erkenning te bevördern.
• De previncie stimuleert streektaolinstellings um gebroek te maoken van de financiële meugelijkheden die Europese erkenning op rieks- en Europees niveau bödt.


En dan komt het hoofdstukkie ‘Welke concrete activiteiten gaan wij uitvoeren?’ Want al die prachtige algemienheden moet vanzölf wal een concrete vertaoling kriegen. Hier komt ze:
1. Drentse Taol, Drentse Boek, Oeze Volk en Roet gaot in 2007 op in ien Hoes van de Drentse taol. Mandielig wordt cultuureducatieve streektaolactiviteiten ontwikkeld op basis van taolwetenschappelijk underzuuk. Der komt een efficiencykörting van € 20.000,00.
2. Instellings moet vraoggericht warken gaon an streektaolprejekten. Hierveur komt der budgetofspraoken met Drentse Taol.
3. De provinciale Subsidieregeling Drentse publicaties verdwient en giet in 2006 naor het te vörmen Hoes van de Drentse Taol.
4. De previncie giet in overleg met Riek en Nedersaksische overheden over erkenning van het Nedersaksisch en bepaolt dan vanneis de eigen positie t.a.v. intensivering van streektaolbeleid in de verschillende maatschappelijke domeinen.
5. De previncie giet underzuuk doen naor de meugelijkheden van structurele wetenschappelijke bestudering van Drentse taol en literatuur en de implementaotsie daorvan. As ideaol wordt een biezunder hoogleraorschap an de RUG zien.
6. De previncie stimuleert premotieactiviteiten met een intersectorale opzet. Deur mythes, legendes en verhaolen in de streektaol kan het Drèentse arfgoed levendig blieven.


En tot slot is het vanzölf van geweldig groot belang hoe het dan met het geld wordt. Het financieel overzicht gef an dat der dit jaor in totaol € 224.000,00 naor streektaol gaon is. In 2007 is de verwachting dat der zo efficiënt warkt wordt, dat der € 26.300,00 minder neudig is.

Tot en met 3 jannewaorie lop de inspraokprocedure over de conceptnota. De Staotenkemissie Cultuur en Welzijn zal naor verwachting de nota op 23 febrewaorie 2005 bespreken en as alles metzit zal de definitieve vaststelling gebeuren op 23 meert 2005.

◄ weerum naor het thoesblad